Úzdikter anyqtaldy

QKFL byltyrdan bastap OLIMPBET fýtboldan Qazaqstan chempıonatynyń úzdikterin anyqtaýdy qolǵa alǵan bolatyn. Olardy chempıonatqa qatysatyn klýbtardyń bas bapkerleri men komanda kapıtandary arnaıy saýaldama arqyly tańdaıdy. Atap aıtar bolsaq, eń úzdik qaqpashyǵa beriletin Quralbek Ordabaev atyndaǵy syılyqqa bıyl Qaraǵandynyń «Shahteri» men Qazaqstan ulttyq quramasynyń qaqpashysy Igor Shaskıı ıe boldy. Bıylǵy Ulttar lıgasy týrnırinde úzdik oıynymen kózge túsken Shaskıı qatarynan ekinshi jyl atalǵan syılyqtyń ıegeri atandy. Sondaı-aq ol el birinshiliginde 21 match ótkizip, onyń beseýinde qaqpasyna gol jibergen joq. Keıingi orynǵa «Aqtóbe» qaqpashysy Stas Pokatılov ıe bolsa, úzdik úshtikti «Qaırat» komandasynyń ókili Danıl Ýstımenko qorytyndylady.

Seıildá Baıshaqov atyndaǵy eń úzdik qorǵaýshy atalymynda «Astana» men Qazaqstan ulttyq quramasynyń fýtbolshysy Tımýr Dosmaǵambetov úzdik dep tanyldy. 33 jastaǵy qorǵaýshy bıylǵy maýsymdy «Shahter» klýbynda bastap, jazda «Astana» quramyn tolyqtyrǵan bolatyn. Dosmaǵambetov chempıonatta 23 oıynǵa qatysyp, 9 már­te mergendigimen kózge tústi. Sony­men qatar ol 2022 jyly Qazaqstan quramasy sapynda 8 match ótkizip, bir nátıjeli paspen kózge túsken-di. Keıingi oryndardy chempıonattyń 25 matchynda 7 gol soqqan Álibek Qasym jáne «Tobyl» men Qazaqstan quramasynyń qorǵaýshysy Aleksandr Marochkın túıindedi. Marochkınniń «Tobyl» sapynda – 28, Qazaqstan ulttyq quramasynda 8 kezdesýde alańǵa shyqty. Byltyrǵy maýsym­da atalǵan júldeni Sergeı Malyı je­ńip alǵan edi.

Al úzdik jartylaı qorǵaýshyǵa beriletin Vahıd Masýdovtyń esimimen ata­latyn júldeni Qostanaıdyń «To­byly» men Qazaqstan ulttyq qurama­synyń kóshbasshysy Ashat Taǵybergen jeńip aldy. 32 jastaǵy jartylaı qor­ǵaýshy bıyl qatarynan ekinshi ret úzdik atandy. Byltyrǵy maýsymda Taǵybergen chempıonatta 24 match ótkizip, 8 gol soǵyp, 5 nátıjeli pastyń avtory atanǵan-dy. Sonymen qatar Qazaqstan quramasynyń sapynda 7 oıyn ótkizip, áriptesterine 2 nátıjeli pas asyrǵan bolatyn.

Bıylǵy úzdikter tiziminde «Asta­nanyń» horvatııalyq legıoneri Marın Tomasov ekinshi orynǵa ıe boldy. El­ordalyq komandanyń legıoneri kezekti nátıjeli maýsymdy ótkizip, chempıo­natta barlyǵy 25 matchqa qatysty. Maýsym qorytyndysy boıynsha ol 15 gol soǵyp, 9 nátıjeli pas­tyń avtory atan­dy. Úzdik úshtik­ke Shymkenttiń «Or­dabasy» koman­dasynyń oıynshysy Elhan As­tanov endi. 22 jastaǵy fýtbolshy chem­pıo­nattaǵy barlyq

oıynda alańǵa shyǵyp, 7 márte mer­gendik tanytyp, 6 ret nátıjeli paspen kózge tústi.

Chempıonattyń úzdik shabýylshysyna beriletin Sergeı Kvochkın atyndaǵy syılyq «Astananyń» portýgalııalyq legıoneri Pedro Eýjenıoǵa buıyrdy. 2022 jylǵy fýtbol maýsymnyń qory­tyndysy boıynsha Eýjenıo barlyq jarysta 24 gol soǵyp, 5 nátıjeli pastyń avtory atandy. О́ziniń úzdik ónerimen ol komandasynyń el chempıony atanýǵa súbeli úles qosqanyn aıta keteıik. So­nymen qatar portýgalııalyq oıynshy chempıonattyń úzdik surmergeni retinde de Evstafıı Pehlevanıdı atyndaǵy syılyqtyń ıegeri atandy. Saýaldamada ekinshi oryndy «Qaırattyń» shabýylshysy Joao Paýlo ıelense, «Astana» klýby men Qazaqstan ulttyq quramasynyń shabýylshysy Abat Aıymbetov úzdik úshtikti túıindedi. Byltyr Sergeı Kvoch­kın atyndaǵy syılyqty «Qaırat» sha­býyl­­shysy Artýr Shýshenachev jeńip al­ǵan edi.

Sonymen qatar Anatolıı Ionkın atyndaǵy «Maýsymnyń eń úzdik jas oıynshysy» júldesin «Aqtóbe» men Qazaqstan ulttyq quramasynyń jartylaı qorǵaýshysy Maksım Samorodov ıelendi. 20 jastaǵy oıynshy bıylǵy el birinshiliginde qatysqan 22 oıynda 3 gol soǵyp, 5 nátıjeli pastyń avtory atandy. Tizimdegi ekinshi oryn «Qaırattyń» fýtbolshysy Ádilet Sadybekovke, úshinshi oryn «Taraz» komandasynyń jas shabýylshysy Abylaıhan Jumabekke buıyrdy.

Al «Aqtóbe» klýbymen el birinshi­liginiń kúmis júldegeri atanǵan Andreı Karpovıch Leonıd Ostroýshko atyndaǵy eń úzdik bapker atalymynda úzdik shyq­ty. Karpovıch bir jyl ishinde «Qy­zyljar» jáne «Aqtóbe» klýbtarynda jumys istedi. Sonymen qatar ol maýsym, tamyz jáne qyrkúıek aılarynda áriptesteri arasynda ótken saýaldamada jeńiske jetip, bir jyl ishinde 3 ret aıdyń úzdik bapkeri ataǵyn jeńip alǵan bolatyn.