Otyrys barysynda óńirlerdegi áleýmettik mańyzy bar qoǵamdyq kólikterdi sýbsıdııalaý jáne ony jetildirý máselesi talqylandy.
Kólik komıteti tóraǵasynyń orynbasary Qasym Tilepovtiń aıtýynsha, búginde qalalyq qoǵamdyq kólikterdi sýbsıdııalaý jergilikti atqarýshy organdardyń tikeleı quziretinde. Jyl saıyn bul tarapta bólinetin qarajat kólemi aıtarlyqtaı artyp keledi.
«2021 jyly jergilikti ákimdikter aımaqtardaǵy áleýmettik mańyzy bar qalalyq avtobýs baǵyttaryn sýbsıdııalaýǵa 93 mlrd teńge bóldi. Bul 2020 jylmen salystyrǵanda 75 paıyzǵa artyq (53 mlrd teńge), al 2018 jyly bólingen qarajat kóleminen 5 ese joǵary (17 mlrd teńge). Al bıyl atalǵan salany sýbsıdııalaýǵa 113,5 mlrd teńge qarastyrylǵan. Qarjynyń basym bóligin Astana, Almaty jáne Shymkent qalalarynyń ákimdikteri bólgen», dep atap ótti Q.Tilepov.
