9 qazan kúni alǵashqy órt Glýbokoe aýdanyna qarasty Maloýbınka aýylynda tirkeldi. Jekemenshik qos páterli úıden shyqqan órt mańaıyndaǵy 38 tonna shópti de sharpyp ótken. Ala jazdaıǵy eńbek esh ketti degen – osy. О́rt sóndirýshiler jetkenshe, tilsiz jaý 345 sharshy metrdi jalynǵa orap úlgergen. Tótenshe jaǵdaılar departamentiniń qyzmetkerleri oqıǵa ornyna jete sala terezeden kirip, seksendegi qarııany qutqaryp qaldy. Al órttiń neden shyqqany áli belgisiz, anyqtalyp jatyr.
Ile-shala órt oblystyń ózge aýdandarynda da tutandy. Bir kún buryn ǵana TJD tarapynan daýyl bolatyndyǵy týraly eskertilgen. Sóıte tura órt qaýipsizdigine qarsy sharalar saqtalmaǵanǵa uqsaıdy. Bir tal sirińke myń tal ormandy otqa oraıtyny árkimniń kókeıinde júrse ǵoı, shirkin. Bilmeıtinder bile júrsin, aýylsharýashylyq alańdarynda, dalaly jerde, ormandy alqaptarda ot jaǵý ákimshilik Kodekstiń 336, 337, 410-baptarymen jaýapqa tartylýy múmkin.
Ár jerden órt shyǵa bastaǵanda dabyl qaǵylyp, azamattar órt sóndirýge shyqqan. TJD mamandarynyń málimeti boıynsha, órttiń betin qaıtarý úshin barlyǵy 120-dan asa tehnıka men 700-ge jýyq adam jumyldyrylǵan.
Bul kúni Kúrshim aýdanynyń Úshbulaq aýylynan 14 shaqyrym jerdegi Pýgachev ormanshylyǵy men Maraldy aýyldyq okrýginiń aýmaǵynan da órt shyqty. Qýrap turǵan dalaly jerden shyqqan jalyn qansha gektardy jaıpaǵany ázirshe belgisiz. TJD málimetinshe, 260-tan astam ormanshy, 30-ǵa jýyq tehnıka jáne qos birdeı MI-8 tikushaǵy jumyldyryldy. Tikushaq janyp jatqan aýmaqqa 35 tonnadan 14 ret sý tógip, órttiń betin qaıtarǵan. Dese de, aımaqta qurǵaq aýa raıy saqtalýda.
Al Zaısan aýdanyndaǵy Solenyı ýchaskesinde 15 gektar jer kúlge aınalǵan. Dál mundaı dala órti Ulan aýdanynan da shyqty. Gerasımovka aýylynyń mańyndaǵy Aqtasty ýchaskesinde 45 gektar jer órtense, Vysokaıa ýchaskesinde 600 gektar jer biraq janyp ketken. Dalaly jer bolǵandyqtan orman-toǵaı men qora-qopsyǵa bálendeı kesiri tıe qoıǵan joq. О́skemende kerisinshe, alapat órt 6 saıajaı úı men sharýashylyq ǵımarattaryn sharpyǵan. Odan bólek qala mańynda dalaly jerler de órtendi.
Uıytqı soqqan jel ońdyrsyn ba?! Túsken shoq tutanǵan. Tutanǵan ot ushqyndap, jan-jaqqa tarala bergen. Baıqaǵanymyzdaı, sol kúni О́skemenniń aspany kók tútinnen kórinbeı turdy. Túptep kelgende, órttiń shyǵýy adamı faktorǵa baılanysty. Áıtpese, naızaǵaı oınap, kún kúrkiremegen. Árıne, órt oshaqtarynda arnaıy mamandar jumys istep jatyr. Tilsiz jaýdyń neden shyqqanyn naqtylaı jatar. Al sizder tabıǵat aıasyna shyǵa qalsańyz, asa saq bolyńyz. Ot jaqqan jaǵdaıda ábden sóndirip ketińiz. TJD mamandary da únemi bul týraly eskertýler jasap otyrady.
– Biz óz tarapymyzdan órttiń shyǵý núktesin jedel baqylaý úshin kosmomonıtorıngti paıdalanyp otyrmyz. Búgingi tańda ǵaryshtyq tehnologııalardyń kómegimen oblysta 658 órttiń núktesi tirkelip, jedel sóndirildi. О́tken demalys kúnderi 55 jerde qurǵaq shóp janyp, órt sóndirýshiler óshirip úlgerdi. Kóp jaǵdaıda turǵyndar qoqys órteımiz dep, ot shyǵaryp alyp jatady, – deıdi oblystyq TJD bastyǵynyń orynbasary Serik Amangeldın.
Shyǵys Qazaqstan oblysy
