9 qarashadan 2 jeltoqsanǵa deıin azamattar «Astana» halyqaralyq qarjy ortalyǵynyń bırjasynan (Astana International Exchange, AIX) jáne Qazaqstan qor bırjasynan (KASE) QMG aksııalaryn 8406 teńge baǵamen satyp alý múmkindigine ıe boldy. 8 jeltoqsannan bastap qaıtalama saýda-sattyq ashylǵannan keıin munaı kompanııasynyń aksııalaryn naryqtyqta da satyp alýǵa bolady.
Premer-Mınıstr óz sózinde jetekshi ulttyq kompanııanyń IPO-sy ekonomıkadaǵy memlekettiń úlesin azaıtý reformasyn ári qaraı iske asyrý sheńberinde júrgizilip jatqanyn atap ótti. IPO-nyń jalpy kólemi 154 mlrd teńgeni ($330 mln-dy), al berilgen ótinimder sany – shamamen 130 myńdy qurady, qazaqstandyq ınvestorlardyń úlesi – 95%-dan artyq.
«Bizdiń azamattardyń ótinishteri basym tártipte ári tolyqtaı qanaǵattandyryldy. «QazMunaıGazdyń» IPO-sy Qazaqstannyń qor naryǵy úshin iri mámilelerdiń biri bolyp tabylady. Bul otandyq qarjy naryǵyn damytýǵa, elimizdiń azamattaryna da oń áser etedi», dedi Álıhan Smaıylov.
Onyń aıtýynsha, iri memlekettik kompanııalardy qor naryǵyna shyǵarý – olardyń qoǵam men aksıonerler aldynda esep berý mindetin ulǵaıtyp, ashyqtyǵyn arttyrady. Halyqtyń ınvestısııalyq mádenıeti men qarjylyq saýattylyǵy jetilip keledi.
«Taıaýda basqa ulttyq kompanııalar da 2023-2025 jyldary birqatar IPO-lardy ótkizý arqyly ashyqtyǵyn arttyrady. Bul – Qazaqstan halqynyń múddesine oraı jasalǵan ashyq ári tıimdi ekonomıka qurý baǵytyndaǵy qadam», dep túıindedi Premer-Mınıstr.
Esterińizge sala keteıik, 9 qarashadan 2 jeltoqsanǵa deıin QMG aksııalaryna jazylý júrgizildi, onyń barysynda ınvestorlardan 181 mlrd teńgeden astam somaǵa 129 myńnan artyq ótinim kelip tústi. Nátıjesinde jekelegen iri ınvestorlarda aksııalar paketiniń shoǵyrlanýyna jol bermeý úshin 153 mlrd teńgeden astam somaǵa ótinimderdi qanaǵattandyrý týraly sheshim qabyldandy. QR azamattarynan aksııalardy satyp alýǵa berilgen ótinimder tolyq kólemde qanaǵattandyryldy. Osylaısha, osy IPO sheńberinde «Samuryq-Qazyna» qory QMG-nyń 18 303 584 jaı aksııasyn satady, bul kompanııanyń ornalastyrylǵan jaı aksııalarynyń jalpy sanynyń 3%-yn quraıdy.
Anyqtama: IPO (Initial Public Offering) – ınvestısııalar tartý maqsatynda kompanııa aksııalaryn qor bırjasynda bastapqy jarııa ornalastyrý. IPO kezinde kompanııa aksııalardy erkin aınalymǵa shyǵarady, ony ınstıtýsıonaldyq jáne bólshek ınvestorlar satyp ala alady.
