Qyrkúıek aıynyń 21-29 kúnderi aralyǵynda Batys Qazaqstan oblysy men Reseı Federasııasy shekarasyndaǵy 6 keden beketinen 49464 adam ótkeni belgili boldy.
Osy ýaqyt ishinde Reseı azamattaryna qarsy úsh márte qylmystyq is tirkelgen. Onyń biri – 27 qyrkúıekte Bórli aýdanynda zorlyq-zombylyq oqıǵasy bolsa, 28 qyrkúıekte Oral qalasynda respeıliktiń 40 myń teńgesin tartyp alǵandar ustalǵan. 29 qyrkúıekte kórshi eldiń azamatyn aldap, 70 myń teńgege shyǵynǵa batyrǵan qazaqstandyqqa «alaıaqtyq» babymen is qozǵaldy.
Budan bólek, Reseı Federasııasy azamattary tarapynan buzylǵan ákimshilik quqyqbuzýshylyqtarǵa baılanysty 43 márte is qozǵalypty.
Al 30 qyrkúıek kúni saǵat 00.00 shamasynda Batys Qazaqstan oblystyq polısııa departamenti Jedel basqarý ortalyǵynyń ınspektorlary Oraldyń túngi klýbtarynyń biriniń janynda tóbelesken er adamdardy beınebaqylaý kamerasynan baıqap, oqıǵa ornyna kelgen kezde, mas kúıinde bir-birimen janjaldasqan Reseı azamattary qolǵa túsken.
Bul fakt boıynsha materıal jınalyp, kýágerlerden jaýap alyndy. Janjalǵa qatysýshylar Abaı polısııa bólimine jetkizildi. Sóıtip, tóbelesýshi qos azamat usaq buzaqylyq jasaǵany, qoǵamdyq orynda mas kúıinde júrgeni jáne tynyshtyqty buzǵany úshin sot sheshimimen 5 táýlikke qamaýǵa alyndy. Olardyń biri 30 jasta, biri 27 jasta eken.
«Reseı azamattarynyń Qazaqstan Respýblıkasy aýmaǵynda budan ári bolý-bolmaý máselesin azamattyq sot qaraıtyn bolady», dep habarlady polısııanyń baspasóz qyzmeti.
2022 jyldyń basynan beri Batys Qazaqstan oblysynda Reseı azamattaryna qatysty 17 qylmystyq is, 1396 ákimshilik is kóterilgen.
