Álıhan Smaıylov otandyq mashına jasaý salasynyń respýblıka ekonomıkasynyń turaqty damýyna eleýli úles qosyp kele jatqanyn aıtyp ótti. Máselen, ındýstrııalandyrý jyldarynda mashına jasaýdaǵy óndiris kólemi 6 esege ósip, 2,3 trln teńgege deıin kóterildi. Salanyń ósimi sońǵy 3 jylda orta eseppen 20%-dy qurap otyr.
«Qazirgi tańda Úkimet otandyq óndirýshilerdi qoldaýǵa baǵyttalǵan jumystardy jalǵastyrýda. Bul – qoljetimdi bastapqy materıaldarmen jáne qarjylandyrýmen qamtamasyz etý, sonymen birge ımportqa táýeldilikti azaıtý, jańa óndiristerdi qurý jáne jumys istep turǵan óndiris oryndaryn jańǵyrtý», dedi Álıhan Smaıylov.
Sonymen qatar ol Úkimettiń ashyq dıalogqa jáne bıznespen birlesip jumys isteýge daıyn ekenin aıtty.
Plenarlyq otyrys aıasynda Álıhan Smaıylov suraq-jaýap sessııasyna qatysty, onda Úkimet basshysy mashına jasaý ónimderin ımporttaý jáne sheteldik kompanııalardyń Qazaqstanǵa kóshýi týraly óz pikirin bildirdi.
«Bizde búginde eksportqa qaraǵanda ımporttyń úlesi basym. Bul jaǵdaı kerisinshe bolýy kerek. Máseleni sheshý úshin júıeli jáne keshendi sharalar qabyldaý qajet. Mashına jasaý salasyn damytýdyń keshendi jospary baǵdarlamalyq qujatyn ázirleý jáne qabyldaý týraly oılanatyn kez keldi. Sebebi uzaq merzimdi tásilder ǵana osy baǵytta aıtarlyqtaı nátıjelerge qol jetkizýge múmkindik beredi», dedi Álıhan Smaıylov.
Sonymen qatar Premer-Mınıstr «Kazakhstan Machinery Fair» kórmesiniń ekspozısııasymen tanysty, onda 17 eldiń 240-tan astam kompanııasy óz ónimderi men tehnologııalaryn usyndy. Olar: Qazaqstan, Avstrııa, Belarýs, Germanııa, Danııa, Izraıl, Ispanııa, Italııa, Reseı, Túrkııa, О́zbekstan, Fransııa, Chehııa, Shveısarııa, Shvesııa, Ońtústik Koreıa jáne Iran. Odan bólek, Álıhan Smaıylov Túrkııanyń «MAKFED» mashına jasaý federasııasynyń tóraǵasy Adnan Dalgakıranmen kezdesti, onda Úkimet basshysy túrik kompanııalaryn belsendi túrde ınvestısııa salyp, Qazaqstanda óz óndiristerin ashýǵa shaqyrdy.
«Bizdiń elimiz tájirıbesi mol túrik kompanııalarymen mashına jasaý salasyndaǵy birlesken jobalardy iske asyrýǵa múddeli», dedi Premer-Mınıstr.
