Qazaqstan • 04 Qazan, 2022

Ańyzǵa aınalǵan áýlet

70 ret kórsetildi

«Apyr-aý, kishkentaı Abyraly, sen qandaı ǵajap, qasıetti jer ediń!», dep áıgili jazýshy Ázilhan Nurshaıyqov aıtqandaı, Abyraly óńirinen qazaqtyń nebir jaqsy men jaısańdary shyqqany belgili. Sonyń biri – memleket qaıratkeri, bıyl dúnıege kelgenine 100 jyl tolyp otyrǵan Rymbek Smaquly Baıseıitov.

«Tektiden tekti týady, tektilik tu­qym qýady» degen bar ǵoı, bolashaq qaırat­kerdiń ákesi Smaq Baıseıituly da (1895-1942) alys-jaqyn óńirge aty málim balýan, ánshi, kúıshi, ónerpaz bolǵan jan eken. Halyq kompozıtory, ánshi, aqyn ári batyr Mádı Bapıulymen úzeńgiles dos bolǵan degen derek bar. 1922 jyldyń 8 qa­zanynda burynǵy Semeı oblysyna qarasty Abyraly óńirinde, Máremik taýynyń etegindegi Smaq qystaýynda ómirge kelgen Rymbek jasynan eńbekke erte aralasyp, shymyr da shıraq bolyp ósedi. Esepshilik kýrsty bitirip, keńsharda esepshi qyzmetin atqaryp júrgen bozbala el basyna kún týǵanda óz qatarymen birge maıdanǵa attanyp kete bardy. Ekinshi dúnıejúzilik soǵysta júrip, KOKP músheligine ótti, zeńbirek komandıri, vzvod komandıri, aǵa serjant boldy. Kalının maıdanynda, I Baltyq maıdanynda júrip, soǵysqa bastan-aıaq derlik qatysty. Rymbek Smaqulynyń soǵystaǵy erlikteri jaıynda jazýshy Á.Nurshaıyqov «Maıdan jazbalarynda» tamasha sýrettep jazyp ketken. Ol R.Baıseıitovpen 100-brıgadanyń qura­mynda birge soǵysqan qarýlas dosy edi. 1943 jyldyń qańtarynda Velıkıe Lýkı qalasy úshin keskilesken shaıqastar júrip jatady. Bul baǵyttaǵy shaıqastardyń mańyzdylyǵy kezinde «Kishi Stalıngrad» dep baǵalanǵan bolatyn. 100-brıgada jaýyngerleriniń jaý tankterine qarsy erlikpen soǵysýyn maıdanger jazýshy Máskeý túbindegi panfılovshylardyń shaıqasynan kem sanamaıdy. Jaýdyń birde-bir tanki Velıkıe Lýkıge óte almaı qalady. Bir ǵana R.Baıseıitovtyń vzvody jaýdyń 11 tankisin joıǵan. Onyń úsheýin Rymbek Sma­quly tikeleı ózi joıyp­ty. Erlikpen qaza tapqan Á.Bımýrzın jáne mınadan jaraqat alǵan R.Baı­seıitov Keńes Odaǵynyń Batyry ataǵyna usynylady. Alaıda joǵary jaq olarǵa «Otan soǵysy» ordenin ǵana berý týraly sheshim shyǵarady. Osy­laı­sha, maıdanda qanshama qazaqtyń qa­har­mandyǵy laıyqty baǵalanbady de­seńizshi!

Soǵystan keıin bir-birinen kóz ja­zyp qalǵan qarýlastar Ázilhan men Rym­bek arada birshama jyldar ótkende Úkimet úıindegi bir jınalysta kezdeı­soq jolyǵyp, qýana qaýyshady. Bireýi «Sosıalıstik Qazaqstan» gazeti redak­tory­nyń orynbasary, ekinshisi Qarjy mınıstriniń orynbasary bolyp qyzmet atqaryp júrgen kez eken.

