Ýsolka ózeniniń mańaıy – shahar turǵyndary men qonaqtar jıi serýendeıtin aýmaq. Sý aıdynynyń aınalasynda tamasha tabıǵat qoınaýy ornalasqan, jaǵalaýy tolǵan toǵaı. О́kinishke qaraı, tabıǵat aıasyna shyqqandar sońynan tamaq qaldyqtary men polıetılen qapshyqtaryn, túrli qoqystar qaldyryp ketedi. Sondyqtan óńir jastary bul jerdi únemi tazartyp turýǵa yntaly.
S.Toraıǵyrov ýnıversıtetiniń 4-kýrs stýdenti, oqý ornyndaǵy jastar isi jónindegi komıtetiniń tóraǵasy Dáýren Sháripov ekologııalyq tazalyq is-sharasyna bir top belsendi jasty bastap keldi. Dáýren EcoStudentKZ chellendjin shymkenttik qurby-qurdastarynan qabyldap alǵandaryn jetkizdi.
– Bizdiń ýnıversıtettiń jastary árdaıym belsendi. Búgin 20-dan astam jas Ýsolka ózeniniń jaǵalaýyn tazartý ústindemiz. Bul jerde jaz boıy «Jasyl el» jasaqtarymen, ózge de belsendi jastardyń kómegimen ekologııalyq sharalar turaqty túrde uıymdastyrylyp kelgenin bilemiz. Alaıda keıbir turǵyndardyń mádenıetsizdik tanytýynan jaǵalaýdy jıi tazartýǵa májbúrmiz. Toǵaı arasyndaǵy alańqaılarda, ózen jaǵasynda qoqystar únemi shashylyp jatady. Jastar qazir jınap ketse, erteńgi kúni suryqsyz kórinis taǵy qaıtalanady. Sondyqtan biz bul chellendjimiz arqyly shahar turǵyndarynyń nazaryn tazalyq mádenıetine aýdarǵymyz keledi. Qorshaǵan ortany kózimizdiń qarashyǵyndaı saqtaý úshin bizge mundaı isterge júıeli jumylýymyz qajet, –deıdi ol.
Buǵan deıin S.Toraıǵyrov ýnıversıtetiniń stýdentteri Ertis ózeniniń Ortalyq jaǵajaıynda ekojoryq jasap, jaz boıǵy jınalyp qalǵan qoqysty jınap, arnaıy oryndarǵa tókken edi.
Al Pavlodar pedagogıkalyq ýnıversıtetinen kelgen jastar kópshilikke «О́zińnen keıin qoqys tastama!» dep uran tastady. Bilim berý mekemesindegi jastar ókili Batyrhan Baıtanattyń pikirine den qoısaq, mundaı is-sharalar nátıjesinde zamandastar boıynda ekologııalyq mádenıet qalyptasady. Ýnıversıtet stýdentteri tazalyq sharalarynan qalys qalmaıtynyn aıtty. О́tken senbide oblys ortalyǵynyń soltústik bóliginde boı kóterip jatqan jańa shaǵyn aýdan – «Sport-sıtıde» aǵash otyrǵyzý senbiligine qatysty. Oqý ornynyń ekologııalyq baǵytta óz saıasaty bar. Onyń aıasynda jyl saıyn júzdegen shara uıymdastyrylady.
Pavlodarlyq belsendi jastar EcoStudentKZ chellendjin Ekibastuz qalasy men Túrkistan stýdentterine joldady. Odan ári ekologııalyq estafeta Taraz, Petropavl, Almaty, Semeı qalalarynda jalǵasady dep kútilýde.
PAVLODAR
