Eńbek jáne halyqty áleýmettik qorǵaý mınıstri Tamara Dúısenova sońǵy jyldary qazaqstandyq eńbek naryǵynda jumys kúshi óskenin aıtty. Máselen, 2016-2020 jyldary bul kórsetkish orta eseppen 36,4 myń adamdy qurasa, 2021 jyly 76 myńǵa jetti. Bul jaǵdaı, eń aldymen, 2000-shy jyldardan bastap dúnıege kelgen jastardyń eńbek naryǵyna qosylýyna baılanysty bolyp otyr.
Qazirgi ýaqytta jumyspen qamtýdy keńeıtý jáne jańa jumys oryndaryn qurýdy yntalandyrý jónindegi jumys Ulttyq jobalar men basqa da memlekettik baǵdarlamalar sheńberinde júrgizilip jatyr. Atap aıtqanda, kásipkerlikti damytý boıynsha Ulttyq jobalar, «Qýatty óńirler – el damýynyń draıveri» jáne AО́K damytý boıynsha Ulttyq jobalary oń nátıje kórsetip keledi. Budan basqa, barlyq óńirler Memleket basshynyń 10 myń adamǵa 100 jumys ornyn qurý jónindegi tapsyrmasyn iske asyrý sheńberinde jospardy asyra oryndady.
Bıyl 1 qazandaǵy jaǵdaı boıynsha 654 myńǵa jýyq adam jumysqa ornalasty. Barlyq belsendi Ulttyq jobalar sıfrlandyryldy, elektrondyq eńbek bırjasynda ornalastyrylǵan bos jumys oryndaryn toltyrý deńgeıi 87%-dy quraıdy.
Aldaǵy jyldary eńbek naryǵyn qoldaý úshin Otbasynyń sıfrlyq kartasyn paıdalana otyryp, jumyspen qamtý salasynda belsendi qyzmetter kórsetýge jáne jyl saıyn keminde 100 myń jasty oqytý, jumysqa ornalastyrý jáne óz isin ashý úshin memlekettik qoldaý sharalarymen qamtý josparlanǵan.
Atalǵan salada Ulttyq ekonomıka mınıstri Álibek Qýantyrov, Almaty oblysynyń ákimi Marat Sultanǵazıev, Qyzylorda oblysynyń ákimi Nurlybek Nálibaev jáne Soltústik Qazaqstan oblysynyń ákimi Qumar Aqsaqalov baıandama jasady.
Premer-Mınıstr Memleket basshysy Qasym-Jomart Toqaevtyń tapsyrmasy boıynsha memlekettik organdar men barlyq deńgeıdegi ákimderdiń jumysy jańa jumys oryndaryn qurý boıynsha kórsetkish negizinde baǵalanatynyn atap ótti.
«Eńbek naryǵynda qandaı mamandyqqa suranys kóp, soǵan sáıkes jumys júrgizý qajet. Asa mańyzdy másele – halyqtyń áleýmettik osal toptaryn jumyspen qamtý», dedi Álıhan Smaıylov.
Onyń aıtýynsha, bıyl Ulttyq jobalardy iske asyrý sheńberinde 269 myńnan astam jumys orny qurylýy tıis. Qazirgi ýaqytta 203 myńnan astam adam jumysqa ornalasty. Biraq olardyń 175 myńy – ýaqytsha jumys.
«Biz turaqty jumys oryndaryn kóbeıtýge kúsh salýymyz kerek. Ol úshin sıfrlyq tehnologııalarǵa súıený mańyzdy. Memlekettik organdardyń júıelerin tolyq ıntegrasııalaı otyryp, jumyspen qamtý servısteriniń barlyǵyn sıfrlandyrý qajet», dedi Premer-Mınıstr .
Sondaı-aq ol Otbasynyń sıfrlyq kartasy, Elektrondyq eńbek bırjasy men Jumys oryndaryn qurýdyń ıntegrasııalanǵan kartasyn biriktirgennen keıin, jumyssyz júrgenderge elektrondyq habarlamalar arqyly vakansııalar usynýǵa bolatynyn aıtty.
«Jumyssyzdarǵa ótinish jazbaı-aq bos jumys oryndaryn usyný mańyzdy. Mundaı qyzmetterdi smartfon arqyly qoljetimdi etý qajet», dedi Álıhan Smaıylov.
Premer-Mınıstrdiń aıtýynsha, jastardy jumyspen qamtýdyń jańa tásilderi men mehanızmderin engizýge erekshe nazar aýdarý kerek. Jyl saıyn eńbek naryǵyna 300 myńǵa jýyq jastar shyǵady. Tıisinshe, olardyń jumys tájirıbesi joq.
Ol birinshi jartyjyldyqtyń qorytyndysy boıynsha Ulytaý, Shyǵys Qazaqstan, Qaraǵandy, Qyzylorda, Jambyl jáne Almaty oblystarynda NEET sanatyndaǵy jastardyń sany kóp ekeni aıtyldy.
«Atalǵan oblystardyń ákimdikteri jastardy oqytyp, jumysqa ornalastyrý máselesin jeke baqylaýǵa alsyn. Jastarǵa jumyspen qamtýǵa járdemdesý sharalary týraly jetkilikti aqparat berilmeıdi. Sondyqtan osy baǵytta aqparattyq-túsindirý jumysyn kúsheıtý qajet», dedi Premer-Mınıstr.
Eńbek jáne halyqty áleýmettik qorǵaý, Sıfrlyq damý, ınnovasııalar jáne aeroǵarysh ónerkásibi mınıstrlikteri men ákimdikterge jumyspen qamtý salasynyń ınfraqurylymyn jańǵyrtýdy qamtamasyz etý jáne jumyspen qamtý ortalyqtarynyń qyzmetin tolyq sıfrlandyrý tapsyryldy.
«Biz jumyspen qamtý ıdeologııasyn, qoǵamdaǵy eńbekke degen kózqarasty ózgertýimiz kerek. Eńbek adamynyń oń ımıdjin, barlyq kásipterdiń qundylyǵyn qalyptastyrý máselelerin pysyqtaý qajet», dedi Álıhan Smaıylov.
