«AMANAT»-tyń jańa saıası tuǵyrnamasy qabyldandy

Partııa Tóraǵasy Erlan Qoshanov búgin qabyldanǵan «AMANAT»-tyń saıası tuǵyrnamasy uzaq merzimdi jáne strategııalyq qujat ekenin atap ótti.

«Jalpy, búgingi Sezdi tarıhı dep aıtýǵa tolyq negiz bar. Biz partııanyń jańa Saıası tuǵyrnamasyn qabyldadyq. Tuǵyrnamanyń basty qaǵıdasy – Adam, Qoǵam jáne Memleket. Ondaǵy prınsıpter Prezıdentimizdiń saıası reformalarymen úndes ári sabaqtas. Partııa aldaǵy qyzmetinde osy ustanymdardy basshylyqqa alady», dedi Erlan Qoshanov.

О́z kezeginde saıası tuǵyrnamany ázirleý jónindegi jumys tobynyń jetekshisi, «AMANAT» partııasynan saılanǵan Májilis depýtaty Aıdos Sarym bul qujatta partııa Qazaqstannyń bolashaǵy týraly ıdeıasyn aıqyn kórsetip, óziniń nıeti men maqsattaryn belgilegenin atap ótti.

«Barlyq óńirden usynystar jınaý jáne áleýmettik saýalnamalar júrgizý arqyly partııanyń árbir múshesine qujatqa qatysty óz pikirin aıtýǵa múmkindik berildi. Sonyń nátıjesi retinde partııanyń jańa qujaty qoǵamymyzdyń ártúrli toptarynyń kózqarastary men múddelerin kórsetedi. Basqasha bolýy múmkin de emes, óıtkeni «AMANAT» partııasy – Qazaqstandaǵy eń myqty qoǵamdyq ınstıtýt», dedi halyq qalaýlysy.

«AMANAT» partııasynan Májilis depýtaty Ekaterına Smyshlıaeva óz sózinde tuǵyrnamada usynylǵan tásilder sapaly turaqty ekonomıkalyq ósýdi qamtamasyz etip qana qoımaı, Qazaqstannyń árbir azamatynyń onyń ıgiligin kórýine múmkindik beretinin atap ótti.

«Partııanyń prınsıpti ustanymy – munaıdyń árbir tamshysy, kenniń árbir gramy, jerdiń árbir santımetri eseptelip, azamattarymyzdyń ıgiligi úshin jumsalýy kerek! Jer qoınaýynan túsetin kirister otandyq ekonomıka salalaryn damytýdyń bazasy bolýǵa tıis. Jer qoınaýyn paıdalanýshylar salyq tóleýden bólek, sapaly jumys oryndaryn qurýǵa, bizdegi orta jáne shaǵyn bıznestiń sharýasyn dóńgeletýge, tikeleı ózderi jumys isteıtin óńirlerdi damytýǵa qatysýy qajet», dep atap ótti depýtat.

Partııanyń Soltústik Qazaqstan oblystyq fılıalynyń atqarýshy hatshysy Ásem Rahmetovanyń aıtýynsha, aýyl eldiń altyn besigi bolsa, aýyl sharýashylyǵy – Qazaqstan ekonomıkasynyń kúre tamyry.

«Aýyl sharýashylyǵy salasy Qazaqstannyń azyq-túlik qaýipsizdigin tikeleı qamtamasyz etip otyr. Sondyqtan «AMANAT» memleketiń strategııalyq maqsatyn túsinip, aýyldyń ál-aýqatyn arttyrý mindetin qoıdy. Sharýashylyqtar ekonomıkalyq jaǵynan qýatty bolsa, aýyldyqtardyń turmysy da táýir bolmaq. О́ıtkeni tek kúshti ekonomıka ǵana aýyldy qoldaýǵa, áleýmettik máselelerdi sheshýge múmkindik beredi», dedi ol.

M.О́temisov atyndaǵy Batys Qazaqstan memlekettik ýnıversıtetiniń rektory, partııa Saıası keńesiniń múshesi Nurlan Serǵalıev qujatta bilim men ǵylym erekshe oryn alatynyn atap ótti.

«Úlken qarqynmen ózgerip jatqan qazirgi álemde bilim berý salasy da ózgerissiz qalýy múmkin emes. Naqty anyqtalǵan maqsat – ozyq oıly, tyń ıdeıalarǵa ashyq, erkin oılaıtyn jáne kreatıvti azamattardy tárbıeleý úshin keshendi júıeli ózgerister qajet. Biz mektepterdiń, jataqhanalardyń jetispeýshiligi jáne bilim berý nysandaryn materıaldyq-tehnıkalyq jaraqtandyrý problemalaryn júıeli túrde sheshýge tıispiz. Sondaı-aq jastardy ǵylymǵa tartý jáne olardyń damýyna jaǵdaı jasaý da óz aldyna bólek másele. Bul – memlekettiń damýy úshin qajetti negizgi alǵysharty», dedi ol.

Belgili saıasattanýshy, partııa Saıası keńesiniń múshesi Marat Shıbutovtyń pikirinshe, jańa saıası tuǵyrnama «Adam – memlekettiń basty baılyǵy» ıdeıasyna negizdelgen.

«Bul tásil Ádiletti Qazaqstandy qurý ıdeıasyna sáıkes keledi. Qujatta baıqalǵandaı partııa «Halyq únine qulaq asatyn memleket» qaǵıdatyn naqty ustanady. Partııanyń maqsaty – azamattyń quqyqtary men múddeleri qorǵalatyn, al adal eńbek pen bilim ár adamǵa óz josparlaryn júzege asyrýǵa jáne jetistikke jetýge múmkindik beretin demokratııalyq, ádiletti jáne órkendegen memleket qurý. Adamdar úshin otbasy, densaýlyq, bilim, jumys istep laıyqty tabys tabý, qaýipsizdik mańyzdy», dedi ol.

Sezd sońynda partııa Tóraǵasy Erlan Qoshanov forým ótetinin habarlady. Onda elimizdiń progressıvti qoǵamdyq-saıası kúshteri Qasym-Jomart Toqaevty qoldaý jónindegi koalısııaǵa birigedi.

Eske sala keteıik, búgin Astanada «AMANAT» partııasynyń kezekten tys XXIV sezi ótti. Is-sharaǵa 1200-den astam adam qatysty. Olardyń qatarynda Saıası keńestiń músheleri, Parlament depýtattary, óńirlerden kelgen 700 delegat, sondaı-aq sarapshylar, úkimettik emes uıymdardyń ókilderi jáne t.b. bar.