Prezıdent • 26 Qarasha, 2022

Qasym-Jomart Toqaevtyń ulyqtaý rásiminde sóılegen sózi

236 ret kórsetildi

Aqorda Memleket basshysy Qasym-Jomart Toqaevtyń ulyqtaý rásiminde sóılegen sózin jarııalady, dep habarlaıdy Egemen.kz.

Qurmetti Otandastar!

Hanymdar men myrzalar!

Qadirli qonaqtar!

 

Bıyl halqymyz úshin aıryqsha mańyzdy jyl boldy. Qazaqstan damýdyń jańa dáýirine qadam basty. Biz túbegeıli betburysqa jol ashqan aýqymdy ózgerister jasadyq. Konstıtýsııalyq reformany júzege asyrdyq. Memleketimizdiń eń basty salalaryn jan-jaqty jańǵyrttyq. Sonyń arqasynda halyqtyń bolashaqqa degen úmiti artyp, senimi nyǵaıa tústi.

Men aımaqtardy aralap, turǵyndarmen kezdeskende buǵan aıqyn kóz jetkizdim. Sondaı-aq ótken referendým tyń bastamalardy jurtymyzdyń jappaı qoldaıtynyn kórsetti. Halyqtyń durys baǵyttaǵy ózgeriske umtylysy jumysqa zor serpin berdi. Biz reformalardy sońyna deıin mindetti túrde jetkizýimiz qajet.    

Konstıtýsııanyń jańa talabyna sáıkes budan bylaı Prezıdent jeti jyldyq bir merzimge  ǵana saılanady. Osylaısha, saıasatkerlerdiń jańa býyny bılik basyna kele bastaıdy. Men osy sheshimniń durys bolǵanyna kámil senemin.   

Konstıtýsııaǵa sáıkes bılik tarmaqtary túgel jańǵyrtylady. Osyndaı jańa saıası maýsymdy Prezıdent saılaýy bastap berdi. Saılaý naýqany 3 aıǵa jýyq ýaqytqa sozyldy. Osy kezeńde elimizdiń bolashaǵy týraly túrli mazmundy pikirtalastar boldy. Jurtymyz óz bolashaǵyna beı-jaı qaramaıtynyn kórsetti. Azamattyq qoǵamnyń kemel ınstıtýtqa aınalǵany aıqyn ańǵaryldy. Saıası alańǵa jańa tulǵalar shyqty. Osylaısha, halqymyz 20 qarashada óz tańdaýyn jasady.    

Saılaý ádil ári ashyq ótti. Bul – baıqaýshylardyń, sarapshylar men jýrnalısterdiń bergen baǵasy. El-jurttyń belsendiligi erekshe joǵary boldy. Keıbir azamattar búkil otbasymen kelip, daýys berdi. Bul naýqan el múddesi úshin ult bolyp birige alatynymyzdy kórsetti.

Babalarymyz qaı zamanda da birligin bárinen bıik qoıǵan. Biz ata jolyn saqtaı bilgen, zamanaýı jáne órkenıetti el ekenimizdi búkil dúnıe júzine pash ettik. Birligimizdiń bekemdigin taǵy da dáleldeı aldyq.

Osy saılaýda jurtymyz maǵan zor senim bildirdi.  Shyn máninde, el senimin esh nársemen ólsheý múmkin emes. Halyqtyń senimi – eń qundy nárse. Saılaý nátıjesin halqymyzdyń saıası baǵdaryma – baǵasy, aldaǵy josparyma – batasy dep qabyldaımyn.

Halqynyń qoldaýyna ıe bolyp, el tizginin ustaý –  eń bıik mártebe ári orasan zor jaýapkershilik. Aldaǵy 7 jyldy búgingi býynnyń jáne keleshek urpaqtyń aldyndaǵy boryshymdy óteýge berilgen biregeı múmkindik dep bilemin.

Qazaqta «amanat» degen asyl uǵym bar. Halqymnyń senimi – maǵan amanat. Osy amanatqa adal bolý – men úshin qasıetti paryz. El úmitin aqtap, Qazaqstandy órkendegen, baqýatty memleketke aınaldyrý úshin qolymnan kelgenniń bárin jasaımyn.

