«Jurttyń narazylyǵyn týdyratyn taǵy bir mańyzdy másele – úılerdiń tyǵyz salynýy. Osyndaı qurylystar jáne joldardyń yńǵaısyz salynýy kóp qolaısyzdyq týdyryp otyr. Almaty zamanaýı ýrbanıstıka talaptaryna saı bolýy kerek. Qalamyz betonnan salynǵan ormanǵa aınalmaýǵa tıis», dedi Prezıdent.
Memleket basshysy úkimetpen ákimdikke qala salý kezinde rettelmegen máselelerdi pysyqtap, túzetýler engizýdi tapsyrdy.
«Alataýdyń samaly qalada erkin esýi qajet. Bul qalanyń ekologııasy úshin óte mańyzdy. Qala salý kezinde qurylys kompanııalarynyń emes, eń aldymen, turǵyndardyń múddesi eskerilýi kerek. Zańdarymyzda bul jaǵdaı naqty rettelmegen. Úkimetke ákimdikpen birlesip, osy máseleni pysyqtap, zańǵa tıisti túzetýler ázirleýdi tapsyramyn», dedi Q.Toqaev.
Prezıdent osy atalǵan jumystar Almatyny meılinshe jaıly, qolaıly qala retinde odan ári damytý úshin qajet ekenin atap ótti.
«Shaharda Botanıkalyq baq sııaqty qoǵamdyq oryndar kóp bolýǵa tıis. Keıbir aýdandarda osyndaı nysandar múldem joq. Qala ákimdigi osy ahýaldy túbegeıli ózgertýdi kózdep otyr. Jurttyń demalýyna arnalǵan bes ortalyq salý josparda bar. Men muny tolyq qoldaımyn. Biraq, jumysty sapaly oryndaý qajet», dedi Memleket basshysy.
