– Qazaqstanda jeke ferma sharýashylyqtaryn damytý, bul – búkil eldiń ekonomıkasy úshin zor múmkindik. Máselen, qazirgi ýaqytta respýblıkada jylyna 15 myń tonnaǵa jýyq irimshik óndiriledi. Al bizdiń irimshigimiz óte dámdi. Sharýashylyǵymyzdyń negizin qalaǵan kezde biz osy erekshelikti kóbirek dáripteýdi maqsat etip, ekskýrsııalar ótkize bastadyq, balalardy irimshik óndirisine qyzyqtyryp, kásiptik baǵdar júrgizdik. Business Bilim jobasy arqyly kóptegen kásipkerdiń qatelikterin aınalyp ótip, bıznesti durys qura aldyq. Aldaǵy josparymyz – bıznesti keńeıtip, eksportqa shyǵý, – deıdi ferma basshysy Aleksandra Grıgolova.
Aleksandra jobaǵa 60 bas eshkisi bar fermasy jáne ferma negizinde eshki sútinen irimshikter men ashyǵan sút ónimderin óndiretin shaǵyn zaýyt bıznes-ıdeıasymen kelgen bolatyn. Joba barysynda sút ónimderi men irimshik zaýytynyń jumysy bir qalypqa kelip, óndiris kólemi ulǵaıdy. Qazirgi ýaqytta eshkiler sany eki ese kóbeıdi.
Al Bal Balyk kompanııasy jańa aýlanǵan balyqty óńdeýmen, albyrt, baqtaq jáne maıshabaqty qaqtaýmen aınalysady. Bul otbasylyq óndiris aıyna úsh tonnaǵa deıin balyq ónimderin óndiredi jáne aıyna 30-40 tonna kórsetkishke qol jetkizýdi kózdep otyr. Sarapshylardyń kómegimen bıznestiń aıryqsha maqsaty anyqtalyp, jumystyń qurylymy jasaldy. Kompanııa qazaqstandyq tizilimge engizilip, sáıkestik sertıfıkatyn jáne veterınarlyq-sanıtarlyq qorytyndy men synaqtar hattamasyn aldy.
– Qazirgi ýaqytta ónimderdi Ońtústik Koreıa men Qytaıǵa eksporttap kórýdemiz. Basqa elderge shyǵý úshin óndiris kólemin ulǵaıtý kerek. Degenmen bizdiń naryq birshama kúrdeli. Balyq óńdeıtin sharýashylyqtarǵa qoldaý kórsetý úshin qazaqstandyq balyqtyń ózindik qunyn retke keltirý qajet. Bul janarmaı, logıstıka, jer-sý telimin kútip ustaý, brakonerlermen kúres, jer telimderin monopolııalandyrý quny sııaqty birqatar qarjylyq shyǵynǵa táýeldi. Biz Business Bilim jobasynan 4,7 mln teńge grant alyp, óndiristik kólemdi ulǵaıtyp kelemiz, – dedi Bal Balyk qaqtalǵan, súrlengen, marınadtalǵan, tuzdalǵan balyq óndirisiniń negizin qalaýshy Aıjan Nuǵmanova.
Mańǵystaýdaǵy maqtaýly sharýashylyqtar óz ónimderin taratý kókjıegin keńeıtip, shetel naryǵyna qadam basa bastady. Qazaqstandyq ónimniń keregesi keńeıse el ekonomıkasyna da olja.
Mańǵystaý oblysy
