Jaz maýsymynda TJD qyzmetkerleri 14 adamdy, onyń ishinde 2 balany sýdan qutqarǵan. Qutqarýshylar jergilikti atqarýshy organdary, polısııa, volonterlik uıymdarmen birlesip kún saıyn reıd ótkizdi. Uzyn sany 2 340 reıd júrgizilip, 304 eskertý jáne tyıym salý belgisi, 130 kórneki stend ornatylǵan. Demalýshylardyń qaýipsizdigin qamtamasyz etý boıynsha patrýldeý úshin Samar aýdanynda Kúrshim aýylynda jáne Kógildir buǵaz jaǵalaýynda mobıldi beketter jumys istedi. Sondaı-aq О́skemen qalasynyń aýmaǵyna qutqarýshylardyń jyljymaly beketteri qoıyldy.
Oblystyq TJD Azamattyq qorǵanys basqarmasynyń basshysy Rýslan Orynbekovtiń málimetinshe, jaz mezgilinde sý aıdyndarynda 7 adam sýǵa batyp ketken.
– Statıstıka kórsetip otyrǵandaı, kóp jaǵdaıda qaıǵyly oqıǵa adamnyń shamadan tys ózine degen senimdiliktiń, kúshin asyra baǵalaýdyń, sýdaǵy júris-turys erejelerin eskermeýdiń, tyıym salynǵan jáne tekserilmegen jerlerde shomylýdyń, mas kúıde bolýdyń saldarynan oryn alǵan. Sýǵa batqandardyń barlyǵy 18-46 jas aralyǵyndaǵy er adamdar, – deıdi R.Orynbekov.
Jasalǵan saraptamalyq is-qaǵazdaryna úńilsek, oqys oqıǵalar negizinen demalys kúnderi tirkelgen. Jeti ólimniń ekeýi Ulan aýdanyndaǵy kólderde bolǵan. Al shomylý maýsymy bastalǵaly kópshilik demalatyn oryndarda 189 quqyq buzýshylyq anyqtaldy: ortaq sý paıdalaný qaǵıdalaryn buzý boıynsha – 80 adam, alkogoldik ishimdik iship, qoǵamdyq oryndarda mas kúıde júrgen 75 demalýshy jaýapqa tartyldy.
Jaýapqa tartylady, eskertý jasalady. Alaıda kelesi jyly dál osy oqıǵalar qaıtalanbasyna kim kepil?! Nege biz osy, qarapaıym erejeni eskere bermeımiz?!
Shyǵys Qazaqstan oblysy
