Aımaqtar • 06 Jeltoqsan, 2022

Bala dilmarlar baıqaýy

Sheshendik óner – halqymyzdyń ǵasyrlar boıy qalyptasyp, búginge jetken baǵa jetpes qasıetti qazynasy. Osy qazynany qazirgi jáne keler urpaqqa nasıhattaý men amanattaý maqsatynda respýblıkalyq Abaı atyndaǵy mamandandyrylǵan mektepte IV respýblıkalyq «Dilmar» sheshendik óner baıqaýy ótti.

Arman OKTIаBR

Bala dilmarlar bas qosqan oı básekesine elimizdiń 15 oblysy men 3 qalasynan buǵan deıin ótken irikteýde júzden júırik dep tanylǵan 28 oqýshy qatysyp, sóz saıysyna tústi. Sheshendik baıqaý qos bólimnen turdy. Alǵashqy bólimde qatysýshylar jerebe arqyly taqyryp tańdap, jarty saǵattyq jekpe-jek túrindegi sheshendik saıysta baq synady. Onda kórkemdik, júıelilik, naqtylyq, oı ushqyrlyǵy, til tazalyǵy, daýys máneri, sahna mádenıetin saqtaý sarapqa salyndy. Al 2-bólimde bala dilmarlar aldyn ala berilgen bı-sheshenderdiń sózin jatqa aıtýdan jarysty.

– Sheshendik saıysty ótkizýdiń basty maqsaty – jańa býyn, jas urpaqty til tazalyǵyn saqtaýǵa, memlekettik tildi meılinshe jetik bilýge baýlý. Sheshendik óner arqyly bilimgerge sóz óneriniń ereksheligi men júıeli sóz saptaý sharttaryn meńgertý, júıeli sóıleý daǵdysy men sóıleý sheberligin shyńdaý kózdelip otyr. О́skeleń urpaq sóz qundylyǵyn baǵalap, tarıhı-mádenı jáne ulttyq bolmysyn tanysa, sol arqyly ádebı til normasyna sáıkes memlekettik tildi qoldanýdyń jańa deńgeıi qalyptassa degen tilegimiz bar, – deıdi joba avtory, jýrnalıst, sheshendik sóz óneri pániniń muǵalimi Jarqyn Sálenuly.

Qazylar alqasynyń sheshimimen Bas júldeni Abaı atyndaǵy respýblıkalyq mamandandyrylǵan mektep ınternatynyń oqýshysy Nesipbaı Shamıl ıelendi. I oryn Astana qalasy, jelilik Abaı mektebiniń shákirti Ulpan Arǵynbaevaǵa, al qos birdeı II oryn – almatylyq Aıdana Qaıyp pen Abaı oblysynan kelgen Nuraıym Tursynovaǵa tabystaldy. Bórte Qapsemet (Abaı oblysy), Ińkár Ábilqaıyrqyzy (Jetisý oblysy), Amırhan Haıdarov (BQO), Asem Anarkýlova (Shymkent qalasy) III oryn ıegeri atandy.

Sondaı-aq Nurbaqyt Amangeldi (Mańǵystaý oblysy), Alýa Dýlatova (Aqmola oblysy), Ásııa Baltabaı (Túrkistan oblysy), Aqerke Nurjanqyzy (Almaty oblysy), Aıdana Qonys (Aqtóbe oblysy), Elbaqyt Erbolat (ShQO) syndy aıryqsha ónerimen kózge túsken shákirtterge arnaıy júlde berildi.

Jeńimpazdar aqshalaı syılyqpen jáne alǵyshattarmen marapattaldy. Baıqaýǵa úshinshi jyl qatarynan «Zeınolla Sánik atyndaǵy mádenıet qory» demeýshilik jasap keledi.

ALMATY