Joǵarydaǵy jaǵdaı jalyndap ósip kele jatqan jastarmen qatar, buǵan deıin kóbine-kóp kóleńkede qalyp qoıyp júrgen saqa sportshylarǵa da osy joly ózderin túbegeıli moıyndatýǵa jaqsy múmkindik týdyrdy.
48 kılo salmaq dárejesinde Temirtas Júsipovtiń fınalǵa shyǵýy eshkimdi tańdandyra qoımaǵany anyq. Kelesi aıdyń bel ortasynda 35 jasqa tolǵaly otyrǵan Júsipov buǵan deıin tek qurlyqtyq deńgeıdegi dodalarda daralansa, byltyr Belgradta álem chempıony atandy. Osy oraıda, 33 jastan asqan shaǵynda osyndaı bıik belesti baǵyndyrǵan boksshylar tek bizdiń elde ǵana emes, kúlli álemde kemde-kem ekenin de aıta ketken abzal. О́ziniń mol tájirıbesi men jeńiske degen erekshe jigeriniń arqasynda Júsipov Pavlodarda bul belesti altynshy márte baǵyndyrdy. Fınalda ol ózinen 14 jas kishi almatylyq Ernur Qaıratty qapy qaldyrdy.
51 kılo salmaqtyń favorıti oraldyq Danııal Sábıt ekeni sózsiz. 2020 jyly nebári 18 jasynda eresekter arasynda el chempıony atanyp, byltyr Azııa birinshiliginde kúmis medaldi ıelengen daryndy jas aqtyq saıysta Damır Ábdiqadyrmen qolǵap túıistirdi. Almaty oblysynyń ókili de osal emes-ti. Buryndary aýyz toltyryp aıtarlyqtaı tabystarǵa qol jetkize almasa da, dál osy jarystyń jartylaı fınalynda ol álem chempıonaty men Dúnıejúzilik Ýnıversıadanyń qola júldegeri Jomart Erjandy jolynan yǵystyryp, jankúıerler nazaryn birden ózine aýdardy. Boıy men qolynyń uzyndyǵyn utymdy paıdalanyp, óte saýatty taktıka ustanǵan Damır Danııaldan aılasyn asyryp, bas júldeni qanjyǵasyna baılady.
54 kılo salmaqtyń sheshýshi tusynda Nursultan Altynbek (Qyzylorda) pen Bekzat Aldamjarov (Aqtóbe) qolǵap túıistirdi. 19 jastaǵy jas órenderdiń óneri «Baıantaý» sport keshenine jınalǵan jankúıerlerdiń kóńilinen shyqty. О́te tartysty ótken báseke Syr boıy saıypqyranynyń paıdasyna sheshildi.
Erbolat Sabyr (Pavlodar) men Orazbek Asylqulov (Aqmola) arasyndaǵy jekpe-jekte 57 kılonyń úzdigi anyqtaldy. Byltyr Sabyr jastar arasyndaǵy álem birinshiliginiń kúmis júldegeri atansa, Orazbek el chempıonatynda top jardy. Basynan aıaǵyna deıin damylsyz shabýylmen ótken básekede rıngtegi tóreshi jergilikti bylǵary qolǵap sheberiniń qolyn kóterdi. 60 kılo salmaqta qaraǵandylyq Talǵat Syrymbetov Almaty oblysynyń sportshysy Erasyl Tańqaıdy tize búktirdi.
63,5 kılo salmaq dárejesindegi mańǵystaýlyq Sanatáli Tóltaev pen túrkistandyq Muhamedsabyr Bazarbaıuly arasyndaǵy aıqasty kórýge yntaly kórermenderdiń qatary kóp boldy. Onyń ózindik sebebi de bar. Osydan bir aı buryn ǵana Azııa chempıonatynda kúsh synasqan 13 jerlesimizdiń tek bireýi ǵana jeńis tuǵyryna kóterile almaǵanyn joǵaryda aıttyq. Ol dáp osy Sanatáli edi. Jáne de osydan birer aı buryn Astanada ótken Elorda kýboginde Bazarbaıuly Tóltaevty utqan. Rıngte Bazarbaıuly qansha jantalasqanymen, tájirıbeli Tóltaevtyń osal tusyn taba almady. Bul tartysta Kaspıı jalǵalaýynan kelgen jigittiń basymdyǵy baıqaldy. Kórshiles óńirdiń ókilderi – shymkenttik Abzal Serik pen túrkistandyq Temirhan Tezek 67 kılo salmaqtyń bas júldesin sarapqa saldy. Bul aıqasta Abzaldyń asyǵy alshysynan tústi.
