Balalarǵa medısınalyq kómek MÁMS esebinen tegin jasalady. Al 2011 jyldan beri hırýrgter «ıilgish shegeler» nemese TEN arqyly osteosıntez tehnologııasyn qoldanyp keledi. Bul shegeler jambas súıek, ıyq, jilinshik, buǵana synǵanda tıimdiligin kórsetti.
Tehnologııanyń ereksheligi – synǵan súıekterdi týra sáıkestendirip, arnaýly sym-shege arqyly bekitetininde. Shege súıek ábden jazylǵanda ǵana baryp alynady. Bul tehnologııa naýqastyń aýrýhanada jatyp, emdelý merzimin kemitti. Buryn osy tektes synyqtarmen aýrýhana tósegine tańylý 4 aptaǵa sozylsa, endi 5 kúnde úıine shyǵady.
– Mundaı tehnologııa 12-13 jasqa deıingi balalardyń jilik sekildi súıekteriniń dıafızdik synyqtaryn emdeýdiń ozyq joly dep esepteıdi mamandar. Bala operasııadan soń aýrýhanada 5 kún ǵana bolady. Súıektiń qaıyra ornynan qozǵalyp ketýine jol bermeıdi. Birneshe ret rentgenge túsirý qajettiligi de joq. Taǵy bir artyqshylyǵy – súıek ornyna kelip, bekitilgen soń naýqastar otyryp, turyp, qozǵala alady, – deıdi balalar ortopedııasy bóliminiń meńgerýshisi Sholpan Muqasheva.
Búginde aýrýhanada jatqan jambas súıegi synǵan eń kishkentaı naýqas 1 jastan 3 aı asqan sábı eken.
Oınap júrip jambasyn syndyrǵan balalar da jıi kezdesedi. Bólimshedegi pasıentterdiń biri – 12 jasta. Onyń sol jaq jambas súıegine TEN ornatylypty. Súıek synǵan kezde ornynan jyljyp ketken. Ota kezinde synyq sáıkestendirilip bekitildi. Birer kúnde aýrýhanadan shyǵady, deıdi dárigerler.