Saılaýǵa qatysqan barsha jurtqa rızashylyǵymdy bildiremin. Naýqanǵa atsalysqan qaýymǵa, baıqaýshylar men jýrnalısterge zor alǵys aıtamyn. Prezıdenttikke kandıdattarǵa da  qurmetimdi bildiremin. Saılaýda saıası partııalar jáne qoǵamdyq uıymdar mańyzdy sátte judyryqtaı jumyla alatynyn kórsetti. Osy rette meni prezıdenttikke ortaq kandıdat retinde usynǵan halyq koalısııasy múshelerine rahmetimdi aıtqym keledi.

Men ózime daýys bergen azamattardyń ǵana emes, búkil Qazaqstan halqynyń aldynda esep beretin boldym. Qazaqta «Baılyq ne kerek, adaldan jımasań, bılik ne kerek, ádildik qurmasań» degen sóz bar. Bul – buljytpaı ustanatyn ómirlik qaǵıdatym.  

Men búgin kók týdy súıip, dana halqymnyń aldynda bas ıdim. Azattyq jolynda qurban bolǵan babalar rýhyna taǵzym ettim. Elimniń arman-muratyna ómir-baqı adal bolýǵa sert berdim. Eshqashan adaldyqtan attamaýǵa jáne el múddesine qııanat jasamaýǵa ant ettim. Ata zańǵa qolymdy qoıyp, onyń ár sózin múltiksiz oryndaımyn. Halqymnyń aldyndaǵy osy antym aldaǵy qyzmetimde Men úshin aınymas temirqazyq bolady.

 

Qurmetti otandastar!

О́tken Prezıdent saılaýy naǵyz patrıottyq shara boldy. Saılaý azamattarymyzdyń el taǵdyryna beı-jaı qaramaıtynyn kórsetti. Bul ádildik ıdeıasynyń jáne halyqtyń erik-jigeriniń saltanat qurǵanyn, elimizdi jan-jaqty jańǵyrtý úderisi bastalǵanyn bildiredi.

Saılaý Qazaqstandaǵy elektoraldy prosestiń ashyqtyǵy men ádildigin jańa deńgeıge kóterdi. Sondaı-aq bizdiń qoǵamnyń saıası mádenıeti men kemeldik dárejesi joǵary ekenin tanytty. Halyq saılaý ýchaskelerinde aldaǵy jeti jylǵa arnalǵan memleketti damytý baǵdarlamasyna oń baǵa berdi. Maǵan senim artqan barsha otandasyma sheksiz rızashylyǵymdy bildiremin. Prezıdent laýazymynda elimizge adal qyzmet etýge daıynmyn. Bul – zor abyroı ári úlken jaýapkershilik. Men úshin memleket múddesi bárinen bıik. Aldaǵy jeti jylda halyqtyń zor senimin aqtaý úshin bar kúsh-jigerimdi jumsaımyn.

Endi bizdiń ortaq maqsatymyz – zań men tártip ústemdik quratyn, azamattardyń quqyǵyna laıyqty qurmet kórsetiletin Ádiletti Qazaqstandy qurý. Qoǵamdy transformasııalap, Qazaqstandy shynaıy demokratııalyq ınstıtýttary damyǵan elge aınaldyrý úshin aýqymdy jumys atqarýymyz kerek. Sonda ǵana ulttyń jańa sapasyn qalyptastyryp, qasterli táýelsizdigimizdi nyǵaıtamyz.

Qazir biz osy qıyn-qystaý joldyń basynda turmyz. Aldymyzda atqaratyn jumys kóp. Árbir azamat eldiń bolashaǵy úshin óz jaýapkershiligin sezinýge tıis. Memlekettik saıasatymyzdyń negizgi baǵyty – bilim berý isinen bastap ındýstrııalandyrýǵa  deıin qoǵamnyń barlyq salasyn jańǵyrtý. Elimizdiń uzaq merzimdi ekonomıkalyq ósiminiń negizin jańa tehnologııalar, joǵary eńbek ónimdiligi, azamattardyń shyǵarmashylyq bastamalary quraıdy.

Basty mindet – isker azamattarymyzdyń kásipkerlik rýhyna zııanyn tıgizetin jasandy kedergiler men shekteýlerdiń bárin joıý. Kásipkerler bızneske júrgiziletin sebepsiz tekserýlerdi birjolata umytýy qajet. Olar tek salyq organdarynyń aldynda ǵana esep beredi. Memleket pen bıznes – senimdi seriktester. Shaǵyn jáne orta bıznestiń damýyna zańsyz kedergi keltiretinderdiń bári zańǵa sáıkes qatań jaýapqa tartylady.

