Foto: Majid Asgaripour / WANA / Reuters
AQSh pen Izraıl Iranǵa qarsy birlesken arnaıy áskerı operasııa bastady: ne belgili?
28 aqpan, senbi kúni tańerteń Izraıl men AQSh Iran aýmaǵyna áýe soqqylaryn jasady. Shabýylǵa el astanasy Tegeran, ıadrolyq nysandar jáne joǵarǵy bılik ókilderiniń rezıdensııalary ilikken.
AQSh prezıdenti Donald Tramp aýqymdy áskerı operasııanyń bastalǵanyn jarııalap, ırandyqtardy ıslamdyq rejımdi qulatýǵa shaqyrdy. Buǵan jaýap retinde Iran Izraıl aýmaǵyna jáne Taıaý Shyǵystaǵy amerıkalyq áskerı bazalarǵa zymyran soqqylaryn jasady.
Iranǵa jasalǵan soqqylar týraly ne belgili?
28 aqpan tańerteń Tegeran men Isfahan qalalarynda jarylystar bolǵany habarlandy. Isfahanda Irannyń mańyzdy ıadrolyq ortalyqtarynyń biri ornalasqan.
Soqqylar sondaı-aq Lýrestan provınsııasyna, Tebrız, Kým, Keredj jáne Kermanshah qalalaryna jasalǵan. Nysanaǵa Islam revolıýsııasy saqshylary korpýsynyń (KSIR) barlaý shtaby men Tegerandaǵy Imam Homeını atyndaǵy halyqaralyq áýejaı da alynǵan. Sonymen qatar ırandyq bılik ókilderiniń úıleri de shabýylǵa ushyraǵan.
Bir mezgilde Irannyń odaqtasy – Hezbolla uıymynyń Lıvandaǵy nysandaryna da soqqy jasalǵan.
Izraıl Qorǵanys mınıstrligi operasııanyń bastalǵanyn rastady. Mınıstr Israel Kas bul operasııa birneshe aı boıy daıyndalǵanyn málimdedi.
Amerıkalyq ushaqtar Taıaý Shyǵystaǵy bazalardan kóterilgeni aıtylyp jatyr. The New York Times basylymynyń jazýynsha, bul shabýyl ótken jylǵy Irannyń ıadrolyq nysandaryna jasalǵan soqqylardan áldeqaıda aýqymdy bolýy múmkin.
The Wall Street Journal deregine sáıkes, AQSh pen Izraıl birneshe kún boıy qarqyndy soqqylar jasaýdy josparlap otyr.
Donald Tramptyń málimdemesi
Donald Tramp operasııaǵa AQSh-tyń qatysyp jatqanyn jeke ózi rastady. Onyń aıtýynsha, maqsat – amerıkalyq halyqty qorǵaý jáne Iran tarapynan tóngen qaýipti tolyq joıý.
Tramp Irannyń zymyrandaryn, olardyń óndirisin jáne áskerı flotyn joıýǵa ýáde berdi. Ol ırandyq áskerıler men polısııa qyzmetkerlerin qarýlaryn tastaýǵa, al beıbit turǵyndardy qaýipsiz jerge jasyrynýǵa shaqyrdy. Sonymen qatar ıslamdyq rejımdi ıran halqynyń ózi qulatýy tıis ekenin aıtty.
Izraıl tarapynyń ustanymy
Izraıl bıligi soqqylardy «aldyn ala jasalǵan» shara dep atady. Premer-mınıstr Bınıamın Netanıahý Izraıl Irannyń ıadrolyq qarýǵa ıe bolýyna jol bermeıtinin málimdedi.
(Foto: Ariel Schalit / AP)
El ishinde tótenshe jaǵdaı rejımi engizildi: jınalystar men mektepterdegi sabaqtarǵa tyıym salyndy, kóptegen kásiporyndardyń jumysy toqtatyldy, áýe keńistigi jabyldy. Azamattarǵa panalaý oryndaryna jasyryný usynyldy.
Irannyń jaýaby
Izraıl men AQSh soqqylarynan keıin Iranda ınternet baılanysy aıtarlyqtaı shektelip, mobıldi jelilerde irkilister tirkelgen. Memlekettik telearnalarda patrıottyq beınerolıkter kórsetilýde.
Reuters agenttiginiń habarlaýynsha, Irannyń joǵarǵy kóshbasshysy Alı Hameneı qaýipsiz jerge jetkizilgen.
Kúndiz Iran Qarýly kúshteriniń jaýap soqqylary týraly aqparat tarady. Zymyrandar Izraıl aýmaǵyna, sondaı-aq Bahreındegi Parsy shyǵanaǵyndaǵy AQSh-tyń iri áskerı-teńiz bazasyna baǵyttalǵan. Budan bólek, Birikken Arab Ámirlikteri, Kýveıt jáne Iordanııa aýmaǵyndaǵy amerıkalyq bazalarǵa soqqylar jasalǵany habarlandy.
Keı derekterge qaraǵanda, BAÁ-degi Al-Dhafra áýe bazasyna ballıstıkalyq zymyrandar tıgen. Sondaı-aq Katar astanasy Doha men BAÁ astanasy Abý-Dabı qalalarynda jarylystar estilgen.
(Foto: Stringer / Reuters)
Rastalmaǵan málimetter boıynsha, Iran Katardaǵy AQSh-tyń Al-Ýdeıd bazasyna da zymyran soqqysyn jasaǵan.
40 adam qaza tapty: Izraıl Irandaǵy mektepke soqqy jasady
Qaqtyǵys qalaı órbýi múmkin?
Sarapshylardyń pikirinshe, jaǵdaıdyń odan ári ýshyǵýy búkil Taıaý Shyǵys aımaǵyndaǵy turaqsyzdyqty kúsheıtip, munaı naryǵyna, halyqaralyq qaýipsizdikke jáne jahandyq ekonomıkaǵa áser etýi múmkin.
Qazirgi ýaqytta taraptar bir-birine jaýap soqqylaryn jalǵastyryp jatyr, al halyqaralyq qaýymdastyq jaǵdaıdy jiti baqylap otyr.
Aıta keteıik, Prezıdent Qasym-Jomart Toqaev Taıaý Shyǵystaǵy jaǵdaıǵa baılanysty elimizdegi qaýipsizdik sharalaryn kúsheıtýdi tapsyrdy.
Sonymen qatar, Syrtqy ister mınıstrligi Taıaý Shyǵys elderindegi jedel baılanys jelileriniń nómirlerin jarııalady.
