«2022 jylǵy 7 qazanda ótken Astana qalasy onomastıka komıssııasynyń kezekti otyrysynda elordanyń keıbir kóshelerine ataý berý jáne qaıta ataý boıynsha usynystar qaralyp, qoldaý kórsetildi. Atap aıtqanda, Almaty aýdany boıynsha: A23 jobalyq ataýy bar kóshege Ekinshi dúnıejúzilik soǵysqa qatysýshy, maıdanger-jazýshy, jýrnalıst jáne prozashy Ásken Nábıevtiń esimi berilsin. Ásken aǵa - osy jerlerdiń týmasy, kelesi jyly onyń týǵanyna 100 jyl tolady. Aıta ketsek, bul usynysty qalalyq máslıhat ta qoldady», dedi Sáken Esirkep.
Spıker A24 kóshesine aqyn, QR Memlekettik syılyǵynyń laýreaty Syrbaı Máýlenovtiń esimin berý usynylǵanyn aıtty.
Sáken Esirkeptiń aıtýynsha, Esil aýdanyndaǵy E12 kóshesin Keńes Odaǵynyń Batyry Mánshúk Mámetovanyń qurmetine ataý usynyldy. Qazirgi ýaqytta Mánshúk Mámetova kóshesi Baıqońyr aýdanynda ornalasqan, onyń uzyndyǵy nebári 100 metrdi quraıdy.
Sondaı-aq E20 kóshesin akademık, energetık ǵalym, QR Ulttyq Ǵylym akademııasynyń akademıgi, Qazaqstandaǵy energetıka ǵylymynyń negizin qalaýshylardyń biri Shapyq Shoqınniń esimimen, al E753 kóshesin kórnekti memleket jáne qoǵam qaıratkeri, ǵalym-tarıhshy Sanjar Asfendııarov esimimen ataý usynyldy.
Basqarma basshysy habarlaǵandaı, Saryarqa aýdany boıynsha 197-kóshege balalar ádebıetiniń kórnekti ókili Berdibek Soqpaqbaevtyń, 189-kóshege Sultan Beıbarystyń esimin berý máselesi kóterildi.
Sonymen qatar Almaty aýdany boıynsha 23-16 jáne Maǵjan Jumabaev kóshelerin biriktirip, Maǵjan Jumabaev dańǵyly dep ataý usynyldy.
Baıqońyr aýdanyndaǵy Mánshúk Mámetova kóshesin Qaramergen kóshesi dep ózgertý usynyldy.
Sonymen qatar Esil aýdanynda Buqar jyraý kóshesinen bastalyp, №29/1 kóshede aıaqtalatyn Saýran kóshesiniń qysqa bóligin Ázerbaıjan Respýblıkasynyń Tuńǵysh Prezıdenti Geıdar Álıev kóshesine qaıta ataý usynyldy.
Burynǵy Sábıt Muqanov kóshesine Aqmola oblysyndaǵy eldi meken – Qostomar ataýyn berý usynylady.
Tyńdaý qorytyndysy boıynsha Sábıt Muqanov kóshesin Qostomar kóshesine qaıta ataý týraly usynysty qaıta qaraý týraly sheshim qabyldandy.