Biz aýqymdy ındýstrııalandyrýdy, ınfraqurylymdardy salýdy jáne jańǵyrtýdy qolǵa alamyz. Keń baıtaq elimizdiń ár óńiriniń damýyna tyń serpin berý mańyzdy. Shynaıy zań ústemdigin qamtamasyz etpeı, ádiletti ári naryqtyq ekonomıkany qurý, jeke menshikti qorǵaý, básekelestikti damytý, sybaılas jemqorlyqty joıý múmkin emes. Sondyqtan zań aldynda báriniń teń bolýy – memleketimizdiń uzaq merzimdi damýynyń negizgi sharty. Barlyq másele, ásirese túıtkildi jáne daýly problemalar konstrýktıvti dıalog arqyly, eń aldymen, Parlamentte sheshilýge tıis. Aldaǵy Senat jáne Májilis saılaýy osy múmkindikti beredi.  

Biz «túrli kózqaras, biraq birtutas ult» qaǵıdatyn qatań saqtaýymyz kerek. Biz «birligimiz – áralýandyqta» formýlasynda kórinis tapqan halqymyzdyń tarıhı jetistikterin jan-jaqty eseleýge tıispiz. Qoǵamda arazdyq týǵyzatyn jáne ulttyń birligin buzatyn, túptep kelgende, memleketimizge qarsy baǵyttalǵan arandatýshylyq áreketterge qatań tosqaýyl qoıylady.

Biz halyqtyń tilegi men zaman talabyna saı tıimdi memleket qurýǵa mindettimiz. Bul – mańyzdy tarıhı mindet. Memlekettik qyzmetke naqty sektordan merıtokratııa jáne ashyq básekelestik qaǵıdattaryna saı irikteýden ótken jańa basqarýshy azamattardy alamyz. Prezıdenttik kadr rezerviniń múshelerin belsendi túrde tartamyz.

Bizdiń basty baılaǵymyz – adam. Sondyqtan azamattardyń ıgiligi úshin barlyq jaǵdaıdy jasaý asa mańyzdy. Elimiz damý jolynda, negizinen, óz kúshine senedi. Sonymen qatar shetelden tikeleı ınvestısııa tarta otyryp, túrli saladaǵy halyqaralyq yntymaqtastyqty belsendi túrde damytady.

Qazaqstan óz ulttyq múddesin qorǵaýǵa baǵyttalǵan teńgerimdi jáne konstrýktıvti syrtqy saıasatyn júzege asyrýdy jalǵastyrady. Reseımen, Qytaımen jáne Ortalyq Azııadaǵy baýyrlas memlekettermen, ıntegrasııalyq birlestikter jónindegi seriktestermen aradaǵy ózara tıimdi yntymaqtastyq pen strategııalyq áriptestik máseleleri basty nazarda bolady. AQSh-pen, Eýropalyq Odaqpen, Azııa, Taıaý Shyǵys jáne Kavkaz memleketterimen, sondaı-aq basqa múddeli elderdiń barlyǵymen kópjaqty yntymaqtastyqty damytý úshin bar kúsh-jigerimizdi jumsaımyz. Qazaqstan qazirgi halyqaralyq quqyq pen BUU Jarǵysyn berik ustanatyn el bolyp qala beredi.

 

Qymbatty otandastar!

Biz ádiletti memleket, ádiletti ekonomıka jáne ádiletti qoǵam quramyz. Osy qaǵıdattar meniń saılaý aldyndaǵy tuǵyrnamamda naqty kórinis tapty. Men onyń ár sózine, ár sóılemine tereń mán berdim. Saılaýaldy baǵdarlamam – bul uzaq oı-tolǵaý men izdenistiń nátıjesi. Tipti, júregimnen shyqty desem, artyq aıtqandyq emes. Halyqtyń bastamalarǵa qoldaý bildirip, úlken úmit kútip otyrǵanyn bilemin. Tuǵyrnamanyń árbir tarmaǵy tolyq oryndalýǵa tıis. Men ol úshin barlyq kúsh-jigerimdi jumsaımyn. Osyǵan baılanysty arnaıy Jarlyqqa qol qoıamyn. Bul Jarlyq naqty is-sharalardyń júzege asýyn qamtamasyz etedi. Baǵdarlamanyń múltiksiz oryndalýyn jeke baqylaýyma alamyn.