Kópshilik taǵatsyzdana kútken taǵy bir qyzyqty jekpe-jek 71 kılo salmaq dárejesinde ótti. Fınalda Sabyrjan Aqhalyqov (Batys Qazaqstan) pen Ermahan Jaqpekov (Abaı) kúsh synasty. Ekeýiniń de esimi jankúıerlerge jaqsy tanys. Kezinde olar jastar rınginde jasyndaı jarqyldaǵan. Jaıyq jaǵalaýynan kelgen jigit byltyr Polshanyń Kels qalasynda álem chempıony atansa, Semeı óńiriniń óreni osydan tórt jyl buryn Majarstannyń bas shahary – Býdapeshtte ótken dúnıejúzilik dodanyń kúmis medalin ıelendi. Aıtqandaı-aq, báseke óte shıelenisti ótti. Desek te Sabyrjanǵa eresekter rıngine áli de biraz beıimdelý kerektigi baıqaldy. Bul básekede basymdyq Ermahan jaǵynda boldy.
75 kıloda Dıas Moljigitovtiń (Jambyl) mereıi ústem boldy. Fınalda ol Aıatolla Tákejanovty (Pavlodar) utty. 80 kılo Erasyl Jaqpekov (Abaı) pen Jánibek Qartbaev (Aqtóbe) kúsh synasty. Fýnksıonaldyq jaǵynan jaqsy daıarlyqpen kelip, taktıkalyq turǵydan saýatty qımyldaǵan Erasyl jeńiske jetti. Osylaısha, Jaqpekovter otbasynan eki chempıon shyqty. Osyǵan deıin bas júldeni oljalaǵan Ermahannyń jeńisti jolyn arada týra jarty saǵat ótkennen soń onyń týǵan inisi Erasyl qaıtalady.
86 kılo salmaqtaǵy Shaımurat Qusaıynov el chempıony atanyp, jergilikti jankúıerlerdi bir jelpindirip tastady. Sheshýshi saıysta ol túrkistandyq Saǵyndyq Toǵambaevty san soqtyrdy. 92 kılodaǵy Abzal Quttybekov (Túrkistan) osyǵan deıingi eki jekpe-jegin nokaýtpen aıaqtap, ózin óte jaqsy qyrynan kórsetken edi. Alaıda kóptegen halyqaralyq jarysta júlde alyp júrgen Abzal «sport sheberliginen úmitker» degen ǵana ataǵy bar Danıl Raqymberdınovti (Almaty oblysy) áýpirimdep júrip, ázer utty. +92 kılo salmaqtaǵy sheshýshi kezdesý Damır Toıbaı (Almaty) men Amanat Sabyrǵalı (Atyraý) arasynda ótti. Bul jekpe-jekte Damır jeńis toıyn toılady.
Jalpykomandalyq esepte Pavlodar oblysy ozdy. Rıng qojaıyndary 5 (2 altyn+1 kúmis+1 qola) júlde jeńip aldy. Aǵaıyndy Jaqpekovterdiń jarqyn jeńisteriniń arqasynda Abaı oblysy (2+0+2) ekinshi oryndy oljalady. Úzdik úshtikti Túrkistan oblysy (1+3+2) túıindedi. Sondaı-aq Almaty oblysy (1+2+3), Almaty qalasy (1+1+4), Aqmola (1+1+0), Shymkent (1+0+3), Jambyl (1+0+3), Qaraǵandy (1+0+2), Qyzylorda (1+0+0) jáne Mańǵystaý (1+0+0) quramalaryna bas júlde buıyrdy.
