Búgin elordada «Qazaq analary-dástúrge jol» qoǵamdyq birlestiginiń jıyny ótti. Jıyn barysynda birlestik atynan Qazaqstan Respýblıkasy Prezıdenttigine kandıdat bolyp Tursynbekova Saltanat Parhatqyzy usynyldy. Onyń kandıdatýrasyn jıynǵa qatysqan qaýymdastyqtyń 20 múshesi jáne beınebaılanys arqyly qosylǵan 18 uıym múshesi qoldady.
Saltanat Tursynbekova – belgili qoǵam qaıratkeri, Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary. Sońǵy jyldary ol turmystyq zorlyq-zombylyqpen kúres jáne onyń aldyn alýǵa arnalǵan birneshe jobalarǵa jetekshilik etti.
1966 jyly Jambyl oblysynda dúnıege kelgen. Memlekettik qyzmette 30 jyldan astam tájirıbesi bar.
«Qazaq analary-dástúrge jol» qoǵamdyq birlestigi búgin Ortalyq saılaý komıssııasyna Saltanat Tursynbekovanyń qujattaryn tapsyrýdy josparlap otyr.
