Sońǵy jyldary qurylys salasyna qajetti kirpish oblysta molynan óndirile bastady. Burynnan jumys istep kele jatqan kásiporyndarǵa zamanaýı jabdyqtarmen tolyq jaraqtandyrylǵan, sapaly ónim shyǵaratyn jańa óndiris oryndary qosylyp jatyr. Bul oblystyń qurylys salasyndaǵy áleýetin arttyryp, qanatyn keńge jaıýǵa múmkindik beredi.
Arshaly aýdanyndaǵy Volgodonovka aýylyndaǵy «SG BRICK» kirpish zaýyty – Ortalyq Azııada teńdesi joq kásiporyn. Bul kásiporyn «G-Park» qurylys kompanııasy tobynyń quramyna kiredi. Zaýyt irgedegi elordany ǵana emes, elimizdiń birqatar óńirin sapaly ónimmen qamtamasyz etpek.
О́nerkásip sektory óńir ekonomıkasynda basym sala bolyp tabylady. Salaǵa serpin beretin jańa jobalardyń júzege asyrylýy kóńilge qýanysh uıalatyp, el kókiregindegi senimdi nyǵaıta túsedi. Jańa zaýyttyń iske qosylýy oblystaǵy kirpish óndirisin eki esege arttyryp otyr.
Zaýyt quryltaıshysy, «G-Park» JShS qurylys kompanııalary tobynyń bas dırektory Ǵabıt Satmaǵambetovtiń aıtýynsha, kompanııa buǵan deıin otandyq ónimdermen salystyrǵanda baǵasy edáýir qymbat turatyn qurylys materıaldaryn О́zbekstan, Ýkraına, Reseıden jetkizýshilermen ózara yntymaqtastyq qarym-qatynas jasaǵan. Árıne, syrttan tasymaldanǵan materıaldar salynǵan nysannyń sharshy metriniń ózindik qunynyń birshama ósip ketýine áser etedi.
– Men birtindep ımporttan bas tartyp, óz zaýyttarymdy salý týraly jaýapty sheshim qabyldadym. Jyljymaıtyn múliktiń túpki quny tómen bolýy úshin kóptegen qurylys kompanııalary sapaly ári arzan qurylys materıaldaryn qajet etedi, – deıdi Ǵ.Satmaǵambetov.
Sapaly keramıkalyq kirpish álemge áıgili «Beralmar» kompanııasynyń ıspan tehnologııasy boıynsha óndiretin zaýyttyń janynda jalpy aýdany 161 gektardy alyp jatqan karer bar. Bul jerden qyzyl jáne sary saz shyǵarylady. Jylý tasymaldaǵysh retinde óndiriste tabıǵı gaz paıdalanylady. Gazdyń jyldyq qajettiligi – 18 mln tekshe metr. Búginde kompanııa kirpishti boıaý óndirisin jolǵa qoıýda. Qazir boıaýlardyń birneshe túri qoldanyla bastady. Ystyqqa tózimdi jáne sý ótkizbeıtin 27 úlgisi alyndy.
Jańa óndiris degenimiz – eń aldymen jergilikti eńbek adamdaryn jumyspen qamtý. Kásiporynda 250 jumys orny ashylady. Osy oraıda jaqyn mańaıdaǵy aýyldardan jumysshylar tartý kózdelip otyr. Turaqty eńbekaqy alatyn bolǵandyqtan, aýyl turǵyndarynyń da áleýmettik-turmystyq jaǵdaıy jaqsarmaq.
Zaýyt jylyna 120 mln dana kirpish shyǵarýǵa qabiletti. Bul joba Indýstrııalandyrýdyń biryńǵaı kartasy aıasynda júzege asyrylýda. Jobanyń quny – 27 mlrd teńge. Bıyl shilde aıynda paıdalanýǵa berildi.
– Kirpish zaýyty bir jarym jyldyń ishinde túgel salynyp bitti, – deıdi zaýyt dırektory Ashan Qabyldın, – qazir birneshe túrli kirpish daıyndaýdamyz. Ǵımaratty qaptaýǵa qajetti kirpishke suranys mol.
Qazir zaýytta ónim óndirý qarqyndy júrgizilýde. О́ndirilgen ónim sapasy synaqtan ótkizilip, jaqsy baǵasyn alǵan. Dál osyndaı qýatty kásiporyndar jarqyn bolashaqtyń qurylystaryn kórkeıte túsetini sózsiz.
Aqmola oblysy
