Kedeıliktiń shynaıy deńgeıin ashyq moıyndap, áleýmettik salany qorǵaýǵa buryn-sońdy bolmaǵan qarjy bóldi. Jańa jumys oryndaryn ashyp, mıllıondaǵan adamnyń, onyń ishinde muǵalim, dáriger, áleýmettik, mádenıet, óner, sport jáne muraǵat qyzmetkerleriniń jalaqylaryn, stýdentterdiń shákirtaqysyn kóterdi. Zeınetaqy qoryndaǵy jınaqtalǵan qarjyny páter alýǵa nemese emdelýge jumsaýǵa ruqsat etti. Nesıelik amnıstııa jasaldy, masyldyq pen ysyrapshyldyqtyń joldaryn kesti. Sonymen qatar densaýlyq saqtaý máselelerine erekshe mán berip, medısınalyq saqtandyrý júıesine qosymsha mıllıardtaǵan qarjy bólgizdi.
Qańtar oqıǵasynan keıin ishki saıası jaǵdaı kúrt ózgerdi. Jańa Úkimet quryldy. Táýelsizdiktiń 30 jylynda eldiń baılyǵy tek 162 adamnyń qolyna shoǵyrlanǵanyn eskere otyryp, Prezıdent «Aldymen ekonomıka, sodan keıin saıasat» degen ustanymdy «Saıası modernızasııasyz ekonomıkalyq reformalar múmkin emes» degen qaǵıdatqa aýystyrdy. Bıliktiń úsh tarmaǵynyń tıimdiligin arttyrýdy kózdeıtin «kúshti Prezıdent-yqpaldy Parlament-esep beretin Úkimet» dep atalǵan reformany júrgizýdi qolǵa aldy.
Kadrlyq rezerv qurdy. Sybaılastyq pen jemqorlyqqa qarsy kúresti kúsheıtti. Memlekettik kapıtalızmnen jáne memlekettiń ekonomıkaǵa shekten tys aralasýynan bas tartýdy usyndy. Saılaý júıesin ózgertti. Prezıdenttiń barlyq partııadan boıyn aýlaq ustaý kerektigin málimdep, «Amanat» partııasynyń jetekshiligin Májilis tóraǵasyna tapsyrdy. El qaýipsizdigi men azamattardyń quqyqtaryn qorǵaýǵa, kórshi jáne alpaýyt memlekettermen qarym-qatynastardy nyǵaıtýǵa aıryqsha kóńil bóldi. Elimizge ınvestısııa tartýdyń, eksporttyq taýarlardy tasymaldaýdyń jańa joldaryn tapty. Elden zańsyz shyǵarylǵan kapıtaldy qaıtarý bastaldy, olardy tıimdi paıdalaný úshin qorlar ashty. Bos jatqan jerler men jaıylymdar memleket menshigine qaıtaryla bastady.
Endigi basty qadam – jazda ótken jalpyhalyqtyq referendýmnyń sheshimin naqty zańdar arqyly bekitip, saıası jáne ekonomıkalyq júıelerdi túbegeıli ózgertý. Halyqtyń ómir súrý deńgeıin jaqsartý úshin ýaqyt pen halyqtyń jańa qoldaýy kerek ekenin túsingen Q.Toqaev ókilettigin eki jylǵa qysqartyp, merzimnen tys prezıdenttik saılaý ótkizýdi, kelesi prezıdentiń ókilettigin bir rettik 7 jyl etýdi usyndy.
Q.Toqaevtyń bul usynysyn barlyq saıası partııa qoǵamdyq uıym ókilderi biraýyzdan qoldap, halyqtyq koalısııa quryldy. 20 qarashada ótken kezekten tys prezıdent saılaýynda Q.Toqaev jeńiske jetti. Saılaýdyń barlyq demokratııalyq talaptarǵa saı ótkenin halyqaralyq, sheteldik jáne otandyq baıqaýshylar men BAQ biraýyzdan moıyndap otyr.
Saılaý nátıjesi halqymyzdyń qazirgi aýmaly-tókpeli zamanda Q.Toqaevtyń aınalasyna toptasyp, senim bildirip, onyń saıasaty men júrgizip jatqan reformalaryn qoldaıtynyn jáne jańa dáýirdiń bastalǵanyn kórsetedi. Bul qoldaý elimizdi eleýli bıikterge bastaıdy dep senemiz.
Erjan ISAQULOV,
general-maıor, saıası ǵylymdar doktory
