Búginde qalany damytýdyń tórt baǵyty zerdelenip, jobalardy júzege asyrý bastaldy. Onyń ishinde óndiris salasy boıynsha oblys aýmaǵyndaǵy G4 city jobasyn negizge ala otyryp, qala aýmaǵynda óndiristik aımaq boı kóteretini naqtylanǵan. Qazir atalǵan aýmaqtyń ınfraqurylymyn retteý men elektr qýatymen úzdiksiz qamtamasyz etetin qosalqy stansanyń jobalyq-smetalyq qujaty jasalyp jatyr. О́ndiris aımaǵynyń qurylysy tolyq aıaqtalǵan soń 40 myń adam jumyspen qamtylady dep josparlanyp otyr.
Al sýqoıma jaǵalaýyndaǵy qalanyń týrıstik áleýeti zor ekeni belgili. Bul baǵytta jumysty jolǵa qoıý úshin 2023-2024 jyldar aralyǵyna arnaıy jospar jasalǵan. Iаǵnı qalanyń týrızmin damytý úshin 12 mlrd teńge ınvestısııa tartylady. Keleshekte Qapshaǵaı sý qoımasyna jeke statýs berilmek. Sýqoıma jaǵalaýyna zamanaýı demalys oryndaryn salyp, olardy álemdik talapqa saı damytý úshin arnaıy baǵdarlama jasalǵan. Aýyl sharýashylyǵyn damytý da oblys ortalyǵy úshin mańyzdy bolyp qala bermek. Osy maqsatta Qapshaǵaı sý qoımasynyń aýmaǵyndaǵy 14,5 myń gektar jerdi tolyq ıgerýdiń jospary jasaldy. Qala men syrtqy naryqty qamtý úshin mol ónim alýǵa negiz bar. Bul úshin alqaptardaǵy tozyǵy jetken sýarý júıesin jańartý men qalpyna keltirý jumysy qolǵa alynyp otyr. Sondaı-aq qaladaǵy adamı áleýetti arttyrýǵa da erekshe kóńil bólinýde. Onyń bir kózi shaǵyn jáne orta bıznesti damytý bolmaq. Bul jerde Qonaev qalasyndaǵy oıynhanalar týraly aıtpaı ketýge bolmas. Búginde kazınolar turǵyndardy jumyspen qamtyp qana qoımaı, qaladaǵy kásipkerlermen tyǵyz baılanys ornatqan. Kásip ıeleriniń birqatary oıynhanaǵa servıstik qyzmet kórsetse, ekinshi toby oıyn núktelerin azyq-túlikpen, qajetti qural-jabdyqtarmen qamtamasyz etedi. Jalpy, qoǵamda «Oıynhanalar jabyla ma?», degen dúdámal pikir bary ras. Bul suraqtyń jaýabyn Qonaev qalasynyń ákimi Nurlan Qumataevtyń óz aýzynan estidik.
– Qazir Qonaev-Almaty tas jolynyń boıynda 15 oıyn bıznesi ǵımaraty ornalasqan. Onyń ishinde 5 kazıno, 4 slot-zal, 6 býkmekerlik keńse bar. Ákimdik mamandary júrgizgen monıtorıng nátıjesinde oıynhanalarda 7,5 myń adam jumyspen qamtylǵany anyqtaldy. Budan bólek, oıynhanalar zańdy túrde qyzmet kórsetip jatqanyn aıta ketken jón. Sondyqtan qaladaǵy oıynhanalardy birden jabý týraly sóz bolmaýǵa tıis dep sanaımyz. Jalpy, oıyn bıznesine basqasha kózqaraspen qaraıtyn ýaqyt keldi. Mysalǵa, damyǵan elderdiń megapolısterinde de oıynhanalar ornalasqan. Kazınolar qala damýyna esh kedergi keltirmeıdi, – dedi qala ákimi Nurlan Qumataev.
Qonaev qalasynyń bas jospary jeltoqsan aıynda qabyldanbaqshy. Bul qala sáýletiniń erekshe sıpatqa ıe bolatynyn bildiredi. Al oblys ortalyǵy qazirdiń ózinde qyzý qurylys alańyna aınalǵan. Qala aýmaǵynda tek turǵyn úı salý úshin ǵana 50 gektar shamasynda jer bólingen. Munda barlyǵy 107 kóppáterli turǵyn úıdiń irgesi qalanbaq. Onyń on úshi bıýdjet esebinen salynsa, qalǵany jeke kompanııalardyń úlesinde.
– Qalada «Nurly jer» baǵdarlamasy boıynsha 60 páterli úsh turǵyn úı salynyp jatyr. Bul jobaǵa bıyl 1 mlrd 662 mln teńge bólindi, al jalpy somasy – 2 mlrd 850 mln teńge. Eń aldymen páterler kezekte turǵan memlekettik qyzmetkerlerge beriledi, – deıdi qala ákimi.
Áleýmettik nysandardyń da qurylysy bastalǵan. Keler jyly «Jaıly mektep» baǵdarlamasy boıynsha 900 jáne 1 200 oryndyq eki mekteptiń qurylysy júrgizilmek. Bir mekteptiń qurylysy qazir jınaqylanyp ta qalǵan eken. Irgetasy 2021 jyldyń mamyr aıynda qalana bastaǵan mektep 900 balaǵa arnalǵan. Qazir bul jobaǵa ózgerister engizilip, qurylys qaıta jalǵaspaq. Al mekteptiń quny 2,7 mlrd teńge shamasynda. Bilim uıasy eki aýysymda 1 800 balany qamtı alady. Oqý oshaǵy jobasynyń bir ereksheligi – bastaýysh synyptarǵa bólek, joǵary synyp oqýshylaryna bólek sport zaldary qarastyrylǵan. 2023 jyldyń naýryz-sáýir aılarynda qurylys jumystary tolyq aıaqtalady degen jospar bar.
– Sondaı-aq bir mezgilde 150 balany qabyldaıtyn emhana men úlken balabaqsha salý josparlanyp otyr. Qazir qalanyń bas josparyn ázirlep jatyrmyz. Ol bekitilgennen keıin áleýmettik nysandar, ákimshilik ǵımarattar men bızneske arnalǵan oryndardy belgileımiz, – deıdi Qonaev qalasynyń ákimi.
Qonaev Almaty oblysynyń ortalyǵy mártebesin alǵannan keıin qalanyń kireberis qaqpasyna qar barysynyń músini ornatylǵan eken. Bul aımaqtyń sımvoly ispettes. Iаǵnı oblys ortalyǵynda tolyq jańǵyrtý jáne abattandyrý jumystary qyzý júrdi. Qysqa merzimde Beıbitshilik býlvary abattandyrylyp, kóshelerge zamanaýı shamdar ornatyldy. Ár kóshege demalýǵa jáne sportpen shuǵyldanýǵa arnalǵan aımaqtar men balalar oıyn alańy, zamanaýı sýburqaq ornatylyp, kógaldandyrý jumystary júrgizildi. D.Qonaev eskertkishiniń aınalasyndaǵy alań da qaıta jańartyldy.
Almaty oblysy
