Is-sharany Eýrazııa ulttyq ýnıversıtetiniń «Shańyraq» stýdenttik teatry uıymdastyrdy. Festıvaldyń maqsaty – jastar shyǵarmashylyǵyn qoldap, stýdenttik teatrlardy damytyp jáne joǵary oqý oryndary arasyndaǵy baılanysty nyǵaıtý.
Mazmundy baıqaýǵa baq synaýǵa kelgen stýdenttik teatrlar Muhatar Áýezovtiń «Qozy Kórpesh – Baıan Sulý», Tahaýı Ahtanovtyń «Kúshik kúıeý», Tólen Ábdiktiń «Oń qol», Dýlat Isabekovtiń «Esepshot, túıetaýyq jáne domıno», t.b. shyǵarmalardyń jelisimen jazylǵan spektakldardy sahnalaıdy.
Mádenı sharanyń ashylýynda EUÝ-dyń áleýmettik-mádenı damý jónindegi prorektory Lázzat Nurqatova, Memlekettik Eltańba avtory, professor Jandarbek Málibekov, belgili ánshi, Memlekettik syılyqtyń laýreaty Kenjeǵalı Myrjyqbaı sóz alyp, jastardyń ónerine sáttilik tiledi.
«Búginde elimizdegi joǵary oqý oryndary arasynda áleýmettik, estetıkalyq, úılesimdi keńistik quryldy. Oǵan jastardyń shyǵarmashylyǵy zor yqpal etedi. Bizdiń stýdenttik teatrlar jas urpaqtyń boıyna rýhanı-adamgershilik qundylyqtardy sińirgen úlesi zor. Bul festıval elimizdiń ár túkpirinen kelgen daryndardyń basyn qosady», – dep atap ótti Lázzat Nurqatova.
Sondaı-aq Turan ýnıversıtetiniń 2-kýrs stýdenti Ásel Qýatova osyndaı festıvaldyń arqasynda tájirıbe jınap, jańa dostarmen júzdesetindigin aıtty.
«Biz shyǵarmashylyq tobymyzben tarıhymyzǵa, ana tilimizge degen qurmet taqyrybyn kóterdik. Alash ardaqtysy Mirjaqyp Dýlatulynyń «Oıan, qazaq» spektakli arqyly óz tarıhymyzdy bilý qajet ekenin jáne onsyz bolashaq joq ekenin kópshilikke jetkizgimiz keledi», – deıdi jas ónerpaz.
Jas akterler usynǵan qoıylymdardy Qazaqstannyń eńbek sińirgen ártisi Kenjeǵalı Myrjyqbaı, Ázirbaıjan Mámbetov atyndaǵy memlekettik drama jáne komedııa teatrynyń ártisi Gúlmıra Jakılına, Tuńǵysh Prezıdent qory syılyǵynyń laýreaty, akter, rejısser Nurlan Qalıev, akter, rejısser Aman Ǵumarov sekildi kásibı mamandardan quralǵan qazylar baǵalaıdy.
