Aımaqtar • 02 Qazan, 2022

Shekaradaǵy ahýal: Monıtorıng tobynyń jumysy

55 ret kórsetildi

Batys Qazaqstan oblysyndaǵy kóshi-qon ahýaly men Reseı Federasııa­symen shekaradaǵy jaǵdaıdy jergilikti bılik oryndary muqııat nazarda ustap otyr.

Sońǵy kúnderi qalyptasqan jaǵ­daıǵa baılanysty Batys Qazaqstan oblysy aýmaǵyndaǵy 6 shekaralyq keden beketi Reseıden kelip jatqan mıgranttar tasqynynyń astynda qaldy. Resmı málimetterge qarasaq, 21 qyrkúıekten beri ótken bir apta ishinde oblys aýma­ǵyna 6 283 Reseı azamaty kelgen eken. Bul Reseı Fe­dera­sııasynan 2021 jyly 12 aıda kel­­gender sanynan artyq.

Mundaı jaǵdaıda ne isteý kerek?! Oblys ákimdi­ginde shekara másele­leri jónindegi úılestirý keńesi qury­lyp, qazir qalyptasqan jáne bolashaqta bolýy yqtımal qıyndyqtar men túıt­kilderdi talqylap, naqty sheshimder qolǵa alynyp jatqanyn budan buryn habarlaǵan bolatynbyz.

«Reseıden kelip jatqan mıgranttar tasqyny tolyq baqylaýda, shekaradan ótken sheteldikter máselesine monıtorıng jasalyp otyr. О́ńirde qoǵamdyq tártip saqtalýy úshin tıisti sharalar qolǵa alyndy. Qazaqstan men Reseı arasyndaǵy Syrym, Shaǵan, Tasqala keden beketterinde táýlik boıy kezekshilik uıymdastyryldy. Ol jerde 35 adam qyzmet atqarýda. Oblys ortalyǵynda jáne óńirde azyq-túlik baǵasy baqylanyp, iri saýda oryndary men bazarlarda kún saıyn tekserý júrgiziledi», degen edi oblys ákiminiń orynbasary Baqytjan Narymbetov.

Shekaradaǵy uzyn-sonar kezek eki el arasynda qarym-qatynas jasap júrgen Qazaqstan azamattaryna da qıyn tıdi. Olar bizdiń elge aǵylǵan reseılik mıgranttarmen bir kezekte turyp, birneshe táýlik joǵaltqan. Olardyń arasynda Eýropadan, Re­seıden júk alyp kele jatqan otandyq kásipkerler de az emes.

– Qazirgi ýaqytta eń mańyzdy má­sele – Reseımen shekaradaǵy Qazaq­stan azamattaryn elge qaıtarý. О́ńir basshysy Ǵalı Esqalıev Reseı shekara vedomstvosymen birge shekara qyzmeti departamentine bizdiń azamattarymyzǵa kómek kórsetý boıyn­­sha máseleni sheshýdi tapsyrdy. Sondaı-aq oblys ákimi osy problema­ny sheshý boıynsha Qazaqstan Úkimetine usynystar ji­berdi, olar qazirdiń ózinde jedel túrde qaralýda, – dedi Baqytjan Haberuly.

Taǵy bir mańyzdy mindet – Batys Qazaqstan oblysy aýmaǵynda qalǵan Reseı Federasııasy azamattaryn der kezinde esepke alý máselesi. Zań bo­ıynsha sheteldikterdi qabyldaýshy tarap ol azamattar jóninde úsh táýlik ishinde polısııa organdaryna habarlaýǵa tıis. Sondyqtan kóshi-qon qyzmeti jergilikti halyq pen mıgranttardyń quqyqtary men jaýapkershiligine baılanysty túsindirý jumysyn kúsheıtip, qajetti aqparat SMS arqyly taratyldy. Sondaı-aq polısııa jáne memlekettik kirister departamentteri páterin zańsyz jalǵa berip otyrǵan turǵyndardy anyqtap, zańnamaǵa sáıkes sharalar qabyldaýǵa kiristi. Sıfrlyq tehnologııalar basqarmasynyń qyzmet bazasynda kóshi-qon zańnamasy máselesi boıynsha mıgranttar men jalǵa berýshilerge 109 nómiri boıynsha keńes berý uıymdastyryldy.

