Reseılikterdiń shekaradan irkes-tirkes ótkenin О́skemendegi halyqqa qyzmet kórsetý ortalyqtaryndaǵy uzyn-sonar kezekten baıqaýǵa bolady. Biraq Reseı azamattary úshin arnaıy bir tereze qyzmet kórsetip tur. Bardyq, kórdik, shekara asyp kelgen azamattarmen tildestik. Alaıda HQO basshylary qandaı da málimet berýden bas tartty.
Alǵashynda kezekte turǵan azamattar jýrnalıstermen sóılesýge nıet bildire qoımaǵan. Árıne, soǵystan qashyp, shekara asyp ketken soń erteńgi kúni suraýy bar dep qaýiptenetin shyǵar, kim bilsin?! Dese de, ishterinen sýyrylyp shyǵyp, óz oılaryn ashyq aıtqandar, soǵysqa qarsylyqtaryn bildirgender de boldy. О́zderi qashyp júrgenimen, Reseı basshylyǵynyń saıasatyna syrttaı qoldaý bildirgenderdi de qulaǵymyz shaldy.
– Bizdi qashyp keldi dep aıyptap jatqandardy bilemiz. Biraq mynany túsinse eken deımin; biz Otandy tastap qashyp kelgen joqpyz. Biraq bul qaqtyǵysqa qatysqymyz kelmeıdi. Qarańyz, kezekte turǵan anaý jastar qoldaryna qarý ustap kórmegen. Erteń soǵysqa kirse, óledi de qalady. Eger, Otanǵa qaýip tónse, áńgime basqa, – deıdi Ivan Gavrılov.
Kópshiligi pikir bildirgenimen, aty-jónderin jazbaýyn surady. Al Máskeýden Novosibirge ushyp, odan О́skemenge taban tiregen I.Gavrılov oıyn ashyq aıtyp qana qoıǵan joq, tarıhtan oraǵytyp kelip, saıasatty da taldap berdi. Onyń oıynsha, bul soǵysta bolyp jatqan ádiletsiz áreketter kóp. Elge keregi – beıbit ómir, turaqtylyq.
– Shynymdy aıtsam, О́skemen degen qalanyń baryn bilmeppin. Jarlyq shyǵa sala ushaqqa bılet aldym. Bylaısha aıtqanda, basym aýǵan jaqqa ketýim kerek boldy. Eń bastysy, soǵysqa barmasam dep oıladym. Sóıtip, Novosibirge ushyp keldim. Odan avtobýsqa minip, О́skemenge tarttym. Jolym boldy. Avtobeketten О́skemenge degen sońǵy bılet maǵan buıyrypty, – deıdi oıyn búkpesiz jetkizgen Ivan Gavrılov.
Al Novosibir qalasynyń turǵyndary Kırıll men Oksana mobılızasııalaý týraly jarlyq shyqqan soń artynyp-tartynyp, jeke kólikterimen О́skemendi betke alǵan. Olar da Otanyn amalsyz tastaǵan. Soǵys oty sónse, keri qaıtýymyz múmkin desedi.
– Eger Otanyma qaýip tónse, birinshi ólýge ázirmin. Al dál qazirgi jaǵdaıda ne úshin soǵysqanyńdy, ne úshin ólip qalǵanyńdy bilmeısiń ǵoı. Keıin, eldegi jaǵdaı tynyshtalsa qaıtyp oralamyz, – dep túsindirdi Kırıll.
Iá, reseılik azamattardyń keıbireýi jaǵdaı turaqtalsa, oralatyndaryn ashyq aıtty, endi biri Eýropa elderine baryp turaqtaımyz dep kese sóıledi.
Halyqqa qyzmet kórsetý ortalyǵynda túske qaraı reseılikterdiń qarasy kóbeıe berdi. Mobılızasııalaý týraly jarlyq shyqqaly qansha azamat Shyǵys Qazaqstanǵa ótti degen suraqqa kóshi-qon polısııasy qyzmetkerleri basshylyǵynyń kelisiminsiz jaýap berýden úzildi-kesildi bas tartty. Polısııa departamentiniń baspasóz qyzmeti de atalǵan suraqqa jedel jaýap bere qoıǵan joq, jan-jaqty oılanyp baryp jaýap joldaǵan sııaqty. Departament málimetine súıensek, «Úbi Avto» shekara beketi men «О́skemen» áýejaıy arqyly 8 629 sheteldik azamat kelgen. Olardyń 5 935-i Reseı azamattary. Bul – 28 qyrkúıekke deıingi derek.
Sonymen qatar oblys aýmaǵynda 684 jaldamaly páter tirkelse, onda Reseı Federasııasynyń 11 azamaty turyp jatyr. Oblystyń qonaqúılerine 458 reseılik azamat ornalasqan. Onyń 28-i Shemonaıha aýdanynda, 67-si Rıdderde, 363-i О́skemenniń qonaqúılerinen oryn tapqan.
Tarqatyp aıtsaq, dál qazirgi ýaqytta Reseı Federasııasynan 8 450 adam oblys aýmaǵynda turyp jatyr. 4 972 azamat oblysta turaqty turady. Al 1 737 reseılik ýaqytsha turaqtaǵan. Qalǵan 1 741-i habarlama boıynsha. Polısııa departamentiniń UQK shekara qyzmetiniń aqparatyna súıene otyryp, joldaǵan statıstıkalyq derekteri osy.
Qujynaǵan sıfr óz aldyna, osynshama reseılik azamattardyń kelýi – páter baǵasynyń ósýine ákelip soqty. Iá, baǵa sharyqtady. Habarlandyrý saıttaryn paraqtap otyrsaq, eki bólmeli páteraqynyń baǵasy 400 myń teńgege deıin jetken. Aıyna 400 myń teńgeni ár óskemendik aǵaıynnyń qaltasy kótermeıdi.
– Reseı men Ýkraınanyń arasyndaǵy jaǵdaı kimdi bolsyn alańdatyp otyr. Al elimizge kelip jatqan Reseıdiń azamattaryna shekteý qoıa almaımyz. Kerisinshe, Prezıdent Qasym-Jomart Toqaev aıtyp ótkendeı, qamqorlyq kórsetýimiz kerek. Bizge keregi – bereke-birlik. Tek, páteraqynyń negizsiz qymbattap jatqanyna toqtaý salýymyz kerek. Áıtpese, páterden páterge kóship júrgen jas otbasylar úshin qıyn. Jataqhanaǵa syımaı qalǵan stýdentter qansha?! – deıdi saıasattanýshy, qoǵam belsendisi Ádil Saılaýbek.
Shyǵys Qazaqstan oblysy
