«Ortalyq saılaý komıssııasy janyndaǵy saraptamalyq keńes jumysyn qaıta bastady. Alǵashqy kezdesý 10 qarashada ótedi. Bizdiń maqsatymyz – referendýmnyń barysyn baqylaǵan EQYU-nyń esebin talqylaý. Bul esepti jaqyn arada alamyz», dedi QR OSK tóraǵasy Nurlan Ábdirov jas saılaýshylarmen kezdesýinde.
Sondaı-aq spıker EQYU Mıssııasy Prezıdent saılaýynyń barysyn baqylaý úshin óziniń 30 uzaq merzimdi baqylaýshysyn jiberetinin habarlady. Saılaýdan keıin olar elde biraz ýaqyt bolady. Saılaýǵa sanaýly kúnder qalǵanda elimizdiń barlyq óńirlerindegi saılaýdy jiti baqylaý úshin elge 300 baıqaýshy keledi.
«Erteńnen bastap QR OSK-nyń barlyq músheleri 13 qarashaǵa deıin elimizdiń barlyq 20 óńirin aralaıdy. Bizdiń maqsatymyz – qalalarda qandaı jumystar atqarylyp jatqanyn kórip, olqylyqtardyń barlyǵyn túzetip, ornyn toltyrý. Qatelespesem, respýblıka boıynsha 10102 saılaý ýchaskesi bar. Saıttar da ashylyp jatyr, biraq keıin jumysyn toqtatady. Eger eldi mekende saılaýshy az bolsa, ýchaskeni jabamyz, saılaýshy kóp bolsa, ashamyz. Zańǵa sáıkes bir saılaý ýchaskesi 3000 saılaýshynyń daýys berýine arnalǵan», dedi Nurlan Ábdirov.
Onyń aıtýynsha, ýchaskelik saılaý komıssııalarynyń barlyq músheleriniń 99 paıyzy, ıaǵnı 10 myńnan astam adam basqa salalarda jumys isteıdi. Olar tek saılaý kezinde ǵana jumysqa tartylady. Olar ózderiniń jalaqylaryn negizgi jumys oryndarynda saqtaıdy, sonymen qatar komıssııa músheleri retinde saılaýǵa qatysqany úshin qosymsha qarajat alady.
«Jalpy kezekten tys prezıdent saılaýyn ótkizýge 20,5 mlrd teńge bólindi. Alaıda bul somanyń 80 paıyzy ýchaskelik saılaý komıssııalary músheleriniń jalaqysyna jumsalady», dep qosty Ortalyq saılaý komıssııasynyń tóraǵasy.
