Ekonomıkalyq odaq Keden odaǵynyń jumysyn jandandyra túsedi

ASTANA. 28 mamyr. Yqpaldastyq úderisterin kúsheıtý iskerlik belsendilikti júrgizýge arnalǵan sharttardy qarqyndy túrde damyta túsedi. Bul týraly BNews.kz tilshisine bergen suhbatynda «KAZNEX INVEST» eksport jáne ınvestısııalar ulttyq agenttigi basqarma tóraǵasynyń orynbasary Meıirjan Maıkenov málimdedi. «Keden odaǵy yqpaldastyq úderisiniń birinshi kezeńi boldy. Ol bizdiń bıznes úshin basymdyqtar beredi. Sońǵy 5 jyldyń ishinde Keden odaǵy aıasyndaǵy taýar aınalymy 88 paıyzǵa artyp, búgingi tańda ol 24,3 mlrd. AQSh dollaryna jetti. Bul rette odaq sheńberindegi taýar aınalymy 18,5 paıyzǵa ulǵaıǵanyn da atap ótken lázim. Naqtyraq aıtqanda, taýar aınalymy qurylymynyń basym bóligin ımport quraıdy. Ol 18,4 mlrd. AQSh dollary shamalas. Onyń 70 paıyzǵa jýyǵy otandyq ónerkásiptik keshen úshin tarıhı turǵydan alǵanda da qajetti taýarlar, ıaǵnı shıkizat, aralyq taýarlar, óndiriske qajetti quraldar bolyp tabylady. Keden odaǵy qurylmaı turyp ta jaǵdaı osyndaı bolatyn, sebebi Reseı Qazaqstannyń negizgi saýda seriktesi», - deıdi M.Maıkenov. Onyń pikirinshe, Keden odaǵynan Qazaqstanǵa ımporttalatyn taýarlardyń úshten bir bóligi tutynýshylar taýarlary. Olar otandyq ónimge degen báskelestik orta qalyptastyrady. Al bul taýarlardyń jartysyna jýyǵy – JJM men jeńil avtokólikter. «Eksport máselesine kelsek, sapa qurylymynyń ózgeriske ushyraǵanyn erekshe atap ótkim keledi. Qazaqstan shıkizatqa qaraǵanda qaıta óńdelgen jáne daıyn taýarlardy kóbirek syrtqa shyǵaryp jatyr. Búgingi kúni olardyń úlesi sáıkesinshe 40 jáne  60 paıyzdy quraıdy. Bıznesti júrgizýge qolaıly jaǵdaılardy jasaý jáne Keden odaǵy aıasynda ózara saýdany yryqtandyrý daǵdarys kezeńinde daıyn taýarlardy jetkizý kólemin bir deńgeıde ustap qana qoımaı, ony arttyrýǵa da múmkindik berdi. Onyń ishinde, shaǵyn jáne orta bıznes kásiporyndary ónimderi de bar», - dedi agenttik tóraǵasynyń orynbasary. Meıirjan Maıkenov. Kelesi kezekte ol daıyn ónimder eksportynyń 33 paıyzy Reseı men Belarýske tıesili ekenin aıtty. Buǵan qosa, keıbir taýarlar boıynsha eksport kólemi artyp keledi. «Naqty mysal retinde Reseıge jetkiziletin kondıter ónimderiniń 7 ese artqanyn aıtýǵa bolady. Eksportty ulǵaıtýdyń arqasynda kámpıtter men shokolad óndirýshileri óndiristerdi jańǵyrtyp, básekege qabilettilikterin arttyra tústi. Syrtqa shyǵarylatyn transformatorlar 4 esedeı, sement pen kúrish khlemi 5 esege ósken. Eksport kólemin arttyrýǵa kedendik rásimderdiń alyp tastalýy, tehnıkalyq reglamentter men sertıfıkattardyń úılesimde bolýy jaǵdaı jasap otyr. Biz Eýrazııalyq ekonomıkalyq odaqtan da osyndaı ıntegrasııalyq nátıjeni kútip otyrmyz. Yqpaldasý úderisterin kúsheıtý iskerlik belsendilikti júrgizýge arnalǵan sharttardy qarqyndy túrde damyta túspek jáne bul bıznestiń memleket syrtynda da damýyna áser etpeı qoımaıtyny sózsiz», - dep qorytty M.Maıkenov. Murat Aıtqoja. Derekkóz: BNews.kz. Rásim: atnews.org.