Zań jobalaryn tanystyrǵan Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın Qazaqstan Respýblıkasynyń qoldanystaǵy «Geodezııa jáne kartografııa týraly» zańy 2002 jyly qabyldanǵanyn atap ótti. 20 jyl ishinde geodezııa jáne kartografııa salasynda úlken ózgerister boldy, sıfrlyq tehnologııalar men spýtnıktik apparatýralar engizilip, óndiriste keńinen qoldanyldy, keńistik derekteriniń dáldigine, ólsheý tıimdiligine jáne qoljetimdiligine qoıylatyn talaptar artty.
«Osyǵan baılanysty olqylyqtar men qaıshylyqtardy joıý maqsatynda zańnyń jańa redaksııasyn jáne oǵan ilespe zań qabyldaý qajet boldy. Geodezııa jáne kartografııa salasynyń jaı-kúıi memlekettegi kadastr men jer-múliktik qatynastardyń sapasyna tikeleı áser etedi», dedi Baǵdat Mýsın Senattyń jalpy otyrysynda.
Qazaqstan Respýblıkasyn joǵary dáldikti geodezııalyq koordınattar júıesimen qamtamasyz etý jáne onyń negizinde elimizdiń biryńǵaı sıfrlyq kartografııalyq bazasyn qurý - zań jobalarynyń negizgi mindetterine jatady.
Zań jobasynyń negizgi nátıjesi halyqqa kórsetiletin qyzmetterdiń tıimdiligi men sapasyn arttyrý, adal básekelestik úshin jaǵdaı jasaý, memlekettik baqylaýdyń tıimdiligin arttyrý bolady.
Ilespe zań jobasyn qabyldaýdyń maqsaty - Qazaqstan Respýblıkasynyń qoldanystaǵy zańnamasyn «Geodezııa, kartografııa jáne keńistiktik derekter týraly» Qazaqstan Respýblıkasynyń jańa zańyna sáıkes keltirý, sondaı-aq olqylyqtar men qaıshylyqtardy joıý.