Soǵystan týǵan jerge aman-esen oral­ǵannan keıin, R.Baıseıitov 1946 jyldan bastap Semeıdegi un kombınatynda, salyq ınspeksııasynda eńbek jolyn jalǵastyrady. Jumys isteı júrip, Semeı qarjy-ekonomıka tehnıkýmyn jedeldetip oqyp bitiredi. Búkilodaqtyq qarjy ınstıtýtyn alty jyl boıy syrttaı oqıdy. Adaldyǵy men iskerligi arqasynda qyzmet satysynda órleı beredi. Semeıdegi qarjy bóliminiń aǵa ınspektory, bólim bastyǵy bolady. 1951 jyly Almaty qalasyna shaqyrylyp, Qazaq KSR qarjy mınıstrliginiń bas­qarma bastyǵynyń orynbasary atanady. Mınıstrdiń kómekshisi, bólim bastyǵy qyzmetteri senip tapsyrylady. 1958-1961 jyldar aralyǵynda Qazaq KSR Qarjy mınıstrliginiń memlekettik kiris­ter basqarmasynyń bastyǵy, 1961-1974 jyldarda Qarjy mınıstriniń birinshi orynbasary, Baǵa jónindegi mem­lekettik komıtettiń tóraǵasy laýazym­da­ryn ıelenedi. 1974-1984 jyldar ara­ly­ǵynda Qazaq KSR Qarjy mınıstri bo­lady.

Rymbek Smaqulynyń maıdandaǵy jáne beıbit ómirdegi joǵary marapatta­rynyń keıbireýlerine toqtala ketsek,

I jáne II dárejeli Otan soǵysy ordenderi, eki márte Eńbek Qyzyl Tý ordeni, Ha­lyqtar dostyǵy ordeni, kóptegen medal men Qurmet gramotalary, Qazaq KSR Jo­ǵarǵy Keńesiniń depýtaty, Qazaqstan Kompartııasy OK múshesi, QR eńbek sińirgen ekonomısi, Qarjy isiniń úzdigi ataq­tary, t.b. Ol Odaqtyq dárejedegi derbes zeınetker retinde eńbek demaly­syna shyqqan. Abzal azamat, qoǵam qaı­ratkeri R.Baıseıitov 1991 jyly 2 tamyzda dúnıeden ótti. Respýblıka bas­shylyǵynda uzaq jyl birge qyzmet atqarǵan Dinmuhammed Qonaevtyń ózi topyraq salyp turyp: «Qazaqstannyń bir tıynyna da qııanat jasamaı ótken azamat-aı», degen eken.

1994 jyly Semeı qarjy-ekonomı­kalyq tehnıkýmyna (keıinnen kolledj), qaladaǵy ortalyq kóshelerdiń birine Rym­bek Smaqulynyń esimi berilgen.

R.Baıseıitov atyndaǵy Semeı qar­jy-ekonomıkalyq kolledji onyń júz jyldyq mereıtoıyna oraı is-sharalar uıym­dastyryp jatyr. Almaty qalasynda Naýryzbaı batyr kóshesindegi ózi turǵan úıge eskertkish taqta ornatylǵan. 2006 jyly onyń týǵan aýyly – Qaınarda Rymbek meshiti ashyldy. Bul meshittiń ashylýynda ol kisiniń artynda qalǵan jan-jary Maǵrıpa Smaǵulqyzynyń, balalarynyń eńbegi zor. Endi sol jóninde azyraq sóz etpekshimiz.

Maǵrıpa Smaǵulqyzy da tekti áýlet­ten shyqqan, kópbalaly otbasynyń ken­jesi bolatyn. Aýyldan Semeı qalasyna bilim qýyp kelip, muǵalimder daıarlaıtyn eki jyldyq ýchılısheni bitiredi. О́mirlik jary Rymbekpen de Semeıde bas qosyp, qıyndyǵy men qyzyǵy aralas ómir keshti. 10 balany dúnıege ákeldi, ıadro­lyq polıgon zardabynan erte qaıt­qan beseýinen basqasyn tárbıelep ósirdi.

