Astana prokýratýrasy memlekettik qyzmette qyzmet atqarý quqyǵynan ómir boıyna aıyra otyryp, alty jylǵa bas bostandyǵynan aıyrý túrindegi jaza taǵaıyndaýdy, al jazany óteý rejımin ortasha qaýipsizdiktegi qylmystyq atqarý júıesi mekemesinde taǵaıyndaýdy surady.
«Úı qamaýyna baılanysty E.Birtanovqa qatysty bultartpaý sharasy qamaýda ustaýǵa aýystyrylsyn. Jazany óteý merzimi úkim zańdy kúshine engen kúnnen bastap eseptelsin. E.Birtanovty qamaýda ustaý ýaqyty 2020 jylǵy 30 qazannan 2020 jylǵy 6 qarashaǵa deıin, sondaı-aq úkim shyǵarylǵan kúnnen bastap onyń zańdy kúshine engenine deıin jazany ótegen 1,5 kún úshin qamaýda ustaýdyń 1 kúni esebinen jaza merzimine eseptelsin», dedi prokýror Baýyrjan Shekenov sot otyrysy barysynda.
Sondaı-aq E.Birtanov pen onyń burynǵy orynbasary O.Ábishevten 1 mlrd 548 mln 136 myń 575 teńgeni, oǵan qosa Birtanovtan sanıtarlyq avıasııa bortyn paıdalanýǵa jumsalǵan 5 mln 503 myń 721 teńgeni óndirip alý usynyldy.
Burynǵy Densaýlyq saqtaý mınıstrine QR Qylmystyq kodeksiniń 361-baby tórtinshi bóliginiń úshinshi tarmaǵy boıynsha aıyp taǵyldy.
Qylmystyq is boıynsha aldyn ala tyńdaý 26 qańtarda bastaldy. Burynǵy Densaýlyq saqtaý mınıstri Eljan Birtanov pen vıse-mınıstr Oljas Ábishevke qatysty sotqa deıingi tergeý ótken jyldyń shilde aıynda aıaqtaldy.
Olar Densaýlyq saqtaý mınıstrliginiń jumys istemeıtin aqparattandyrý platformasyn paıdalanýǵa berý arqyly laýazymdyq ókilettikterin asyra paıdalandy dep kúdiktelýde. Platforma Densaýlyq saqtaý júıesindegi máselelerdi jedel sheshý úshin pasıentter, dári-dármekter jáne medısınalyq ónimder týraly barlyq aqparatty biriktirýi kerek edi. Búgingi tańda platforma jumys istemeıdi. Oryndalmaǵan jumystardyń quny 4,1 mln AQSh dollaryn nemese 1,5 mlrd teńgeni quraıdy.