Qazir – saılaýdaǵy jeńisti toılaıtyn kez emes, aıanbaı eńbek etetin kez. Sol sebepti arqany keńge salmaı, birden iske kirisýimiz kerek, bosańsýǵa bolmaıdy. Osy oraıda eń aldymen, qolǵa alatyn birneshe máselege arnaıy toqtalǵym keledi.

Men saılaýaldy sózderimde aýyldy órkendetý isine basa nazar aýdardym. Búginde Qazaqstan halqynyń 40 paıyzǵa jýyǵy aýylda turady. «Aýyl – el besigi» dep halqymyz beker aıtqan joq.  Sondyqtan aýyldaǵy jaǵdaıdy jaqsarta almasaq – bárimizge syn. Sol úshin men búgin aýyldy damytý máselesi týraly Jarlyqqa qol qoıamyn. Osy qujat arqyly Úkimetke aýyldy damytýdyń 5 jylǵa arnalǵan naqty josparyn ázirleýdi tapsyramyn. Bul meniń jańa prezıdenttik merzimdegi birinshi Jarlyǵym bolady. Úkimet aýyldy damytýǵa arnalǵan  barlyq jobany júıeli túrde rettep, jınaqtaýǵa tıis. Sodan keıin maqsatty túrde tıimdi jumys júrgizemiz. 

Kelesi mańyzdy baǵyt. Biz ádildikti qalpyna keltirip, elden zańsyz shyǵarylǵan barlyq aktıvti qaıtarýǵa tıispiz. Bul úshin Úkimet zańsyz shyǵarylǵan kapıtaldy qaıtarý úshin qajetti rásimderdi retteıtin zań jobasyn ázirleıdi. Sonymen qatar zań jobasy ádiletsiz baıýǵa jáne aktıvterdi zańsyz shyǵarýǵa yqpal etetin sebepter men sharttardy joıýǵa baǵyttalady. Qaıtarylǵan barlyq qarajat azamattardyń ıgiligine jumsalýǵa tıis. Bul qarjyny joǵary tehnologııaly óndiris oryndaryn ashýǵa, mektepter men aýrýhanalar salýǵa, áleýmettik jobalardy júzege asyrýǵa paıdalaný kerek. Tıisti Jarlyqqa búgin qol qoıamyn. Jaqyn arada aýqatty kásipkerler halyqtyń ıgiligi úshin ózderiniń áleýmettik jaýapkershiligin jandandyrady dep oılaımyn.

Memlekettik qurylysta biz «kúshti Prezıdent – yqpaldy Parlament – esep beretin Úkimet» formýlasyn naqty ustanamyz. Prezıdent saılaýy bıliktiń barlyq negizgi ınstıtýtyn dáıekti túrde jańǵyrtý úderisin bastaýǵa jol ashty.  Saılaý aýqymdy elektoraldy sıkldiń bastapqy kezeńi boldy.

Biz saıası jańǵyrý úderisin josparly túrde jalǵastyramyz. Búgin men «Qazaqstan Respýblıkasy Parlamenti Senaty depýtattarynyń saılaýyn taǵaıyndaý týraly» Jarlyqqa qol qoıamyn. Osylaısha, joǵarǵy palata depýtattarynyń kezekti saılaýy konstıtýsııalyq reformany naqty júzege asyrýdyń jalǵasy bolmaq. Saılaý qorytyndysy boıynsha Senattyń depýtattyq korpýsynyń bir bóligi básekelestik jáne ashyqtyq qaǵıdattary negizinde jańarady.

Budan bólek, búgin men konstıtýsııalyq reformany júzege asyrýdyń kelesi satysy retinde «Qazaqstan Respýblıkasy Joǵary aýdıtorlyq palatasynyń keıbir máseleleri týraly» Jarlyqqa qol qoıamyn. Kelesi kezeń – ony tolyqqandy transformasııalaý. Basqa mańyzdy ári ózekti máseleler boıynsha sheshimderdi keıinirek jarııalaımyn. Taǵy da qaıtalap aıtamyn, alda atqaratyn sharýa kóp. Bul – jeńil jumys emes,  biraq elge paıdasy tıetin qyzmet. Men búkil memlekettik apparattan osy mindetti abyroımen oryndaýdy talap etemin.

