EGDI elektrondyq úkimettiń úsh mańyzdy aspektisiniń jıyntyq ólshemi: onlaın-qyzmetti usyný, telekommýnıkasııalyq baılanys jáne adam áleýeti. Eldegi veb-saıttardyń damý modelin baǵalaýmen qatar eldiń qoljetimdilikti arttyrý úshin aqparattyq tehnologııalardy qalaı paıdalanyp otyrǵanyn taldaı kele ındeks qoljetimdilik sıpattamasyn da (ınfraqurylym jáne bilim deńgeıi) eskeredi.
Azamattardyń elektrondy qatysýy reıtınginde (E-Participation Index, EPI) Qazaqstan 15-oryn alǵan. 15-oryn – óte táýir pozısııa. EPI ındeksi EGDI ındeksin tolyqtyrady jáne azamattardyń suranys boıynsha nemese onsyz jarııa aqparatqa qol jetkizýin, memlekettik saıasat pen qyzmetterge qatysýǵa jáne talqylaýǵa tartylýyn, sondaı-aq saıasatqa, qyzmetterge jáne olardy usyný tásiline qatysty birlesken elektrondyq sheshimder qabyldaý arqyly halyqtyń quqyqtary men múmkindikterin keńeıtýdi kórsetedi.
«Mundaı oń kórsetkishterge Úkimettiń bastamalary áser etedi. Aıtalyq, elimizde 10 memlekettik qyzmettiń 9-y sıfrlandyrylǵan, olardy búgin Egov.kz portalynda nemese tıisti qosymsha arqyly onlaın-formatta alýǵa bolady. Sol sııaqty, mobıldi qosymshalar arqyly, aıtalyq, zeınetaqy aktıvterin basqarýǵa, «elektrondyq emhanaǵa» (Damumed) qol jetkizýge de múmkindik bar. Budan basqa, sıfrlandyrýda qarjy sektory (bankterdiń saıttary men qosymshalary, onlaın-saqtandyrý, brokerlik qyzmetter jáne t.b.), ónerkásip, qurylys, logıstıka, telekom, mádenıet jáne demalys salasy sııaqty eldiń barlyq negizgi salasynyń iri kompanııalary úlken ról atqarady», dep jazady Finprom.
2021 jyly 6-74 jas aralyǵyndaǵy ınternet paıdalanýshy azamattar úlesi 92,9 paıyzdy quraǵan. 2020 jylmen salystyrǵanda 4,7 paıyzdyq tarmaqqa joǵary. Kórsetkish aýyldyq jerlerde 2020 jylǵy 85,5 paıyzdan 2021 jyly 90,7 paıyzǵa deıin ulǵaısa, qalada 90,1 paıyzdan 94,4 paıyzǵa deıin artqan.
Infografıkany jasaǵan Amangeldi Qııas, «EQ»
Finprom málimeti boıynsha, Speedtest Global Index dereginshe, bizdegi mobıldi ınternet jyldamdyǵy 22,1 Mb/sekýnd bolǵan. Byltyrǵy jyldamdyqtan 11,4 paıyzǵa joǵary. Bul turǵyda da Ortalyq Azııa men TMD-da úzdikpiz. Reseıdegi jyldamdyq – 21,2 Mb/s, Qyrǵyzstanda – 20,2 Mb/s, О́zbekstanda – 15,1 Mb/s, Tájikstanda – 7,8 Mb/s.
«Sonymen qatar Digital Intelligence Index sıfrlyq evolıýsııasy boıynsha 90 iri ekonomıka reıtınginde Qazaqstan sıfrlandyrýdy damytý jedeldiligi boıynsha 20-oryn aldy.
«Qazaqstan sıfrlyq ál-aýqatty odan ári damytý úshin neǵurlym perspektıvaly elder tobyna kirdi. Sondaı-aq 2021 jylǵy DSGI sıfrlyq daǵdylar deńgeıi boıynsha 134 eldiń reıtınginde Qazaqstan 43-orynǵa ıe boldy. Bul eldegi qoldanystaǵy sıfrlyq tehnologııalardyń senimdiligin, turaqtylyǵy men jedeldiginiń jetkilikti joǵary ekenin kórsetedi», dep jazady Finprom.
