Múmkindikter molaımaq

Keshe Ortalyq kommýnıkasııa­lar qyzmetinde «Ekonomıkalyq zertteýler ınstıtýty» AQ-tyń pre­zı­denti Maqsat Muqanov pen onyń orynbasary Áset Erǵalıev­tiń qatysýymen baspasóz máslı­haty ótti. Onda Eýrazııalyq ekono­mıkalyq odaqtyń tıimdi tustary áńgime arqaýyna aınaldy. Eýrazııa aımaǵyndaǵy úsh eldiń ekonomıkasyn órletip, halqynyń ál-aýqatyn kóterýge, qarapaıym tutynýshylardyń turmys-tirshiligin jaqsartýǵa baǵyttalǵan ekonomıkalyq odaq týraly álem sarapshylary sanqıly pikirler bildirip otyr. Áıtse de, «Tonnyń jylýyn kıgen ǵana biledi» demekshi, Qazaqstanǵa ne jaqsy ekenin de óz elimizdiń ekonomıka, ıntegrasııa boıynsha sarapshylary syrt el mamandarynan birshama durys biler. Olardyń paıymyna zer salsaq, eń basty paıda – tutynýshylar úshin Reseı men Belarýs elderinen sapaly ári arzan taýarlar keledi. Sóıtip, jergilikti ónimdermen básekege túsip, tutynýshylardyń tańdaý múmkindigin eselep arttyrady. Nátıjesinde taýarlardyń sapasy jaqsaryp, baǵasy arzandaıdy. Ekinshiden, kelisimshart aıasynda tutynýshylar quqyǵyn qorǵaýǵa arnalǵan arnaıy kelisimge qol qoıylatyn kórinedi. Bul degenimiz, taýardyń sapasyn arttyrýda úlken jumystar atqarylatynyn bildiredi. Sondaı-aq, Eýrazııalyq ekonomıkalyq odaq aıasynda áleýmettik qamsyzdandyrý da qamtamasyz etilip, halyq belgili bir áleýmettik tólemder alyp turatyn bolady. Ekonomıkalyq odaq aıasynda ortaq taýar naryǵy qurylmaqshy. «Bıylǵy jyl óńirlik ıntegrasııa aıasynda erekshe jyl bolady. Erteń tarıhı qujat – Eýrazııalyq ekonomıkalyq odaq qurý týraly shartqa qol qoıylady. Kelisim 2015 jyldyń qańtar aıynan kúshine enedi. Bul kelisimniń nátıjesinde bizdiń óńirimizde jańa sapaly uıym dúnıege keledi», dep bastady sózin M.Muqanov. «Kelisim turaqty ekonomıkalyq tuǵyrnama qurýdy qamtamasyz etý jáne úsh eldiń halqynyń ál-aýqatyn jaqsartý úshin jaǵdaı jasaýǵa baǵyttalǵan. Ol negizgi úsh bólimnen turady. Aldymen, ınstıtýttyq bólimde basqarý organdarynyń quqyǵy, bıýdjettik suraqtarǵa qatysty máseleler qarastyrylǵan. Mazmundy bóligi ekonomıkanyń mańyzdy salalaryndaǵy retteýdi qamtıdy. Qazirgi ýaqytta 19 sala boıynsha ekonomıkalyq qarym-qatynas máseleleri retteledi. Kelisim aıasynda ortaq taýar naryǵy qurylady. Sol arqyly taýarlar, kapıtal, eńbek resýrstary men qyzmetterdiń erkin jyljýy retteledi», dep jalǵady sózin ınstıtýt basshysy. Sarapshynyń pikirine den qoısaq, qazirgi kezde Qazaqstannyń ekonomıkasynda qyzmetter salasy 53 paıyzdy qurasa, jańa ekonomıkalyq odaq sheńberinde bul sala keńeıe túspek. Oǵan qosa, ınstıtýt mamandary 3-4 jylda Keden odaǵy elderine Qazaqstan kórsetetin qyzmetterdiń eksportynyń artqanyn baıqap otyrǵan kórinedi. Bul jaǵdaı osy sektordyń áleýetiniń zor ekenin aıǵaqtasa kerek. «Jalpy alǵanda, birneshe ortaq naryq qurylady. Ortaq aýylsharýashylyq taýarlary, ortaq eńbek, qarjy naryǵy qurylady, sondaı-aq, ekonomıkalyq sala, tehnıkalyq retteý, sýbsıdııa bólý, memlekettik qoldaýda kelisilgen saıasat júrgiziledi. Osylaısha, kelisim jańa ekonomıkalyq makroaımaq qalyptastyrýǵa jaqsy jaǵdaı týǵyzady», dedi M.Muqanov. Baspasóz máslıhatynyń ekinshi bóliminde jýrnalısterdiń qoıǵan saýaldaryna jaýap bergen sarapshy, eldegi kásipkerlerdiń jaǵdaıy men ekonomıkalyq odaqtaǵy týatyn múmkindikteri týraly da áńgimeledi. Otandyq taýar óndirýshilerge 180 mln. tutynýshysy bar naryq ashylatynyn aıtyp, bul múmkindikti meılinshe tıimdi paıdalaný kásipkerlerdiń qarym-qabileti men eńbekqorlyǵyna baılanysty bolatynyn eske saldy. Nurbaı ELMURATOV, «Egemen Qazaqstan».