Jasynan ıbaly qyz, ınabatty kelin, abzal ana bola bilgen Maǵrıpa áje bertin kele din jolyna bet buryp, Mekke-Má­dınaǵa jeti ret qajylyq paryzyn atqa­ryp qaıtty. Kúndelikti ómirde de ıman­dylyqtyń, meıirimdiliktiń úlgisi bola bildi. Bul otbasymen 1991 jyldan beri tanystyǵym bar bolǵandyqtan, ózim de kýálik ete alamyn. Stýdent ke­zi­miz­de Meıirbek aǵam ekeýimiz Ma­ǵrıpa (Ma­qysh) apanyń nemere aǵasy Dáýit Ken­je­ulynyń Almatynyń qaq orta­syndaǵy pá­terinde panalap júrdik. Meniń anam ata jaǵynan alǵanda Maqysh apaǵa sińli bolyp keledi. Sondyqtan bolar Al­ma­tyǵa kelgen saıyn áke-sheshemdi úıine shaqyryp, dám tatqyzatyn edi.

Maqysh apanyń da, Rymbek aǵanyń da týyp-ósken jeri – Abyraly óńiri. Se­meı polıgonynyń ashylýy saldarynan 1954 jyly taratylyp ketken, tarıhy mol óńirdiń ortalyǵy Qaınarda 2006 jyly úlken bir meshit qurylysy aıaqtaldy. Ony Maǵrıpa Smaǵulqyzy óz balalarynyń demeýshiligimen salǵyzyp, «Rymbek meshiti» dep atap, halyqqa teńdessiz syılyq jasady. Ondaı sapaly, birtutas keshen túrinde salynǵan meshitti úlken qalalardyń ózinde kezdestirý qıyn. Dinı oqýdy bitirip, 1996 jyldan beri osy óńirde ımam qyzmetin atqaryp júrgen Talǵat qajy Semeıǵazyuly Rymbek meshi­tinde ımamdyǵyn jalǵastyrdy.

О́mirge kelgenine 100 jyl tolǵan Rym­bek Smaqulynyń, onyń budan bir jyl buryn dúnıe salǵan zaıyby Maǵrıpa Sma­ǵulqyzynyń jarqyn beıneleri el ja­dynan umytylmaq emes.

 

Qaıyrbek ShAǴYR,

Jazýshylar odaǵynyń múshesi

 

Halqym dep ǵumyr keshken

Abyz ana Maqysh qajy Smaǵulqyzy Baı­seıitova 1928 jylǵy 10 qyrkúıekte burynǵy Semeı oblysy Abyraly aýda­nynyń Kıikqashqan-Toqtamys batyr aýylynda dúnıege kelgen. Ata-tegine kelsek, Qazybek bıdi dúnıege ákelgen Qarakesek rýynan taraǵan Qydyraly atasy. Arǵy atasy Mashtaqtyń Smaǵul, Kenje degen balalary bolǵan.

Smaǵul atamyz – óz qaramaǵyndaǵy halyqtyń jaǵdaıyn jasaǵan, eliniń eleýli azamaty bolǵan jan. On saýsaǵynan óner tamǵan, aǵashtan jabdyq, temirden túıin túıgen usta adam bolypty. Inisi Ken­je de otar-otar qoı ustaǵan aýqatty kisi bolǵan eken. Eki aǵaıyndy atalarymyz sol zamanda eliniń qamqory bolǵan abzal azamattar edi desedi.

