Sıfrlyq qujat servısinde qoljetimdi barlyq elektrondyq qujat qaǵazdaǵy qujattarǵa teń. Mınıstrdiń buıryǵy 2022 jyldyń 22 qazanynan bastap kúshine enedi. Sondaı-aq atalǵan vedomstvo elektrondy sıfrly qoltańbadan bas tartý máselesin de qarastyryp jatyr. Bul týraly Baǵdat Mýsın óziniń áleýmettik jelidegi paraqshasynda málimdedi.
«Búgin Memlekettik qyzmet kórsetý máseleleri jónindegi vedomstvoaralyq komıssııanyń kezekti otyrysyn ótkizdik. Kún tártibinde elektrondy-sıfrlyq qoltańbadan bas tartý, halyqqa qyzmet kórsetý ortalyqtarynan qujattar alý, emhanaǵa tirkelý jáne bızneske arnalǵan qyzmetterdi jetildirý máseleleri qarastyryldy. Meniń oıymsha, biz birinshi kezekte halyqqa elektrondyq qyzmetterdi paıdalaný yńǵaıly ekenine kóz jetkizýimiz kerek. Qazirgi ýaqytta QR arqyly qol qoıý mehanızmi ázirlendi, bul yńǵaıly jáne qaýipsiz. Ony barlyq portalǵa engizý ǵana qaldy. Bul jumysty jandandyrý jáne NCALayer júıesinen tolyq bas tartý boıynsha tapsyrma berdim», dedi mınıstr.
Vedomstvo basshysy keı jaǵdaılarda qyzmet alýshylar qandaı da bir qujattyń daıyn bolǵany týraly SMS habarlama alyp, HQO-ǵa kelgende onyń áli jetkizilmegenin bilip jatatyn jaıttardyń da kezdesip qalatynyn jetkizdi.
«Biz bul qyzmetti jetildirip jatqanymyzdy jáne jaqyn ýaqytta adamdar halyqqa qyzmet kórsetý ortalyqtaryna qaıta kelmeı, qyzmetterdi elektrondyq túrde ýaqytynda alatynyn atap ótemin. Sondaı-aq jaqyn arada emhanaǵa tirkelý prosesin tolyq avtomattandyrý josparlanýda. Mundaı bastamany Densaýlyq saqtaý mınıstrligi usyndy. Iаǵnı ótinishter qaǵaz túrinde qaralmaıdy, júıeniń ózi bárin tekseredi jáne tirkeıdi, al kóshken kezde adamǵa jańa turǵylyqty jeri boıynsha emhana usynylady», dedi.
Sonymen qatar Ádilet mınıstrliginiń bastamasymen derekterdi ózgertý prosesterin jeńildetý, mysaly, tirkeý mekenjaıyn ózgertýge qatysty usynys ta qaralǵan.
«Bul qyzmet bankterdiń qosymshalarynda qoljetimdi bolady. Tehnıkalyq turǵyda iske asyrý ǵana qaldy, sondyqtan bul jumystardy jedeldetýdi tapsyrdym. Budan bólek, memlekettik qyzmetter úshin tólem engizý jaǵdaıy talqylandy. Sheteldikterdiń qyzmet alýy kezinde aqy tóleý júıesin engizýge basa nazar aýdaryldy. Múddeli memlekettik organdar (Ishki ister, Ádilet jáne Qarjy mınıstrlikteri) men Úkimettegi áriptesterime azamattarǵa kelesi jyldan bastap sheteldikter úshin tólem engizý tetigin ázirleýdi tapsyrdym», dep jazdy vedomstvo basshysy.
Mınıstrdiń aıtýynsha, azamattardyń Úkimetpen baılanysyn jaqsartý maqsatynda da birqatar joba qolǵa alynyp jatyr. Sonyń biri – Smart data Ukimet. Bul – memlekettik organdardyń barlyq derekqoryn jınaýǵa jáne óńdeýge múmkindik beretin taldamaly júıe. Ol – naqty ýaqyt rejiminde kóp derekti jınaıtyn jáne óńdeıtin qural.
«Bul ázirlemeler azamattarymyzdyń qyzmetterdi tez jáne kedergisiz alý prosesin júzege asyrýǵa kómektesedi. Sonymen qatar, ǵarysh tehnologııalary, atap aıtqanda, tómen orbıtaly spýtnıkterdi engizý taqyryby da aıtyldy. Bul Qazaqstannyń shalǵaı aýmaqtaryn baılanyspen jáne ınternetpen qamtamasyz etýge jol ashady», dep jazdy mınıstr.
