Aýyldardyń ákimderi qaıda?

Bul kúnderi oblystaǵy Aǵashoryn, Sileti, Qaratomar, Aqshıman, Qońyrózek,  Kovalevka aýyldary  ákimsiz  otyr. Tipti, oblys ortalyǵyna qarasty  Moıyldy aýylynyń ákimi  «Astanaǵa shaqyrtyp jatyr» dep ótinishin jazyp, apyl-ǵupyl jınalyp, ketip qalypty. Byltyr ǵana saılanǵan ákimder qaıda ketip qalypty dep tańǵalyp otyrǵan shyǵarsyzdar. Biz de dál sol kúıdemiz. Al ákimder aryzdaryn jazyp, aýyldarymen qoshtasyp, ketip qalǵan kórinedi. Biz muny jaqynda Ertis aýdany Aǵashoryn aýylyna barǵanda estip, bildik. Eki-úsh aıdaı boldy, ákimsiz otyrmyz, ornynda mindetin atqarý­shy­lar júr, dedi aýyldyq­tar. Sóıt­sek, osy aýdannyń shalǵaı­da­ǵy Sileti aýylynyń ákimi Saty­baldy Júsipbaev ta Aǵashoryn aýylynyń ákimi Nurlan Ahmetov sııaqty «otbasy jaǵdaıymen» dep qyzmetterinen óz ótinishterimen ketipti. Saılanǵandaryna bir jylda bolmaǵan ákimderdiń aýyldan «qashyp» ketkenderi túsiniksiz, árıne. Sonda bul ákimderge halyqtyń atynan senim bildirip saılaǵan aýdandyq máslıhat depýtattary elge endi ne demek?.. Máslıhat depýtattary aýyldyń halqyna jaqyn, turmys-tirshiligin, sharýashylyǵyn jaqsy biletin adamdy saılaýlary kerek emes pe edi?! Aýyl – eldiń tiregi. Ákimderdi saılaý ońaı. Al, olar halyqpen jumys jasaı­­ ala ma, joq pa, jumysyn jaý­ap­­kershilikpen atqaratyn adam ba, ol ja­ǵyna depýtattar múlde úńilmegen sekildi. Bul adamdardy «aýyl ákimi bola alady» dep úkilep, usynys tastaǵan aýdan ákimderi endi ne qarap otyr degen saýal da eriksiz kólbeńdeıdi. Aıtpaqshy, oblys ortalyǵyna qarasty Moıyldy aýylynyń ákimi Aıdyn Túgelbaev ta qys ishinde aryz jazyp, qyzmetin tastap ketken bolatyn. Tórt jylǵa saılanǵan Moıyldynyń ákimi sóıtip bar-joǵy 5-aq aı jumys istedi. Al ákimsiz qalǵan aýyl qaıta saılaý ótkizýge májbúr bolǵan edi. Baıanaýyl aýdanyndaǵy Qaratomar aýylynyń ákimi Rahat Qasenov byltyr qyrkúıek aıynda jol apatyna ushyrady. Densaýlyǵyna baılanysty emdelýde. Ýspen aýdanyna qarasty Qozyketken aýylynyń ákimi Tımýr Janǵazınov ta jol-kólik apatyna túsipti. Qos ákiminiń densaýlyqtary ońala qoımasa, onda qaıta saılaý bolýy múmkin. Osy aýdandaǵy Kovalevka aýylynyń ákimi Elena Neznamova da jýyrda ǵana ótinishimen qyzmetinen ketken eken, qazir onyń ornynda Irına Bolotnıkova ákimniń mindetin atqarýda. Maı aýdanyndaǵy Aqshıman aýylynyń ákimi Roza Serǵazına aı-kúni jaqyn qalǵanda ótinishin ja­­zyp ketken soń, sábıli de bolyp úl­geripti. Ornynda qazir ákimniń min­detin atqarýshy Baýyrjan О́tep­berge­nov júr. Farıda BYQAI, «Egemen Qazaqstan». Pavlodar oblysy.