4-samıtte Shanhaı deklarasııasy qabyldandy

ASTANA. 22 mamyr. Shanhaıda ótken Azııadaǵy ózara is-qımyl jáne senim sharalary keńesiniń 4-sammıtiniń qorytyndy qujaty – Shanhaı deklarasııasy bekitildi. Bul týraly egemen.kz tilshisi habarlady. Atalǵan deklarasııanyń qabyldanǵany samıtti qorytyndylaý baǵytynda ótkizilgen baspasóz máslıhatynda belgili boldy. Oǵan Memleket basshysy Nursultan Nazarbaev, Qytaı halyq respýblıkasynyń tóraǵasy Sı Szınpın men Túrkııa Syrtqy ister mınıstri Ahmet Dáýitoglynyń qatysty. Baspasóz máslıhatynda Nursultan Nazarbaev: «4-sammıttiń basty oqıǵasy Azııadaǵy ózara is-qımyl jáne senim sharalary keńesiniń Shanhaı deklarasııasy qabyldanǵany boldy. Bul qujat forýmdy odan ári damytýǵa jáne qatysýshy elderdiń tıimdi ózara is-qımylyna baǵyttalyp otyr», – dedi. Jıynda Nursultan Nazarbaev Shanhaı sammıtin qazaqstan-qytaı qatynastarynyń shejiresindegi eleýli oqıǵa dep málimdedi. Endi, Azııadaǵy ózara is-qımyl jáne senim sharalary keńesine Qytaı tóraǵalyq etetin boldy. Osyǵan baılanysty Prezıdent: «Qazaqstan Qytaı eliniń bul keńeske tóraǵalyq etýinen úlken úmit kútedi. Tóraǵa Sı Szınpınniń azııalyq qaýipsizdik týraly jańa tujyrymdamasy, Jibek joly ekonomıkalyq beldeýi – óte mańyzdy bastamalar. Ol ár eldiń ıgiligi úshin jumys isteıtin bolady. Qytaıdyń bizdiń jetistikterimizdi odan ári jetildirýge tolyq áleýeti jetetini sózsiz», – dedi. Joldybaı Bazar. Derekkóz: egemen.kz. Foto: «24kz».