Talqylaý kezinde mınıstr ıtbalyqtardyń ólimi 7 qarashada baıqalǵanyn atap ótti. Búginde ólgen ıtbalyqtardyń sany 141-ge jetti. Mınıstrdiń aıtýynsha, bul másele boıynsha sharalar qabyldanyp, memlekettik komıssııa quryldy.
Onyń aıtýynsha, mamandar tıisti zertteý jumystaryn júrgizgen. Olar ıtbalyqtar kúkirtti sýtektiń shyǵarylýyna baılanysty qyryldy degen boljam jasap otyr.
«Itbalyqtar ottegin alý úshin sý betine shyǵyp, sý astyna qaıta júzedi. Jalpy sýda ǵana emes, jer beti men aýadaǵy qandaı da bir zııandy ózgerister ıtbalyqtarǵa da, basqa balyqtarǵa da áser etedi. Bizdiń málimetterimiz boıynsha, Kaspııde 300 myńnan astam ıtbalyq bar. Qazirgi ýaqytta vedomstvo Kaspıı jáne bıoalýantúrlilik máseleleri jónindegi memlekettik ınstıtýtty qurý boıynsha jumys júrgizip jatyr», dep túıindedi Serikqalı Brekeshev.
Aıta ketsek, Kaspıı teńiziniń jaǵasynda Baýtıno aýyly men Fort-Shevchenko qalasy arasynda ıtbalyqtardyń 100-den astam óleksesi tabylǵan.
Quqyq qorǵaý organdary ıtbalyqtardyń jappaı qyrylý faktisi boıynsha qylmystyq is qozǵady.
