Almaty qalasynda 4 qarashadan beri 531 saılaý ýchaskesi ashylǵan. Saılaý ýchaskeleriniń mekenjaılary kórsetilgen tolyq tizim «Vechernıı Almaty» jáne «Almaty aqshamy» gazetteriniń baspa nusqalarynda, olardyń saıttarynda, sondaı-aq Almaty qalasy ákimdiginiń saıtynda jarııalanǵan. Sonymen qatar qala turǵyndary men qonaqtary óz saılaý ýchaskesin tekserýi úshin «1315» biryńǵaı nómir qurylǵan. Barlyq uıaly baılanys operatorlarynyń abonentteri úshin qońyraý shalý tegin. Call-ortalyqtar demalys kúnderin qosqanda kún saıyn 8.00-den 20.00-ge deıin úzdiksiz jumys isteıdi.
Janna Asanova almatylyqtardyń saılaý ýchaskelerine 2GIS jáne Yandex Maps kartasy qosymshalarynyń kómegimen bara alatynyn, daýys berý oryndary kartada belgilenetinin atap ótti.
– Qala ákimdiginiń «Open Almaty» qoǵamdyq qabyldaý saıtynda jáne bilim basqarmasynyń memlekettik qyzmetter portalynda saılaýshylar tizimderinen ózińizdi tekserýge múmkindik beretin servıs qoljetimdi. Saılaýshylar tizimi turaqty tirkeý qaǵıdasy boıynsha jasalǵan. Qazirgi málimet boıynsha Almaty qalasyndaǵy saılaýshylar sany 1 mıllıon 170 myńnan asty. Saılaý ýchaskelerine barlyǵy 11 myńnan astam esepten shyǵarý kýálikteri tapsyryldy, – deıdi J.Asanova.
J.Asanovanyń aıtýynsha, barlyq saılaý ýchaskesi saılaý jáshikterimen, memlekettik rámizdermen jabdyqtalǵan. Ýchaskelik komıssııalar da kandıdattar týraly aqparattyq materıaldarmen, sondaı-aq saılaýshylardy qyzyqtyratyn ádistemelik quraldarmen tolyqtaı qamtamasyz etilgen. Bul rette kandıdattar týraly aqparattyq materıaldardy úgit materıaldarymen shatastyryp almaǵan jón. Barlyq saılaý ýchaskesinde úmitkerler týraly aqparat biryńǵaı formatta usynylǵan.
Aýmaqtyq saılaý komıssııasynyń jetekshisi zaǵıp saılaýshylar úshin arnaıy trafaretterdiń daıyndalatynyn aıtty. Sondaı-aq ol erekshe qajettilikteri bar adamdarǵa arnalǵan beınerolıkter, aqparattyq materıaldary bar aýdıojazbalar ázirlenip, múgedekter arbasyna arnalǵan keńeıtilgen oryndar daıyndalatynyn jetkizdi.
ALMATY
