«Úrker» – jýrnalıster juldyzy

Qazmedıa ortalyǵynda ótken saltanatty keshte Aq­parat jáne qoǵamdyq damý mınıstri Darhan Qydyráli Memleket basshysy Qasym-Jomart Toqaevtyń quttyqtaý sózin oqyp berdi.

«Astana Media Week» – aqparattyq yn­ty­­maqtastyqty nyǵaıtýǵa, otandyq bu­qa­­ralyq aqparat quraldarynyń qazirgi qo­ǵamdaǵy róli men áleýetin aıshyqtaýǵa ar­nal­ǵan aýqymdy dıalog alańy. Álemdik dástúrli medıa mamandary, halyqaralyq sarapshylar qatysatyn kommýnıkasııa salasyndaǵy kezdesýler, talqylaýlar men tájirıbe almasýlar otandyq medıanyń damýyna tyń serpin beredi. Aqparat salasy azamattyq qoǵamnyń qalyptasýyna erek­she úles qosyp keledi. Azamattar óz pikirin erkin jetkizip, jýrnalıster qo­ǵam­­daǵy ózekti máselelerdi ashyq aıtady. Bul eli­mizde ádi­let­ti qoǵamdy qurýǵa sep­tigin tı­gizetin mańyzdy úrdis», delingen Prezı­dent­tiń quttyq­taýynda.

Marapattaý keshine qatysqan Mem­le­kettik keńesshi Erlan Qarın Ahmet Baıtur­syn­ulynyń qazaq tarıhyndaǵy eleýli eń­begine toqtalyp, qolyna qalam usta­ǵan búgingi býyn Aqań­nyń sara jolyn laıyq­ty jal­ǵas­tyryp kele jatqanyn atap ótti.

Sondaı-aq saltanatty keshte sóz alǵan Qyrǵyzstannyń Má­denıet, aqparat, sport jáne jastar saıasaty mınıstri Altynbek Maqsutov BAQ-tyń ózekti máselelerin tal­qy­laǵan «Astana Media Week» ap­talyǵynyń joǵary deńgeıde uıymdastyrylǵanyn, jýrna­lıs­ter eńbegin baǵalaıtyn «Úrker» syılyǵynyń ıgi úrdis eke­nin atap ótti.

Júzden júırikterge júlde bıyl on atalym boıynsha berildi. Sonymen qatar úsh arnaıy syılyq taǵaıyndaldy. Arnaıy syılyqtyń biri bıyl 150 jyldyǵy atalyp jat­qan ult ustazy Ahmet Baıtur­synuly atynda bolsa, ekinshisi jýrnalıstıka jampozy, halyq jazýshysy Sherhan Murtazanyń, taǵy biri – belgili jýrnalıst Batyr Qazybaev atyndaǵy arnaıy syılyq.

Marapattaýǵa deıin ár atalym bo­­ıynsha úzdik úmitkerlerdiń tizi­mi ja­rııalanǵan bolatyn. Sal­ta­­natty keshte solardyń ishi­nen ­­jal­ǵyz jeńimpaz tańdalyp, 1 mln teńge qar­jylaı syıa­qy já­ne este­lik mú­sinshe tabys­taldy.

Úzdikterge toqtalsaq, «Jyl­dyń úzdik suhbaty» atalymy Halyq-uni.kz portalynyń tilshisi Aıa О́mirtaıǵa buıyrdy. «Jyldyń úzdik reportajy» atalymynda Aikyn.kz saıtynyń tilshisi Anar Qonys top jardy. «Áleýmettik taqyryptaǵy úzdik materıal» atalymynda Halyq-uni.kz portalynyń tilshisi Naıma Nuráli úzdik shyqty. «Jyldyń úzdik jýrnalıstik zertteýi» atalymynyń jeńim­pazy bolyp «Egemen Qazaqstan» respýblıkalyq gaze­tiniń jýr­nalısi Qazbek Qutty­mu­rat­uly tanyldy. «Jyl­dyń úzdik analıtıkalyq ma­terıaly» atalymynda «Mań­ǵystaý» gazetiniń tilshisi Valentına Qozybaqova jeńimpaz atansa, «Halyqaralyq taqy­ryptaǵy úzdik materıa­­ly» atalymyn Qmonitor.kz til­shisi Saýle Isabaeva ıelendi. «Jyldyń úzdik jańalyqtar portaly» atalymynda Zakon.kz portaly dara shyqty. Radıo­stan­sadaǵy úzdik joba atalymynda Qazaq radıosynyń «Oı-túıin» baǵdarlamasy jeńiske jetti. «Jyldyń úzdik fotosýreti» atalymy Zakon.kz fototilshisi Meıirbek Tajkýranovqa bu­ıyrdy. «Saryarqa samaly» gazeti «Úzdik óńirlik BAQ» dep tanyldy.

Al Ahmet Baıtursynuly atyndaǵy arnaıy syılyqqa «Qyrǵyz ádebıeti» jobasymen «Tań-Sholpan» jýrnaly ıe boldy. Sherhan Murtaza atyndaǵy arnaıy júldeni belgili qalamger, «Ana tili» gazetiniń bas redaktory Qalı Sársenbaı ıelendi. Batyr Qazybaev atyndaǵy arnaıy syılyqtan úmitkerler arasynda Ernur.kz saıty tilshisi Áıgerim Begimbettiń jobasy úzdik dep tanyldy.

Memleket basshysynyń medıa aptalyq qatysýshylaryna arnaıy quttyqtaý joldaýy mereıli sáttiń mańyzyn eseleı túsetinin aıtqan Aqparat jáne qoǵamdyq damý mınıstri Darhan Qydyráli: «Naǵyz kásibı pikirtalas alańyna aınalǵan medıa jıynnyń «Úrker» sekildi bedeldi baıqaýmen aıaqtalýynyń jóni bar. О́ıtkeni bul eki is-shara da jýrnalıstıkanyń jo­ǵyn joqtap, qalamnyń qasıetin qur­met­tegen árip­tes­terdiń búgindi baǵamdap, bolashaǵymyzdy boljap alýy­na tynys bergen basqosý. Is-shara Ult ustazynyń 150 jyldyq mereıtoıymen tuspa-tus kelgendikten ári búgingi qa­lam ustaǵan býynnyń bulaq bastaýynda Ahań turǵandyqtan bıylǵy «Úrkerdi» Ahmet Baı­tur­synulynyń qurmetine ar­nadyq», dedi.

Esterińizge sala keteıik, ulttyq báıgeniń uıymdas­ty­rýshylary – Aqparat jáne qoǵamdyq damý mınıstrligi jáne «Medıa damytý qory» korporatıvtik qory. Is-sha­ra­nyń demeýshileri – «Qazaqstan» RTRK» AQ jáne «Habar» agenttigi» AQ. 2017 jyldan beri baıqaýǵa barlyǵy
3 377 ma­terıal túsip, onyń 300-i short-paraǵyna engen.

Bıyl «Astana Media Week» medıa aptalyǵyna 11 elden 150-ge jýyq sheteldik jáne otandyq spıker, medıa menedjerler, elimizdiń iri medıa uıymdarynyń basshylary, jýrnalıster, blogerler, táýelsiz sarapshylar, Meta, TikTok, Nickelodeon, Coursera sekildi sheteldik uıymdardyń ókilderi qatysyp, sa­ladaǵy ózekti máselerdi tal­qylap, túrli master klas­tar uıymdastyrdy.