Álsirep usha almaı qalǵan qusty Kókshetaý qalasynyń turǵyndary kórip, jergilikti polısııany shaqyrypty. Polıseıler tabıǵat qorǵaýshy áriptesterine habarlaǵan. Sóıtip, oqa jaǵalylar men Aqmola oblysynyń orman sharýashylyǵy jáne janýarlar dúnıesi ınspeksııasynyń qyzmetkerleri aqqýdy Býrabaıdaǵy zoologııalyq baqqa ákeldi.
– Balapan aqqýdy veterınarııalyq tekserýden ótkizip, qabyldap aldyq. Qatty qorqyp qalǵany bolmasa, zaqymdanǵan jeri joq. Súıegi saý, bulshyqeti bútin. Bıyl bizde qystap shyqsa, kóktemde erkine jiberemiz, – deıdi baqtyń veterınary Ildar Faızýlın.
«Býrabaı» memlekettik ulttyq parkinde qustyń 197 túri bar, onyń ishinde 14-i «Qyzyl kitapqa» engen. Suńqyldaq aqqý da – sırek kezdesetin qanattylardyń biri. Bul aq maqtadaı appaq, tek tumsyǵynyń ushy ǵana sarǵylt bolyp keletin ǵajap sulý qus. Býrabaıdaǵy zoobaqqa ákelingen aqqý tolyq eseımegendikten, qanat-qaýyrsyndary áli tolyq aǵara qoımapty, surǵylt tústi. Serigine adal qustar ómir boıy bir ǵana juppen ómir súretinin de aıta ketken jón.