Maqysh tátemizdiń anasy Kúlshim Rah­manqyzy apamyz da halqyna syıly, ulaǵatty ana bolǵan, abysyny Hadısha apa ekeýi eki otbasy bir úıde tatý-tátti ómir súrgen. Balalary Maqysh, Dáýitti sol kezde Semeı qalasyndaǵy apaılary Sátıma, Bátımanyń qoldaryna oqýǵa ji­ber­gen. Bala Dáýit agronom oqýyna, qyz bala Maqysh muǵalimdik oqýǵa túsip oqı­dy. Surapyl soǵystyń bitken kezi, 1946-1947 jyldar. Sol kezde soǵystan aman oralǵan jas jigit, jaýynger Rymbek Baı­seıitov aǵamyz da qarjy-salyq salasynda qyzmet etip júrgen eken. Boıjetken qyz Maqysh apaımen tanysyp otbasyn quryp, ǵumyrlyq jar, adal shańyraq bolǵan. Rymbek aǵamyzdyń ákesi Smaq ata Jalyqpas urpaǵy, belgili balýan bolǵan eken. Smaq balýannyń jambasy jerge tımegen dep halyq ańyz etip aıtatyn edi. Anasy Kájeı apaı qataldaý bolǵan eken. Qaryndasy Bátish apaı bolǵan edi.

Rymbek Baıseıitov Otanyn, halqyn súıgen aqyldy, oıshyl, adal, abzal aza­mat bolǵan. Qazaqtyń mańdaıyna bit­ken bir­týar tulǵa desek, artyq emes. Semeı oblysynda eseli eńbegimen kózge túsip, Almatyǵa, Qazaq KSR Qarjy mınıs­tr­ligine shaqyrtý alady. Jas otbasy Rym­bek aǵaı men Maqysh apaı ekeýi Almatyǵa qonys aýdaryp, Rymbek aǵa mınıstrlikte qyzmet ete bastaıdy.

Almaty qalasynda jas otbasynyń ǵumyrdarııa ómiri bastalady. 1952 jyly Sholpan esimdi qyzdary dúnıege keledi. Aǵamyz óziniń qyzmettegi orasan zor eń­begi­men, adaldyǵymen, biliktiligimen Qa­zaq KSR Qarjy mınıstri qyzmetine deıin kóteriledi. Al ardaqty asyl ana Maqysh apamyz úı tirligimen, balalarǵa durys tárbıe berý isimen aınalysady. Oqýlarynyń nátıjeli bolýyn birinshi jolǵa qoıǵan ata-analar – osy kisiler. Bul turǵyda «Tárbıe – tal besikten», «Uıa­da ne kórseń, ushqanda sony ilesiń», dep hal­qymyz beker aıtpaǵan eken.

Sholpan óte aqyldy alǵyr qyz bolyp, joǵary oqýyn oıdaǵydaı aıaqtap, adal eńbek sińirgen halqynyń qyzy, úlgili otana boldy, jubaıynyń aty – Ǵabdynasyr. Aıman da joǵary oqý ornyn támamdap, bank salasynda laýazymdy qyzmet at­qarǵan. Otbasyly, jubaıy – Qulaqsý.

Baqytbek Rymbekuly – Máskeý qala­synda bilim alǵan, bala kúninen alǵyr, aqyldy, aq nıet, óz isine myqty aza­mat. Kezinde Baqytbekke Máskeýde qyz­met etýge usynys jasalǵan. Biraq óz eline eńbek sińirgisi kelgen jas maman Qa­zaq­stannyń Ulttyq bankinde qyzmet at­qarýdy uıǵarǵan. Osylaı týǵan eline qyzmet ete júrip, Otanynyń damýyna úles qosqan, Qazaqstanda birinshi kooperatıv bankin ashqan. Kooperatıv bankin damytyp, órkendete otyryp, ony «Bank SentrKredıt» dárejesine kóterdi. Ár qazaq úshin qýanyshty jaǵdaı, Otanyna adal eńbektiń dáleli.

