«Abaı oblysy toǵyz joldyń torabynda tur, Reseımen, Qytaımen shektesip jatyr. Osy múmkindikti utymdy paıdalaný úshin joldarymyz sapaly ári qaýipsiz bolýy kerek. Elimizdiń kólik áleýetin damytý úshin Baqty arqyly Qytaıǵa baratyn temirjol jelisin salýdy josparlap otyrmyz. Bul temirjoldy mindetti túrde salýymyz kerek. Úkimet osy máselemen aınalysady», dedi Memleket basshysy.
Sondaı-aq ol óńirde «qurǵaq port», «logıstıkalyq park» salyp, kólik dálizin damytý keregin aıtty.
«Halyqaralyq mańyzy bar kúre jol Semeı arqyly ótedi. Sondyqtan, eń aldymen, qaladaǵy eki kópirdi jóndeý qajet. Bıyl munda jańa kópirdiń qurylysy bastaldy. Úkimet oblys ákimdigimen birlesip, ony úsh jylda salyp bitirýge tıis. Sondaı-aq, aspaly kópirge kúrdeli jóndeý júrgizýdi tapsyramyn», dedi Prezıdent.
