Qurama jem shyǵaratyn iri kombınat ashyldy

Shemonaıha aýdanynyń ortaly­ǵyn­da óńirdegi iri un tartý jáne qurama jem kombınaty ashyldy. Jańa kásiporyn táýligine 600 tonnadan astam astyq óńdeı alady. Aýyldaǵy 30 adamǵa jumys ornyn qurǵan kombınat aldaǵy ýaqytta kórshiles elderdiń naryǵyna shyǵý­dy josparlap otyr. Kásiporynda ónimniń 15 túri shyǵarylady. Kombınattyń bas dırektory Farmanalı Mamedovtyń aıtýynsha, munda taýyq pen balapanǵa, iri qara men shoshqaǵa arnalǵan azyqtyq jem óndiriledi. Búginde aımaqta ózge oblystardan jáne shetelderden jem satyp alýǵa májbúr bolyp otyrǵan sharýashylyqtar jeterlik. Sondyq­tan bul joba kóptegen jergilikti agroóndiristik keshender úshin tıimdi bolmaq. Kombınat tolyq qýatynda jumys isteı bastaǵan kezde ónimdilik deńgeıi saǵatyna 25 tonnaǵa deıin artady dep kútilýde. Bul óńirdi ǵana emes, kórshiles elderdi de mal azyǵymen qamtamasyz etýge jol ashady. О́ndiris ornynyń jumysymen tanysqan óńir basshysy B.Saparbaev Shyǵys Qazaqstannyń et ekspor­tyndaǵy áleýetin nyǵaıtý úshin myqty jemshóp bazasynyń qajet­tiligin atap ótti. – Shyǵys Qazaqstan ótken jyly 400 tonna etti eksportqa shyǵardy. Atalǵan kórsetkishti eseleý úshin shetelderge satylatyn ettiń úlesin kóbeıtýge tıispiz. Bul úshin aýqymdy jemshóp bazasy qajet. Búgin ashyl­ǵan kombınat óńirdiń qus, shoshqa sharýashylyǵyn damytýǵa septigin tıgizedi, – dedi óńir basshysy. Mamandardyń aıtýynsha, óńirge ónimdi qaıta óńdeıtin kásiporyndar kerek. Sebebi, jergilikti óndiristiń jemi satyp alynatyn azyqtan 30 paıyzǵa arzanǵa túsedi. Al qazirgi tańda memlekettik qoldaýdyń arqasynda árbir aýyl sharýashylyǵy mamany óz óndiris ornyn ashýǵa múmkindik alyp otyr. Shyǵys Qazaqstan oblysy, Shemonaıha aýdany. Dýman ANASh, «Egemen Qazaqstan». Sýretti túsirgen  Sergeı SÝROV.