Osy jerde Baqytbektiń jan joldasy Lena Ádilhanqyzy Zyqaeva jaıly aıtpaı ketýge bolmaıdy. Lenanyń ata-anasy – Ádilhan aǵaı, Qalıma apaı aǵartý salasynda qyzmet etken parasatty jandar. Búginde Baqytbek pen Lenanyń altyndaı balapan tátti nemereleri bar.

Muratbek úıdiń kenjesi edi, aqyldy, aq júrek parasatty jan bolǵan. Zaıyby – Quralaı. Meıirimdi jandar. Quralaıdyń ata-anasy – Ákimbek pen Klara.

Ár otbasynda bir erekshe jan bolady. Saq­tandyrý salasynda qyzmet atqarǵan Roza – sondaı erekshe tulǵa. Jubaıy Súıin­dik qajy ómirden ozdy. Roza – anasy Maqysh apaıdyń úlgisimen bala tár­bıesin birinshi orynǵa qoıǵan baqytty áje. «Ákege qarap ul óser, sheshege qarap qyz óser» degen sózdiń dáleli osy sha­ńyraq. Kenje qyzy Roza apamyzdyń or­nyndaǵy altyn qazyq bolyp otyr.

Abyz ana Maqysh apaıymyz – 7 ret qajylyqqa barǵan akpar qajy. Mekkege elimizdiń Quran kitabyn aparǵan. Elim-jerim, halqym aman bolsyn deıtin tilekshi, baýyrmal, asyldyń tuıaǵy akpar qajy, asyl ana Maqysh apaıymyz oılana kelip, balalarymen aqyldasa otyryp, 2005-2006 jyldary Semeı ob­lysynyń Abyraly óńirindegi Qaınar aýylynda úlken meshit saldyrdy. Eldiń hal-jaǵdaıyn oılaı otyryp, saýap úshin dep meshit janynan qatymhana, Quran-as beretin dámhana saldyrdy. Osy meshitti salǵanda qurylys, joba jumystaryna atsalysqan jıenimiz – Aıaǵan Tańatuly. Sátıma apamyzdyń nemeresi.

Qazaq eline eńbegi sińgen jan jary Rymbek aǵaı máńgilik mekenine ketkende aqyldy asyl ana din jolyn tań­dap, balalaryma, halqyma tilekshi bola­myn dep edi. Iá, Maqysh apa 7 ret qa­jy­lyqqa bardy. Mekke-Mádınaǵa eli­mizdiń Quran kitabyn aparyp qoıdy. 2009 jyly balalarynyń qoldaýymen, demeýshiligimen Quran Kárimniń arabsha oqylýymen birge qazaqsha aýdarmasy da berilgen kóptomdyq kitabyn basyp shy­ǵartyp, halyqqa tegin taratqyzdy. Mun­daı qyzmet – Alla taǵalanyń aldynda týǵan elge taǵzym, halqyna qurmet, erekshe sezim. Árıne, Rymbek aǵamyz ómir­den erte ketkende Maqysh apaıdyń óziniń mundaı is-shara jasaýy – Rymbek aǵa­myzdyń rýhy úshin, bala-shaǵalary úshin ǵumyrlyq saýap.

Rymbek aǵa men Maqysh qajy apamyz halqym dep ǵumyr keshken sharapatty jandar ekeni kópke aıan. Olar aýyrǵanǵa em izdep, jetimderdi jebegen asyl jandar bolǵan. Qaı ýaqytta bolsyn, kim kelse de esikteri aıqara ashyq, qazany qaı­naýly, úı ishi qonaqtan úzilmeıdi eken. Mınıstr­diń úıi dep eshkim oılanbaı, týma-týys tanystar emin-erkin jaılap jatyp, razy bolyp ketetin. Tipti syrtqy esikteri jabylmaıtyn edi. Qansha qazaq jastary osy kisilerden úlgi alyp, jetistikterge jetti. Meniń ekinshi anamdaı boldy asyl apam. Iá, ómir joly jarqyn bolǵan aıaýly da ardaqty ana Maqysh qajy apamyz búginde ortamyzdan máńgi mekenine ketkeni bári­mizdi muńaıtady. Apamyzdyń ákesi Sma­ǵul tipti jas ketti, anasy Kúlshim 100 jasaǵan jan edi.

