«Úkimet bıýdjettiń turaqty bolýyn qamtamasyz etýi kerek. Ulttyq qordyń transfertine táýeldilikten birtindep qutylýymyz qajet. Bir jyldan keıin Ulttyq qordyń ınvestısııalyq tabysynyń jartysyn balalardyń esepshotyna aýdara bastaımyz. Sol kezde barsha azamattar Ulttyq qordaǵy ahýaldy jiti qadaǵalap otyratyn bolady», dedi Prezıdent.
Qasym-Jomart Toqaev «árbir azamat – ulttyq baılyqtyń ıesi» degen sóz jaı uran emes ekenin atap ótti.
- Bul naǵyz halyqtyq, qoǵamdyq baqylaýdyń bastalǵanyn bildiredi. Úkimet te, Ulttyq bank te muny jete túsinýi kerek. Taǵy da esterińizge salamyn, aldaǵy 7 jylda Ulttyq qordyń aktıvteri 100 mıllıard dollarǵa jetýge tıis. Sondyqtan aqshany azyraq jumsap, kóbirek tabys tabý kerek. Qazir bul máselede olqylyqtar bar. Ulttyq qordyń ınvestısııalyq kirisi ózge elderdiń mundaı qorlarymen salystyrǵanda áldeqaıda tómen. Ulttyq qordyń jyldyq tabysy sońǵy 10 jylda 1,6 paıyz boldy. Sıngapýrdaǵy osyndaı qor 6,4 al Norvegııanyń qory 7,5 paıyz tabys tapqan. Demek, bizdegi qordy basqarý mindetin atqaratyn organnyń jumysy aıtarlyqtaı tıimdi dep aıtýǵa bolmaıdy, - dedi Memleket basshysy.
Osy rette Q.Toqaev Ulttyq bankke Úkimetpen birlesip, Ulttyq qordy basqarý isin jetildirý týraly usynys engizýdi tapsyryp, onda ózi aıtyp ótken kemshilikter túgel eskerilýge tıistigin qadap aıtty.
