Kórshi tatý bolsa, el tatý

«Biz Táýelsizdikke qalaı úles qosamyz?» Qaıbir kúni ótken jıynda osy suraqqa bir aqsaqal keremet jaýap qatty. «Eń aldymen úıimizdi, aýlamyzdy taza ustaımyz, kórshi­­lerimizben tatýmyz jáne balalarǵa durys tárbıe berip jatyrmyz. Aýla taza bolsa, aýyl taza bolady, kórshi­men tatý bolsaq,  el tatý bolady, balalarǵa durys tárbıe, bilim bersek, elimizdiń bolashaǵy jarqyn bolady. Mine, biz kempirim ekeýmiz Táýelsizdikke osylaı úles qosyp júrmiz», dedi álgi qarııa. Teginde el bolashaǵynyń baıandy bolýy úshin qart adamdardan budan artyq qandaı qoldaý qajet?! Shynynda, eldiń tynyshtyǵy, yntymaǵy, birligi otba­synyń berekesinen bastalsa kerek. «Berekeni kókten tileme, birligi mol kópten tile» degen osy. Búginde Jambyl oblysynda 25 oblystyq, 47 aýdandyq etnomádenı birlestik 80-nen astam etnostyń basyn biriktiredi. «Yntymaq barda yryzdyq bar» degen, barlyǵy Áýlıeata jerinde urpaq órbitip, tatý-tátti tirshilik kóshin jalǵastyryp jatyr. Endi, mine, Jambyl oblysynyń ákimi Kárim Kókirekbaev osy­naý yntymaǵy jarasqan túrli ult pen ulystyń mereıin tasy­typ, Taraz qalasynyń ortasynan Dostyq úıin salýdy kóz­dep otyr. Bul úshin Taraz qalasynyń ákimi Nurjan Ka­len­derovke arnaıy jer ýchaskesin bólýge tapsyrma berdi. Árıne, dostyq týyn jelbiretetin bul ǵımarattyń sáni men saltanaty erekshe bolatyny aıdan anyq. Ázirge oblystyq Qazaqstan halqy Assambleıasy hatshylyǵynyń qyzmetin qamtamasyz etetin memlekettik mekeme qurylyp, otyzdan astam jumys shtaty berildi. Sondaı-aq, oblystyq etnomádenı birlestikterdiń janynan jastar ortalyqtary ashylady. Aýdandardaǵy birlestikterge granttyq qoldaýlar kórsetilip, mádenıet úılerinen bólmeler berilmek. Osy ıgilikti istiń bastamasy retinde oblys ákimi jergilikti bıýdjetten qarjy bólip, Dostyq úıine bir avtobýs kóligin satyp alyp berýdi josparlap otyr. Laıym, bul ıgi ister el birligin arttyrýǵa úlken úles bolyp qosyla bersin. Oralhan DÁÝIT, «Egemen Qazaqstan». Jambyl oblysy.