О́mir bir qalypta turmaıdy, bir kúni qolyn bulǵaıdy degendeı, osy otba­synyń tuńǵyshy Sholpan birneshe jyl buryn kenetten kóz jumyp, máńgilik mekenine attandy. Arada jyl ótkende kenje uly Murat jaryq dúnıemen qosh­tasty. Taǵdyr degen osy. Eshkim qarsy tura almaıdy. O dúnıege de jaqsy adam kerek shyǵar. Osyndaı qaıǵyly mezetter ana úshin qatty soqqy, óte aýyr jaǵdaı ekeni anyq. Ana júregi bala dep soǵady. Qansha jerden qaısarlyq tanytsa da, 94 jasqa qaraǵan shaǵynda abyz apamyz Maqysh qajynyń máńgilik mekenine ketkenine búginde 1 jyl toldy. Janyńyz jannatta, ǵamal dápterińiz oń jaǵyńyzda bolsyn. Shamshyraǵyńyz máńgi jaryq bolsyn. Artynda qalǵan bala-shaǵa, neme­re-shóberelerine, ja­qyn­­daryna Alla ba­qytty uzaq ǵumyr ber­sin. Elimiz­diń ir­gesi aman bolsyn. Ar­tynda bar ońalar degen osy. Balalary ata-anaǵa qurmet kór­se­tip, aýqymdy as berip jatyr. Saýap­tan bolsyn.

 

Nemere sińlisi –

Bota Dáýitqyzy KENJINA

 

Qaıran asyl aǵam, altyn jeńgem!

Rymbek Smaqulynyń myna fánı dúnıeniń esigin ashqanyna bir ǵasyrdyń júzi bolǵan eken. Aıaýly aǵamyzdyń jarqyn beınesin kórmegeli de otyz jyldan jáne asyp ketti. Osynaý qaıratker tulǵany eske ala otyryp, onyń ómirge kelgen sátterine úńilýden bastaıyqshy...

1922 jyldyń kúzinde túzden eki birdeı quljany atyp alyp, qanjyǵasyna óńgerip oljaly oralǵan Smaq balýannyń aldynan áıelder súıinshi surap shyǵypty. «Súıinshi, Kájeı ul tapty!». Ári seri, ári mergen jigit Smaq osy jaǵdaıdy yrym etip, balamnyń yrys-nesibesi mol bolady eken dep, atyn Rymbek dep qoıady. Smaq balýannyń ózi Bórili bolysynyń qazaǵy, rýy – qarakesek ishinde jalyqpas. As pen toıda balýan ataýlyny shaq keltirmeı jeńetin kúsh ıesi ekeni óz aldyna, ánshiligi men kúıshiligi de bir basyna jeterlik bolypty. Ol sonaý dala serileriniń dáý­reni júrip turǵan kezi edi ǵoı. Sol kúnderdiń kýáleriniń biri, ózi de ónerpaz ári qalamger bolǵan Muqataı Toqjigitov Smaq balýan týraly derekti týyndylar jazyp, jarııalaǵan bolatyn. Altyn jeńgemiz, Rymbek aǵanyń jary Maǵrıpa Sma­ǵulqyzy ózi jazǵan esteliginde naǵa­shylarynan estigen áńgimesi boıynsha: «Smaq seriniń eli Abyraly aýdanynyń jerindegi Myrjyq taýynda, Bórlitóbe bókterinde qonystanǵan. Jaılaýlary – Degeleń jazyǵy men Myrjyq taýynyń qaptaldary. Rymbek sol óńirde dúnıege kelgen. Al 8-9 jasqa deıingi balalyq shaǵy Qaınar men Bóriliniń ortasynda ótti» degenin jazady. Osyndaı ortadan ónege alǵan Rymbek Smaquly jasynan ójet, eńbekqor bala bolyp ósedi. Neshe túrli oqys oqıǵalarǵa da ushyrap, Allanyń qalaýymen, áke-shesheniń duǵa-tilegimen aman qalyp júredi.