Qolynan is keletin jáne elge berile qyzmet jasaıtyn azamattarǵa ǵana ortamyzda oryn bar. Olarǵa qoldaý kórsetemiz, al qoǵam qurmetin bildiredi. Halqymyzdyń naqyl sózin sál túrlendirip aıtsaq: «Baılyq pen mansap – qolǵa ustaǵan muz, erıdi de ketedi. Al elge jasaǵan qyzmet – artta qalǵan iz, ol urpaqtan urpaqqa jetedi». Osyny ár azamat túsinýi kerek. 

El múddesi – bárinen bıik. Men barlyq memlekettik qyzmetshiden óz jumysyn adal atqarýdy talap etemin. Bir sózben aıtsam, kásibılik, adaldyq jáne qarapaıymdylyq bizdiń basty qaǵıdattarymyz bolýǵa tıis. Qoǵamda jańa qundylyqtar ornyqtyryp, jaqsy qasıetterge ıe bola almasaq, reformanyń bári beker.

Kók baıraǵymyz, tólqujatymyz jáne memlekettik tilimiz bizdiń birtutas halyq ekenimizdi bildiredi. Babalarymyz birtutas el bolyp, Eýrazııa tórinde dańqty shejiresin at tuıaǵymen jazǵan Altyn orda men Qazaq handyǵy sııaqty memleketter qurǵan. Sondaı-aq halqymyz el basyna kún týǵan kúrdeli sátterde azattyǵy úshin arpalysty. Áıgili handarymyzdyń, batyrlarymyzdyń jáne ult qaıratkerleriniń erligi – osynyń aıqyn kórinisi.  

Ulttyń bostandyq jolyndaǵy tabandy kúresiniń arqasynda Qazaq eli táýelsizdigin aldy. Egemen memlekettiń qurylýyna, onyń irgesin bekitý jolynda orasan zor eńbek sińirgen tarıhı tulǵalarymyzǵa ádil baǵa berýimiz kerek.

Tabystardy jáne olqylyqtardy ajyratatyn bul – ýaqyt jáne tarıh.  Ýaqyt – eń ádil qazy, al tarıh – bárine tarazy. Sondyqtan saıası naýqanshyldyqqa jol bermeýimiz qajet. Biz bolashaqta ádiletti memleket bolamyz desek, ótkenge ádildikpen qarap, odan taǵylym ala bilýimiz kerek. Jaqsydan úırenip, jamannan jırený – ósetin eldiń belgisi. Otanshyldyq, eńbekqorlyq, bilimpazdyq, jańashyldyq, jasampazdyq, janashyrlyq, meıirimdilik sııaqty asyl qasıetterdi boıǵa sińirýimiz qajet. Men bul týraly jıi aıtyp júrmin.

Ádiletti Qazaqstanda eńbek adamyna erekshe qurmet kórsetilýge tıis.  Ásirese ustaz, dáriger, tártip saqshysy, qutqarýshy, jumysshy, sharýa sııaqty mamandardyń mártebesin odan ári arttyra túsýimiz qajet. Olar elimizdegi eń syıly azamattarǵa aınalýy kerek. Osy kásip ıeleri tıisti qurmet pen syıǵa ıe bolǵanda ǵana, qoǵamymyz shynymen jańardy dep aıta alamyz.

Kópshilik qazirgi ýaqytta naǵyz batyrlardyń jetispeıtinin aıtady.  Biraq naǵyz qaharmandar jurttyń nazarynan tys jerde.  Olar bizdiń aramyzda. Batyrlar kún saıyn zaýyt stanogynda jumys isteıdi, qoǵamdyq kólik júrgizedi, ushaq shtýrvalyna otyrady, qutqarýshynyń qorǵanys kıimin kıedi, naýqasqa jedel járdem berýge asyǵady, áskerı tehnıkany meńgeredi. Naǵyz batyrlar balalarymyz ben qart ata-analarymyzdyń dastarhany as-aýqatqa toly bolýy úshin aýylda tańmen talasa oıanady. Bizdiń batyrlar – óziniń jeke kásibin bastaıtyn, jumys oryndaryn ashatyn, qyzmetkerleri men olardyń otbasylaryna jańa múmkindikter týdyratyn kásipkerler. Bizdiń batyrlar – óziniń mahabbaty men kúsh-qýatyn, tájirıbesi men bilimin, múlki men qarajatyn qoǵamǵa rııasyz usynatyn eriktiler men ıgi is jasaıtyndar. Olardyń barlyǵy – halyqtyń maqtanyshy ári úmiti. Mine, osyndaı eńbek adamdary – elimiz ben memleketimizdiń tiregi.

