«Turaqsyzdyqqa alyp keletin taǵy bir faktor – óńirdegi jekelegen elder arasyndaǵy shekara máselesiniń rettelmeýi. Shekara problemasy ǵasyrlar boıy qalyptasqan dostyq, ózara senim jáne tatý kórshilik negizinde, sondaı-aq halyqaralyq quqyq pen BUU Jarǵysynyń irgeli qaǵıdattaryn múltiksiz saqtaý arqyly tek beıbit jolmen sheshilýge tıis», dep atap ótti Prezıdent.
Sammıt barysynda Memleket basshysy sıfrlandyrý salasyna da toqtalyp, búginde Qazaqstan BUU-nyń eń sıfrlanǵan múshe memleketterdiń otyzyna kiretinin tilge tıek etti.
«Qazaqstan osy salada belsendi ózara is-qımyl jasaýǵa jáne tájirıbe almasýǵa daıyn. О́ńirlik jobalarǵa tikeleı jáne portfeldik ınvestısııalardy yntalandyrý úshin tıimdi platforma «Astana» halyqaralyq qarjy ortalyǵy bola alady. AHQO álemdik qarjy ınstıtýttarynyń úzdik tájirıbesi men jańa quraldardy biriktiredi. Ortalyqta 64 elden 1400 den astam kompanııa tirkelgen», dep qosty Qasym-Jomart Kemeluly.
Prezıdent óz sózinde saýda-ekonomıkalyq baılanystardy saqtaý, shaǵyn jáne orta bıznesti qoldaý sharalaryna erekshe nazar aýdarý qajet ekenin aıtty.
«Qazirgi jaǵdaıda qalyptasqan saýda-ekonomıkalyq baılanystardy saqtaý asa mańyzdy. Shaǵyn jáne orta bıznesti qoldaý sharalaryna, energetıka, ónerkásip, kólik-logıstıka, aýyl sharýashylyǵy salalaryndaǵy birlesken jobalardy qolǵa alýǵa erekshe nazar aýdarý qajet. Bul rette saýda kedergilerin joıý jáne proteksıonıstik sharalarǵa jol bermeý mańyzdy. Bizge óńirishilik saýda-sattyqty damytýǵa baǵyttalǵan kúsh-jigerdi jandandyrý qajet. Bul jerde taýar aınalymynyń qurylymyn jaqsartýǵa jáne onyń nomenklatýrasyn keńeıtýge mán bergen jón», dedi Memleket basshysy.
