Ázil astarynda... eńbek qaýipsizdigi

«Qazhrom» TUK» AQ-tyń fılıaly Aqtóbe ferroqorytpa zaýytynyń Metallýrgter mádenıet úıinde «Biz – qaýipsiz eńbek úshin» atty ta­qy­­­rypta kóńildiler men tapqyrlar komandalarynyń saıysy bolyp ótti. Jyldaǵy dástúr boıynsha bıyl da zaýyttyqtar arasynda kóńildiler men tapqyrlar saıysy óz jalǵasyn tapty. Saıysqa seh, bólimshelerden on komanda qatysyp, ázil-shyny aralas tamasha oıyn órnegin kórsetti. Tehnıka qaýipsizdigine arnalǵan saıys ádettegideı úsh tapsyrmadan turdy. Mádenı sharanyń arqaýy tehnıka qaýipsizdigi bolǵandyqtan árbir komanda kúndelikti óndiriste oryn alǵan jaǵdaılardy astarly ázilmen kórermenderge oı tastaı otyryp jetkizip, kemshiliktiń zardaby qandaı bolatynyn kóz aldarynan ótkizýi áserli shyqty. Kóńilderge túrli oı tastar ázilimen úzdikter qatarynan kóringen №2 balqytý sehy men hıımııalyq saraptama zerthanasynan qurylǵan «EKShN» komandasy bas júldeni jáne 70 myń teńge aqshalaı syılyqty qanjyǵasyna baılady. Ekinshi oryndy ıelengen shıkiquram daıyndaý sehy jáne tehnıkalyq qadaǵalaý bóliminiń «SIZ» komandasy 50 myń teńge, úshinshi oryn alǵan óndiristi avtomat­­­tan­dyrý jáne baılanys sehy men ákti kúıd­i­rý jáne kómir­qyshqylyn óndirý ýchaske­si­niń jasta­rynan qurylǵan «White» qura­ma komandasy 35 myń teńge aqshalaı syı­lyq­ty oljalady. Júldeli oryndarǵa ilik­pegen qoman­dalarǵa da yntalandyrý syı­lyq­ta­ry men alǵys hattar tabystaldy. Al kórer­menderdiń kózaıymy bolǵan jekelegen oı­ynshylar da marapattan quralaqan qalma­dy. Satybaldy SÁÝIRBAI, «Egemen Qazaqstan». Aqtóbe oblysy.