Saıası jańǵyrý kezeńi

Prezıdent Qasym-Jomart Toqaev atap ótkendeı, Ata Zańǵa engizilgen túzetýler elimiz úshin taǵdyrsheshti mánge ıe. Sondyqtan Konstıtýsııaǵa ózgeris engizý máse­lesi Parlamentte emes, res­pýb­lıkalyq referendýmda she­shil­di.

Konstıtýsııalyq ózgerister azamattardyń suranystaryna negizdelgen jáne búkil qoǵamnyń múddesi úshin júzege asyryldy. Ásirese azamattardyń quqyq­ta­ryn qorǵaý tetigin kúsheıtýge baǵyttalǵan zańdarǵa erekshe toqtalǵym keledi. Oǵan sáıkes, Kon­stıtýsııalyq sot azamattar ótinishi boıynsha olardyń quqyqtary men bostandyqtaryn tikeleı qozǵaıtyn normatıvtik qu­qyqtyq aktilerdiń Konstı­tý­sııaǵa sáıkestigin qaraıdy. Ekinshiden, ólim jazasyn kons­tı­týsııalyq deńgeıde joıý týraly sheshim túp­kilikti bekitildi. Úshinshiden, pro­kýratýranyń ju­mysy­ Kon­stıtýsııalyq zań­men belgilendi. Bul júıeli quqyq qorǵaý qyzmetin jáne memleket atynan el aýmaǵynda zańdylyqtyń saqtalýyn joǵary qadaǵalaýdy kúsheıtedi.

Adam quqyqtary jónindegi ýákildiń qandaı da bir memlekettik organdar men laýazymdy adam­darǵa táýeldi bolmaý jáne esep bermeý kepildikterine ıe bolǵany da halyqtyń nazaryn aýdarǵany sózsiz. Ýákildiń Konstıtýsııalyq sotqa júginýge quqyǵy bar.

Jalpy, bul reformalar – aýqymdy saıası jańǵyrýdyń asa ma­ńyzdy kezeńi. Konstıtýsııalyq reforma júıeli sıpatqa ıe. Nátı­jesinde, barlyq memlekettik modeldiń tıimdiligi artady. Konstıtýsııalyq reformadaǵy ózgerister arqyly Ádiletti Qazaq­stan teńdik pen ádildiktiń týyn jelbiretedi. El Prezıdenti Qasym-Jomart Toqaev azamat­tar­dyń jaqsy ómir súrgenin qalaıdy. Osy konstıtýsııalyq ózgerister arqyly halyqtyń ál-aýqatyn arttyryp, qoǵamdaǵy jaǵdaıdy ońaltqysy keledi. Bul ózgerister arqyly biz gúldengen, Ádiletti Qazaqstan qura alamyz. Bul ózgeristerdiń áserin árbir qazaqstandyq sezinetinine senim mol.

Marat BÁShIMOV,

Eýropalyq quqyq pen adam quqyǵy saraptamalyq ınstıtýtynyń dırektory