Mundaı aqparatty Indýstrııa mınıstrligine silteme jasap Kolesa.kz redaksııasy taratty. Keıinirek atalǵan vedomstvo Qazaqstanda qaýipsizdik talaptaryna saı kelmeıtin avtokólikterdiń shyǵarylýyna tyıym salynǵan dep málimdedi.
«Buqaralyq aqparat quraldarynda Qazaqstan Úkimetiniń 2022 jylǵy 22 qazandaǵy №843 qaýlysynyń, atap aıtqanda, «Qazaqstan aýmaǵynda óndiriletin jekelegen dońǵalaqty kólik quraldaryna qatysty mindetti talaptardy qoldaný jáne olardyń sáıkestigin baǵalaýdy júrgizý qaǵıdalaryn bekitý týraly» normalarynyń qate taralýyna baılanysty Indýstrııa jáne ınfraqurylymdyq damý mınıstrligi atalǵan qujattyń mańyzdylyǵy men qoǵamǵa durys jetkizilýin túsindirýdi oryndy dep sanaıdy. Bul qaýly EAEO elderi qol qoıǵan «Keden odaǵy komıssııasynyń 2011 jylǵy 9 jeltoqsandaǵy №877 sheshimine ózgerister engizý týraly» Eýrazııalyq ekonomıkalyq komıssııa Keńesiniń 2022 jyldyń 5 sáýirdegi №45 sheshimin iske asyrý maqsatynda qabyldandy. Úkimettiń 2023 jyldyń 1 aqpanyna deıingi zańdy kúshi bar qaýlysy óndirýshilerge ABS, ESP, sondaı-aq qaýipsizdik jastyqtarymen jabdyqtalmaǵan jáne ekologııalyq sanaty tómendetilgen avtokólikterdi shyǵarýǵa tikeleı quqyq bermeıdi», delingen mınıstrlik habarlamasynda.
Tıisti júıelermen jabdyqtalmaǵan avtomobılderdi shyǵarýǵa ruqsat alý úshin óndirýshi belgili bir komponentterdi ornatpaýyna qaramastan kólik modelderin jeke sertıfıkattaýdan ótkizip, onyń qaýipsiz bolýy mindetti. Bul shart EEK Keńesiniń sheshiminde de qarastyrylǵan eken. Demek, qazir Qazaqstanda qaýipsizdik talaptaryna sáıkes kelmeıtin birde-bir kólik modeli shyǵarylmaıdy. Sondyqtan óndirýshiler «Dońǵalaqty kólik quraldarynyń qaýipsizdigi týraly» Keden odaǵynyń tehnıkalyq reglamentin tolyq saqtaıdy.
Mınıstrlik málimetinshe, osyǵan uqsas qaýlylardy EEK-ke qatysýshy elder qabyldaǵan. Aıtalyq, osy jyldyń mamyrynda Reseı Federasııasynda jáne shildede Belarýs Respýblıkasynda. Al Armenııa jáne Qyrǵyzstan Respýblıkalarynda avtoóndiris oryndary joq.
«Bul oraıda qaýipsizdik jastyqshalary men ABS, ESP júıeleri jáne tómendetilgen ekologııalyq sanatqa saı júıelermen jabdyqtalmaǵan avtokólikter Reseı Federasııasy men Belarýs Respýblıkasynda aınalymǵa shyǵarylyp júrgeni belgili. EEK Keńesiniń sheshimi zańdy kúshine engen shaqta EAEO-nyń músheligine kiretin basqa elderde shyǵarylǵan avtomobılder, mashınany qurastyrǵan memlekettiń aýmaǵynda ǵana júrýine ruqsat etiledi. Osyǵan baılanysty atalǵan avtokólikterdi Qazaqstannyń aýmaǵyna kirgizýge tyıym salynady», dep málimdedi mınıstrlik.
Bastapqyda durys taramaǵan (bálkim shynymen durys taraǵan) aqparat qoǵamda shý týǵyzdy. «Net ýtılsborý» qozǵalysy ókilderiniń aıtýynsha, ABS júıesi, SOS batyrmasy, qaýipsizdik jastyǵy joq, ekologııalyq klasy tómen mashına shyǵarýǵa ruqsat berý týraly sheshim ekologııaǵa keri áser etip qana qoımaı, jol qaýipsizdigin nasharlatyp, jol apatynan zardap shegetin turǵyn sanyn arttyrady.
Qoǵam belsendileri ýtıl alymy men alǵashqy tirkeý somasyn esepteý ádisiniń durys-burysyn tekserýdi jáne otandyq kólik qurastyrýshylardyń óndiristiń lokalızasııasyn jaqsartý týraly kelisimdi oryndaý barysyn qadaǵalaýdy talap etip, sotqa shaǵym túsirgenin málimdedi. Baspasóz jıynyna qatysqandar avtomobıl jáne ózge de tehnıkalardy, sonyń ishinde aýylsharýashylyq mashınasyn jeke paıdalaný maqsatynda satyp alǵan jeke tulǵalar men shaǵyn kásipkerlerdi ýtıl alymy men alǵashqy tirkeý aqysynan bosatýdy usyndy. Al iri ımporttaýshylar men óndirýshilerden jınalǵan aqshany bólý prosesi barynsha ashyq bolý kerek.
Qazaqstan Avtobıznes qaýymdastyǵynyń málimeti boıynsha, 2022 jyldyń 9 aıynda elimizde 78 441 transport quraly qurastyryldy. Bul ótken jyldyń uqsas kezeńimen salystyrǵanda 23,4 paıyzǵa kóp.
«Komponentterdi jetkizýdegi jaǵdaı álemdegi avtomobıl ónerkásibine áser etýdi jalǵastyrýda. Osyǵan qaramastan Qazaqstan ishki óndiris kólemin arttyryp jatyr. Jalpy, 2022 jyly avtomobıl óndirisi 2021 jylmen salystyrǵanda kem degende 7 paıyzǵa ósedi dep kútilýde», deıdi qaýymdastyq vıse-prezıdenti Anar Maqasheva.
