Arnaýly kúnniń maqsaty – adamdardy tynys alý aǵzalaryn únemi teksertip otyrýǵa úndeý. Nátıjesinde mundaı bastama ókpede bolatyn dertterdi der kezinde anyqtap, em-dom taǵaıyndaýǵa, onyń ishinde sozylmaly obstrýktıvti ókpe aýrýyn (SOО́A) asqyndyrmaı dıagnostıkalaýǵa yqpal etedi.
Mamandar ókpe teksertip otyrý – ásirese, kásibi zııandy zattardy jutýǵa týra keletin adamdar men temeki shegetinderge qajet ekenin aıtady.
Al spırometrııa ókpe kólemin jáne tynys alý jyldamdyǵyn ólsheıtin, ókpe densaýlyǵyn baǵalaý ádisi. Bul tynys alýdyń barlyq negizgi kórsetkishterin eseptep, tynys alý prosesin kórýge múmkindik beredi.
Ataýly kúnge oraı, Kardıologııa jáne ishki aýrýlar ǴZI Respýblıkalyq allergologııa ortalyǵynyń basshysy, allergolog-ımmýnolog dáriger Araı Batyrbaeva: «Tynys alý aýyrlap, jótel, jalpy álsizdik sııaqty respıratorlyq aýrý belgileri baıqalsa spırometrııadan ótý kerek. Jáne bul syrtqy tynys alý fýnksııasyn, bronh demikpesin zertteý, dıagnostıkalaý, tynys alý organdarynyń aýrýlary kezindegi adamnyń tynys alý júıesiniń jaı-kúıin baǵalaý úshin qajet. Sonymen qatar ókpeden aýa aǵynynyń qozǵalysynyń turaqty buzylýymen sıpattalatyn sozylmaly obstrýktıvti ókpe aýrýynyń (SOО́A) dıagnostıkasy úshin de spırometrııadan ótip turý kerek», deıdi.
SOО́A anyqtalýy qıyn, ómirge qaýip tóndiretin aýrý. Ol qalypty tynys alýǵa kedergi keltiredi jáne ony entigý, tynys alýdyń qıyndaýy, jótel arqyly bilýge bolady. Nátıjesinde aǵza sozylmaly ottegi jetispeýshiliginen zardap shegedi, bul barlyq metabolıkalyq úderisterge teris áser etedi jáne kóbinese múgedektikke ákelýi múmkin.
SOО́A belgileri basynda baıqalmaıtyndyqtan, asqynǵan kezde bir-aq bilinýi múmkin. Bul keseldiń eń kóp taralǵan basty sebebiniń biri – temeki tartý, biraq shylymqorlardyń kóbi ózderin syrqatpyz dep oılamaıdy.
SOО́A dıagnostıkasy tynys alýdyń kólemdik jáne jyldamdyq kórsetkishterin ólsheý arqyly júrgiziledi. Bul ádis óte qarapaıym, arzan, dál jáne múldem aýyrtpaıdy.
Al ókpe – adam aǵzasyndaǵy eń mańyzdy organdardyń biri bolǵandyqtan, onyń qyzmeti qandaı mańyzdy ekendigin túsindirip otyrýdyń ózi artyq.
