«Arǵymaq» at-saýyqtyrý kesheniniń ashylý qurmetine onyń alańynda ulttyq at sporty túri - 14 jáne 20 km qashyqtyqtaǵy báıge, júlde qory 17 mln teńgeni quraıtyn jarystar jáne olımpıadalyq túrler – «Ashyq synyp», «Jas jylqylar gandıkap» jáne «Balalar» nomınasııasy boıynsha konkýrs ótti. Atalǵan jarystardyń jalpy júlde qory shamamen 7 mln teńgeni qurady.
«Jarystyń basty maqsaty - ulttyq jáne olımpıadalyq sport túrlerin nasıhattaý, perspektıvaly shabandozdar men jylqylardy anyqtaý», delingen habarlamada.
Is-sharany Astana qalasynyń ulttyq jáne olımpıadalyq at sporty túrleriniń federasııasy men elordalyq Dene shynyqtyrý jáne sport basqarmasy uıymdastyrdy.
Olımpıadalyq at sporty túrleri boıynsha memlekettik jattyqtyrýshy Amanjol Hasenovtyń aıtýynsha, konkýrǵa Qaraǵandy, Almaty, Aqmola oblystary men Astanadan tórt komanda qatysty.
«Balalar» sanatyndaǵy saıysta úshinshi jáne ekinshi oryndy Laýra Aldabergenova Kúreń esimdi atpen jáne Darına Dýrjýbaeva Ǵaısaq esimdi atpen ıelendi. Birinshi oryn Ámire Qabjanovaǵa Shah atty jylqymen buıyrdy.
«Ashyq synyp» sanatynda júldeli oryndar kelesideı bólindi:
1-shi oryndy «Djafar» atty atpen Erjan Maǵjaev ıelendi;
2-shi oryn - Oleg Sokolenko «Kúreń» atty jylqymen;
3-shi oryn - «Kaprııa» atty jylqysy bar Nıka Sım.
Jeńimpazdar 1 mln teńgeden aldy.
Is-shara aıasynda ulttyq oıyndar, sondaı-aq konserttik baǵdarlama ótkizildi.
Aıta ketsek, jańa at-saýyqtyrý kesheninde elorda turǵyndary at sporty túrlerimen aınalysa alady, al erekshe qajettilikteri bar balalar ıppoterapııadan óte alady. Ortalyq bazasynda halyqaralyq jarystar da ótedi. Jalpy, keshen elordada balalar men jasóspirimder sportynyń damýyna yqpal etetin bolady.