О́ńir basshysy Qazaqstan azamat­tarynyń da, kóship-qonýshylardyń da qaýipsizdigin qamtamasyz etý qajet­tigin erekshe aıtty. Sondyqtan polı­sııa departamentiniń jeke quramy kúsheı­tilgen rejimge kóshirildi. Ob­lys ákiminiń orynbasary óńirde qoǵamdyq tártip­ti qam­ta­masyz etý, quqyq buzýshy­lyqtyń aldyn alý jáne boldyrmaý maqsatynda qurylǵan halyq jasaqtary polısııa depar­tamentiniń qaramaǵynda ekenin málimdedi.

Qazirgi tańda eriktilerden qurylǵan birneshe top oblys ortalyǵyndaǵy alańǵa, parkterge baqylaý jasap, monıtorıng júrgizýde. Oblystaǵy eriktiler Reseıden kelgenderge temir jol jáne avtobýs beketinde, «Dı­na» sýpermarketinde kómek kórsetý oryndaryn uıymdastyryp, qol ushyn berýde. Mıgranttardy shekaradan Oralǵa jáne odan ári jetkizý oryndaryna deıin tasymaldaý júrgizilýde. Oblys eriktileriniń bastamasymen «Atameken» jáne «Samal» jazǵy lagerleriniń bazasynda kelýshilerdi aqyly túrde qabyldaý pýnktteri (barlyǵy 330 oryn) uıymdastyryldy.

Saraptamaǵa qaraǵanda oblys aýma­ǵyna kelgen sheteldikterdiń basym bóligi odan ári basqa óńirlerge ketip jatyr. Sondyqtan áleýmettik jelilerde elimizdiń basqa óńirlerine júretin turaqty avtobýs marshrýttarynyń qozǵalys kestesi, jolaqy baǵasy týraly aqparat taratyldy. Mysaly, qalyptasqan jaǵdaıǵa baılanysty Atyraý qalasyna jolaýshylar avtobýsy buryn kúnine bir márte júrse, qazir kúnine úsh ret qatynaýda.

«Sondaı-aq barlyq poıyz baǵyt­taryna qosymsha vagondar tirkeý, áýe reısterin kóbeıtý jóninde kelissóz júrgizip jatyrmyz. Qajet bolǵan jaǵdaıda monıtorıng jáne jedel sharalar qabyldaý úshin derbes shtab qurylatyn bolady. Oblys ákimi azyq-túlik tapshylyǵyna jol bermeýdi jáne taýarlardyń turaqty bolýyn qamtamasyz etýdi tapsyrdy, deıdi B.Narymbetov.

 

Batys Qazaqstan oblysy

Sońǵy jańalyqtar

Dollar baǵamy tómendedi

Qarjy • Búgin, 16:10

Túrkistan oblysynyń ákimi taǵaıyndaldy

Taǵaıyndaý • Búgin, 15:38

Qostanaı oblysynyń ákimi taǵaıyndaldy

Taǵaıyndaý • Búgin, 14:10

QHL: «Barys» «Traktordan» ozdy

Hokkeı • Búgin, 12:17

Tanymal veloshabandoz qaza tapty

Oqıǵa • Búgin, 11:38

Soltústik Qazaqstan oblysynyń ákimi aýysty

Taǵaıyndaý • Búgin, 11:09

Atyraý oblysynyń ákimi taǵaıyndaldy

Taǵaıyndaý • Búgin, 10:39

Aqtaýda kópqabatty úıden órt shyqty

Aımaqtar • Búgin, 09:25

Uqsas jańalyqtar