Bul týraly Abaı oblysynyń halqymen kezdesýde Indýstrııa jáne ınfraqurylymdyq damý vıse-mınıstri Erjan Myrzabaev aıtty.
Osy rette Memleket basshysynyń «Ortalyq atqarýshy organdar basshylarynyń halyqpen kezdesýlerin ótkizý týraly» Jarlyǵyna sáıkes Indýstrııa jáne ınfraqurylymdyq damý mınıstrligi ókilderiniń elimizdiń óńirlerine issaparlary jalǵasyp kele jatqanyn aıta keteıik.
Abaı oblysynyń isker ortasy jáne jergilikti halqymen IIDM basshysynyń orynbasarlary Erjan Myrzabaev pen Dınara Sheglova kezdesip, turǵyndardyń suraqtaryna jaýap berdi. Máselen, jeńil ónerkásippen aınalysatyn kásipkerler, onyń ishinde Semeıdegi aıaq kıim fabrıkasynyń ókilderi memlekettik qorǵanystyq tapsyrysty alýdyń sharttary tym qatań ekenin jetkizdi. Sondyqtan semeılik jeńil ónerkásipshiler oǵan qatysýdyń talaby ońtaılandyrylyp, jeńildetilse degen pikirde. Bul oraıda E.Myrzabaev qazir qorǵanys ónerkásibi men memlekettik qorǵanystyq tapsyrysqa qatysty zańnama qaıta qarastyrylyp jatqanyn, sondaı-aq keler jyly tıisti zań jobany ázirleý kózdelip otyrǵanyn atap ótti.
«Qazir Úkimet basshysy aldymyzǵa qorǵanys ónerkásibi men memlekettik qorǵanystyq tapsyrys máselelerin retteıtin qoldanystaǵy zańdy tolyǵymen qaıtadan qarastyryp, memlekettik qorǵanystyq tapsyrysty qalyptastyrýdyń erejelerin jetildirý mindetin qoıyp otyr. Mınıstrlik qazir osy máselemen aınalysyp keledi», dedi Indýstrııa jáne ınfraqurylymdyq damý vıse-mınıstri.
Budan bólek jergilikti deńgeıde jeńil ónerkásip kásiporyndaryna Semeıdegi birneshe kóterme saýda ornynda shyǵarylatyn ónim túrlerin satýǵa arnaıy oryndar da belgilengeni aıtyldy.
Sondaı-aq D.Sheglova Abaı oblysynyń halqyna Indýstrııa jáne ınfraqurylymdyq damý mınıstrliginiń quzyryndaǵy birqatar saladaǵy sıfrlandyrý úderisiniń barysyn aıtyp berdi. Máselen, elimizde qurylys kezeńderin e-Qurylys biryńǵaı aqparattyq júıesi arqyly iske asyrý kózdelip otyr. Atalǵan júıe bıyl maýsymda iske qosylǵanyn aıta ketken oryndy. Ol qurylys prosesiniń barlyq qatysýshysy men memlekettik organdarǵa kez kelgen qurylysty avtomattandyrýǵa septigin tıgizedi.