Qan maıdanda erlikpen shaıqasyp, elge aman-esen qýanyshpen oralǵan Rym­bek Smaquly ákesiniń úsh jyl buryn ómirden ótip ketkenin sol kezde ǵana estip, ah urady. О́mirdiń ashy-tushysyn kóp tartqan azamat qyzmet satysymen órlegen jyldarynda da astamsyp ketpeı, tektiligin tanytyp, aınalasyna meıirim nuryn shashyp júretin edi. Qazaqty rýǵa, júzge bólmeı, bárine birdeı qarap, jaq­syda jattyq joq ekenin kórsete biletin. Biri aǵa tutyp, biri ini dep barǵan abyralylyqtarǵa degen qamqorlyǵy men peıili de bólek. О́ıtkeni Maqysh jeńgemiz jazyp ketkendeı, «Rekeńniń kókirek túkpirinde túıin bolǵan armany – týǵan jeri, ataqonysy – Degeleń, Myrjyq taýy, Bórilitóbe bókterinde atom tajalynyń 42 jyl boıǵy oınaǵy buǵa­lyqtanǵanyn kóre almaı ketti. Atamekende atom synaǵyn jasaıtyn polı­gonnyń ornalasýy kimge ońaı tıedi deısiń. Rekeń osy jaǵdaıdy eske alǵan­da ishqusa bolyp, ishten tyna qatty qapa­lanatyn».

О́mir súrgen zamany qatal tártipke negizdelgen keńester odaǵyna týra kelse de, Rymbek Baıseıitov Máskeýdiń ózi­ne baryp, oılaryn ashyq aıtyp, eli­mizge qajetti qarjy máselelerin batyl sheship keletin edi. Onyń zamandasy, Úkimet basshysy bolǵan Báıken Áshimov: «Ekonomıkanyń jappaı órkendeýi qarjyǵa baılanysty bolatyndyqtan, respýblıkamyzdyń osy jaýapty meke­mesin basqarǵan Rymbek Smaquly eli­mizdiń sol jyldary qarqyndy da nátı­jeli damýyna zor úles qosqan memleket qaıratkeri bolǵandyǵyn eshkim joq­qa shyǵara almaıdy» degen bolatyn esteliginde. Basqa da áriptesteri ol kisiniń óz isine uqypty, sózbuıdalyqqa salmaıtyn, istiń jaıyn birden baıqap, der kezinde sheshim qabyldaıtyn isker de bilikti jan bolǵanyn erekshe atap ótedi. Munyń shet jaǵasyn biz de jıi baıqap júretin edik. Rymbek Smaqulynyń qamqorlyǵy aıasynda ósip-jetildik.

Sózimdi taǵy bir memleket qaıratkeri Roza Esenjolovanyń esteligindegi: «Úı ishiniń berekesi de, uıytqysy da áıel adam ǵoı. Rymbek aǵanyń baqytynyń bir sheti, jan joldasy bola bilgen Maqańa baılanysty. Maqań aǵanyń dostaryn kóbeıtýge, týystaryn alasartpaýǵa, balalaryna jan ana bolýǵa, ózin ómir boıy syılap ótýge úlken jumys istedi» degen pikirimen tujyrymdaı otyryp, jandaryńyz jannatta bolsyn asyl aǵa, altyn jeńge, – degim keledi.

Tóleýbek Musataıuly Musataev

 

Almaty

Sońǵy jańalyqtar

Almaty mańynda jer silkindi

Aımaqtar • Keshe

Uqsas jańalyqtar