Biz órkenıettiń alǵy shebindegi memleketke aınalý úshin tek úırenetin emes, ózgege úıretetin ultqa aınalýymyz qajet. Sondaı-aq tek tutynýshy emes, jańa dúnıeni óndirýshi ult atanýymyz kerek. Oǵan halqymyzdyń áleýeti, daryny, qarym-qabileti jetedi.  

Men bizdiń jastarymyzdyń ushqyr jáne ozyq oıly ekenin maqtan etemin. Sol sebepti Maǵjan aqynnyń «Men jastarǵa senemin» degen sózin únemi aıtamyn.  Shyn máninde, bárimiz jastarymyzdy qoldaýymyz kerek. О́ıtkeni óskeleń urpaq qana elimizdi jarqyn bolashaqqa bastaıdy.  Biraq jastar jetistikke jetý úshin kóp eńbektenýi kerek. Jańa bilim alýǵa, tyń tájirıbe jınaýǵa umtylǵan jón. Sonda jastarymyz óz kásibiniń
has sheberi atanady. Árdaıym suranysqa ıe bolady, qoǵamda syıly bolady. Mine, osylaı ómir súrgen adam eshqashan, eshteńeden utylmaıdy.  

Qazirgi zaman ýaqytty jyldamdatyp, oqıǵalar tizbegin qabattastyrady. Sózimiz ben isimizdiń shynaıy baǵasyn tarıh tarazysy ǵana beredi. Ar-ujdanymyzdyń tazalyǵy men halqymyzdyń qurmeti – bárimiz úshin úlken syı.

Biz – rýhanı murasy baı, qarqyndy damý áleýeti zor,  qýatty ári ózin-ózi tolyq qamtamasyz ete alatyn ultpyz. Shyǵystyń uly ustazy Ál-Farabı adamdardy ádil bolýǵa, aqıqatty súıýge, ar-namysty qasterleýge, sabyrly bolýǵa jáne qashan da bilimge umtylýǵa úndedi. Memlekettiligimizdiń damýynda qýatty serpilis jasaı alǵan urpaq retinde tarıhta qalýǵa zor múmkindigimiz bar ekenine senimdimin. Eldiń keleshegi bizge, barlyǵymyzdyń qajyrly eńbegimizge baılanysty.

Táýelsiz elimizdi qýatty memleket retinde urpaqqa amanattaý – bizdiń boryshymyz. Alda talaı synaqtar, kúrdeli kezeńder bolýy múmkin. Degenmen yrysty yntymaǵymyzdy saqtaı bilsek, alynbaıtyn asý joq.

Men búgin halqymnyń aldynda turyp, bastaǵan isimiz berekeli bolsyn dep tileımin.

Qazaq – yrymshyl halyq. Men bıyl qasıetti Mekkege barǵan kezde  Qaǵba tórinde ata-baba rýhyna quran baǵyshtap, Alladan bir-aq nárse suradym.  Ol – eldiń amandyǵy. Shyn máninde, elimiz aman bolsa, jerimiz bútin, birligimiz bekem, memlekettigimiz máńgi bolady. Osy qundylyqtardy myzǵymastaı etip bekitý – qazaqtyń perzenti, Qazaqstannyń Prezıdenti retindegi meniń qasıetti paryzym. Ashyǵyn aıtqanda, qyzmet – ýaqytsha, al halyq – máńgi.

Men prezıdenttik mıssııamdy halqymmen birge aldaǵy jeti jylda abyroımen atqaryp shyǵamyn dep senemin.  Bizdiń Otanymyz – bir, memleketimiz – bir, halqymyz – bir! Sondyqtan árqashan birge bolaıyq, aǵaıyn!

Elimiz órkendeı bersin!

Otanymyz – Qazaqstan Respýblıkasy jasasyn!

Halqymyz jasasyn!

Halqymyz árqashan aman bolsyn!

Táýelsiz Qazaqstanymyz jasasyn!

Sońǵy jańalyqtar

Tarazda tórt jasar balany toq soqty

Qoǵam • Búgin, 22:51

Prezıdent qolónershiler kórmesin aralady

Prezıdent • Búgin, 21:01

Uqsas jańalyqtar